އެމްޕީއެލްގައި ހުރި ވަޒީފާގެ ފުރުސަތުތަކާއި ގުޅޭ މައުލޫމާތު ދިނުމުގެ ޕްރޮގްރާމެއް ފަށައިފި
ރާއްޖެއަކީ 99 އިންސައްތަ އިމްޕޯޓަށް ބަރޯސާވެފައި އޮތް ގައުމެއް
މާލޭ ވިޔަފާރި ބަނދަރު
މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމެންޓުގެ ފަރާތުން ކުރިއަށްގެންދާ ކެރިއަރ އެކްސްޕްލޮރޭޝަން ޕްރޮގްރާމުގެ ދަށުން އެމްޕީއެލްގައި ހުރި ވަޒީފާގެ ފުރުސަތުތަކާއި ގުޅޭ މައުލޫމާތު ހިއްސާކުރުމަށް ޚާއްސަ ޕްރޮގްރާމެއް ފަށައިފިއެވެ.
މި ޕްރޮގްރާމް ފަށާފައިވަނީ ބުރާސްފަތި ދުވަހު އެމްޕީއެލްގައި ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި އެމްޕީއެލްގެ ސީއީއޯއާއި އެކުންފުނީގެ އިސްވެރިންގެ އިތުރުން ޔޫތު މިނިސްޓްރީގެ އިސްވެރިން ވަނީ ބައިވެރިވެފައެވެ.
މި ޕްރޮގްރާމް ފެށުމުގެ ރަސްމިއްޔާތުގައި ވާހަކަދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ މި ޕްރޮގްރާމުގެ ތެރެއިން އެމްޕީއެލްގައި ހުރި ވަޒީފާގެ ފުރުސަތުތައް އެނގިގެންދާނެ ކަމަށެވެ. އެމްޕީއެލްއަކީ ރާއްޖޭގެ ކޮންމެ ރައްޔިތެއްގެ ދިރިއުޅުމާ ގުޅިފައި އޮތް ކުންފުންޏެއް ކަމަށާއި، ރާއްޖެއަކީ 99 އިންސައްތަ އިމްޕޯޓަށް ބަރޯސާވެފައި އޮތް ޤައުމެއް ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އިމްޕޯޓުގެ 90 އިންސައްތަ އެތެރެވަނީ ކަނޑުމަގުން ކަމަށާއި، މިކަމުގައި ވަރަށް ގިނަ މަސައްކަތްތަކެއް ހިމެނޭ ކަމަށެވެ. އެގޮތުން ކަނޑު އުޅަނދުފަހަރު އޮޕަރޭޓްކުރުމާއި، ޕައިލެޓުންގެ މަސައްކަތާއި، ބޯޓުފަހަރު ރިޕެއަރކޮށް މެއިންޓެއިން ކުރުމާއި، މިފަދަ ތަފާތު އެކި މަސައްކަތްތައް ހިމެނޭ ކަމަށް ޝާހިދު ވިދާޅުވިއެވެ. ޝާހިދު ވިދާޅުވީ މެރިޓައިމް ސިނާއަތަކީ ރާއްޖެއަށް އެންމެ މުހިންމު އެއް ދާއިރާ ކަމަށެވެ. މި ދާއިރާއިން މީހުން ބިނާކޮށް މި ދާއިރާ ކުރިއެރުވުމަކީ ރާއްޖޭގެ އިގްތިސާދަށްވެސް މުހިންމު ކަމެއް ކަމަށާއި، އެހެންކަމުން މި ދާއިރާތަކުން މީހުން ބިނާކުރުމަށް އެކި ޕްރޮގްރާމްތައް ހިންގަމުންދާކަމަށް ޝާހިދު ވިދާޅުވިއެވެ.
މި ރަސްމިއްުޔާތުގައި ވާހަކަދައްކަވަމުން ޔޫތު މިނިސްޓަރ އަހުމަދު މަހުލޫފް ވިދާޅުވީ ޒުވާނުންނަށް ހުރި ވަޒީފާގެ ފުރުސަތުތައް ކިޔައިދީ މީހުން ތަމްރީނުކުރުމަށް އެ މިނިސްޓްރީން މިފަދަ އެކި އެކި ޕްރޮގްރާމްތައް ހިންގަމުންދާކަމަށެވެ. މި ޕްރޮގްރާމްތަކުގައި ބައިވެރިވުމަކީ ކުރިއަށް ދިއުމަށް ލިބޭ ވަރަށް ބޮޑު ފުރުސަތެއް ކަމުގައި މިނިސްޓަރ ވަނީ ސިފަކުރައްވާފައެވެ. އަދި މިގޮތަށް ލިބޭ ފުރުސަތުގެ ބޭނުން ހިފަން ޖެހޭ ކަމަށާއި، އަދި ކުރިއަށް ދިއުމަށް އިތުރަށް މަސައްކަތްކުރަންޖެހޭކަމަށް މަހުލޫފް ވިދާޅުވިއެވެ.
އެމްޕީއެލްއިން ކުރާ މަސައްކަތްތަކާ ގުޅޭ މައުލޫމާތުތައް ހިއްސާކުރުމަށް ޚާއްސަ ޕްރޮގްރާމެއް ފަށާފައިވާއިރު، އެމްޕީއެލްގެ މައިގަނޑު މަސައްކަތަކީ ޕޯޓުތައް މެނޭޖްކުރުމެވެ. އެގޮތުން އެމްޕީއެލުން މިހާރު ގެންދަނީ ހުޅުމާލެ ޕޯޓާއި، ކުޅުދުއްފުށީ ޕޯޓު، އައްޑޫ ސިޓީ ހިތަދޫ ޕޯޓު، ތިނަދޫ ރީޖަނަލް ޕޯޓު، މާލެ ނޯތު ހާބަރ، މާލެ ސައުތު ވެސްޓް ހާބަރ މެނޭޖްކުރަމުންނެވެ.
