ދައުވާ ބިނާކޮށްފައިވަނީ ގުޅުން ނެތް މުއާމަލާތްތަކެއްގެ މައްޗަށްކަމަށް ބުނެ، ޔޫސުފް ނައީމް ދައުވާއަށް އިންކާރުކޮށްފި
16 ފެބުރުއަރީ 2022 | ބުދަ 06:37ޔޫސުފް ނައީމް ވަނީ ދައުވާއަށް އިންކާރު ކޮށްފައި
ޢަބްދުﷲ ޔާމީން ޢަބުދުއްޤައްޔޫމް އާއި ވ.ފެލިދޫ ހަނދުވަރީގެ ޔޫސުފް ނަޢީމް
ވ. އާރަށު ހިޔާނާތުގެ މައްސަލައިގައި ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް އުފުލާފައިވާ ދައުވާއަށް އޭނާ އިންކާރު ކޮށްފިއެވެ.
އެންމެ ފަހުން މި މައްސަލައިގައި ބޭއްވި އަޑުއެހުމުގައި ދައުވާ ސާފުވެފައިވާކަމަށާއި، ދައުވާއަށް ޖަވާބުދާރީވުމަށް އިތުރު ވަގުތު ބޭނުންވާކަމަށް ޔޫސުފް ނައީމްގެ ފަރާތުން ދިފާއީ ވަކީލު ވިދާޅުވިއެވެ. އެއީ 10 ފެބްރުއަރީ 2022 ގައި ބޭއްވި އަޑުއެހުމެވެ.
އެއާއެކު، ބުދަ ދުވަހުގެ އަޑުއެހުމުގައި އެންމެ ފުރަތަމަ ވަނީ ދައުވާއަށް ޖަވާބުދާރީ ވުމުގެ ބައި ކުރިއަށް ގެންގޮސްފައެވެ. އެގޮތުން ޔޫސުފް ނައީމް ވަނީ ދައުވާއަށް އިންކާރު ކޮށްފައެވެ.
ދައުވާއަށް އިންކާރު ކޮށްފައިވާ މައިގަނޑު ސަބަބެއްގެ ގޮތުގައި ދިފާއީ ވަކީލު ފާހަގަ ކުރެއްވީ، މި ދައުވާ ބިނާކޮށްފައިވާ ދެ މުއާމަލަކީ ގުޅުން ނެތް ދެ މުއާމަލާތަށް ވުމެވެ. އަދި އެއީ ގުޅުން އޮތް މުއާމަލާތްތަކެއްކަން ދެއްކުމަށްޓަކައި ހުށައަޅާފައިވާ ހެކިތަކަކީ ޖިނާއީ އިޖުރާއަތުގެ ޤާނޫނުގައި ބަޔާންކޮށްފައިވާ އުސޫލުތަކުގެ މަތިން ހުށައަޅާފައިވާ ހެކިތަކެއް ނޫންކަމަށްވެސް ވަކީލު ވިދާޅުވިއެވެ.
މި މައްސަލައިގައި ދައުވާ އުފުލާފައިވާ އަބްދުﷲ ޔާމީނު ވަނީ 10 ފެބްރުއަރީ 2022 ގައި ބޭއްވި އަޑުއެހުމުގައި ދައުވާ ސާފުވާކަމަށް ވިދާޅުވެ، ދައުވާއަށް އިންކާރު ކުރައްވާފައެވެ. އެގޮތުން ޔާމީނާއި ޔޫސުފް ނައީމްގެ ފަރާތުންވެސް ދައުވާއަށް އިންކާރު ކޮށްފައިވާތީ ދެން އޮންނާނީ ދެފަރާތުން ހެކި ހުށައެޅުމުގެ މަރުޙަލާއެވެ. އެހެންނަމަވެސް، ޔާމީނާއި ޔޫސުފް ނައީމްގެ ފަރާތުން ވަނީ ހެކި ހުށައެޅުމަށް އިތުރު ވަގުތު ބޭނުންވާކަން ފާހަގަ ކުރައްވާފައެވެ.
މައްސަލަ ބައްލަވާ އިސްގާޒީ އަހުމަދު ޝަކީލު ވަނީ ހެކި ހުށައެޅުން ކުރިއަށް ގެންދަވާނީ އެއް މަޖިލީހެއްގައިކަމަށް ވިދާޅުވެފައެވެ. އެގޮތުން ހެކި ހުށައެޅުން ދެން އޮންނަ އަޑުއެހުމެއްގައި ކުރިއަށް ގެންދިއުމަށް ވަނީ ނިންމަވާފައެވެ. އެ އަޑުއެހުން އޮންނާނީ 6 މާރޗުގައެވެ.
މި އަޑުއެހުމުގައި ޔާމީނުގެ ވަކީލުންގެ ޓީމުން ވަނީ ތާވަލަށް ބައެއް ބަދަލުތައް ގެންނަން ބޭނުންވާކަން ފާހަގަކުރައްވައި، އެކަން ލިއުމުން ހުށައަޅުއްވާނެކަމަށް ވިދާޅުވެފައެވެ.
މައްސަލައިގެ ޚުލާސާއެއް:
ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނީ މއ. ކާމިނީހުޅަގުގެ ޢަބްދުﷲ ޔާމީން ޢަބުދުއްޤައްޔޫމް އާއި ވ.ފެލިދޫ ހަނދުވަރީގެ ޔޫސުފް ނަޢީމް، މިނިސްޓްރީ އޮފް ޓްއަރިޒަމް އާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން މެދުވެރިކޮށް ޓުއަރިސްޓް ރިޒޯޓް ތަރައްޤީ ކުރުމަށްޓަކައި ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން ރައީސުލްޖުމްހޫރިއްޔާ މަޤާމުގެ ނުފޫޒު ބޭނުންކޮށްގެން ރިޝްވަތުގެ ގޮތުގައި 1 މިލިއަން ޔޫއެސް ޑޮލަރ ނަގައި ލޯންޑަރ ކޮށްފައިވާ ކަމަށް ތުޙުމަތުކުރެވޭ ކަމަށެވެ.
