މިމަހުގެ 20 ވަނަ ދުވަހުގެ ކުރިން އިތުރު 2 ފެރީ ޓެސްޓު ފްލީޓާއި ގުޅޭނެ - އާޒިމް

އުތުރުގައި ޓެސްޓް ކުރަމުންދާ ހައިސްޕީޑް ފެރީތަކުގެ ތެރެއަށް އިތުރު 2 ފެރީއެއް ޓެސްޓް ކުރުމުގެ މަރުހަލާއަށް މި މަހުގެ 20 ކުރިން ބައިވެރިވާނެ ކަމަަށް އެމްޓީސީސީ އިން ބުނެފިއެވެ.

ހައިސްޕީޑް ފެރީތައް ޓެސްޓް ކުރަން ފަށާފައިވާއިރު، މިކަމާއި ގުޅޭ ގޮތުން އެމްޓީސީސީގެ ސީއީއޯ އާދަމް އާޒިމް ރާއްޖެއެމްވީއަށް މައުލޫމާތުދެއްވަމުން ވިދާޅުވީ، މި ޕްރޮޖެކްޓްގެ ދަށުން ބަނދެފައިވާ 4 ފެރީއެއް އުތުރުގައި ޓެސްޓް ކުރަމުން އަންނަ ކަމަށެވެ. އަދި މި މަސައްކަތުގައި އެމްޓީސީސީގެ އިންޖިނިއަރިންގެ ޓީމެއްގެ އިތުރުން އިޓަލީ އަދި ޖަޕާނުގެ އިންޖިނިއަރިންގެ ޓީމަަކުން ހަރަކާތްތެރިވަމުން އަންނަ ކަމަށެވެ. 

Advertisement

އާޒިމް ވިދާޅުވީ މިހާރު 4 ފެރީއެއް ޓެސްޓް ކުރަމުން އަންނަ އިރު، މި މަހުގެ 20 ގެ ކުރިން އިތުރު 2 ލޯންޗް ފްލީޓާއި ގުޅި ޓެސްޓްތައް ކުރިއަށް ގެންދާނެ ކަމަށެވެ. 

އާޒިމް ވިދާޅުވީ މިހާތަނަށް ކުރި ޓެސްޓްތައް ކާމިޔާބު ކަމަށާއި އިތުރު ޓެސްޓްތައް އަދިވެސް ކުރިއަށް ގެންދާނެ ކަމަށެވެ. އަދި ހަދާފައިވާ ޝެޑިއުލާއި އެއްގޮތަށް ގަޑިއަށް މަންޒިލަށް ދެވޭކަމަށެވެ. 

ވަރަށް އަވަހަަށް ރަސްމީކޮށް މި ހިދުމަތް ފެށިގެންދާނެ ކަމަށް އާޒިމް ވިދާޅުވިއެވެ. އަދި އޭގެ ކުރިން ކުރަން ޖެހޭ ހުރިހާ މަސައްކަތެއް ނިންމާ ދަތުރުތައް ކުރުމަށް ޓީމް ތައްޔާރުވާނެ ކަމަަށެވެ. އާޒިމް ވިދާޅުވީ ފެރީގެ ހިދުމަތް ރަސްމީކޮށް ހިދުމަތް ފެށޭނެ ދުވަހެއް ފަހުގެ ތާރީހެއްގައި އަންގަނެ ކަމަށެވެ.

މި ފެރީތަކަކީ 30 ނޮޓްގެ ބާރުމިނުގައި ދުވާގޮތަށް ހަދާ ފެރީތަކެކެވެ. އަދި މިހާރު ބޭނުންކުރާ ފެރީތަކަށްވުރެ މި ފެރީތަކުގެ ދުވެލި ބާރުވާނެއެވެ.

އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކްގެ ފުރަތަމަ މަރުޙަލާގެ ދަށުން ޚިދުމަތް ދިނުމުގެ އިންތިޒާމްތައް ހަމަޖެހިގެންދާނީ ހއ، ހދ އަދި ށ އަތޮޅުގައެވެ. މި ސަރަހައްދުގައި ފެރީގެ ޚިދުމަތް ދިނުމަށް 40 އާއި 50 އާއި ގާތްކުރާ އަދަދެއްގެ ހައިސްޕީޑް ލޯންޗް ބޭނުންކުރާނެއެވެ.

މީގެ އިތުރުން ހުރިހާ ދުވަހެއްގައި ފެރީގެ ޚިދުމަތްދިނުމަށް ނިންމާފައިވާ އިރު، ހޮސްޕިޓަލް ހުންނަ ރަށްރަށަށް މަދުވެގެން ދުވާލަކު ދެ ދަތުރު ކުރުމަށް ވަނީ ނިންމާފައެވެ.

އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކްއަކީ މުޅި ރާއްޖެއަށް އަމާޒުކޮށް ފަސިންޖަރުންނާއި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕޭޝަލް ޕްލޭން (2020-2040) ގައި ހިމެނޭ ތިން ޒޯންއާއި ހަ ރީޖަން ގުޅުވައިދިނުމަށް ފަރުމާކޮށްފައިވާ ވިއުގައެކެވެ. މި ގޮތުން ފެރީ ނެޓްވޯކްއިން ހަ ރީޖަންގައި އެކުލެވޭ ހުރިހާ ރަށްތަކެއް ގުޅައިލެވޭއިރު، އެއް ރީޖަން އަނެއް ރީޖަންއާ ވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވައިލެވިގެންދާނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް،" "ނަން-ކޮމިއުޓް ލިންކް،" އަދި "ހައިވޭ ލިންކް" މެދުވެރިކޮށެވެ.

ކޮމިއުޓް ލިންކްއަކީ އެ ރީޖަންއެއްގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ހާއްސަކުރެވިފައިވާ ލިންކްއެވެ. ނަން-ކޮމިއުޓް ލިންކްއަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ހާއްސަކޮށްފައިވާ ލިންކްއެވެ. އަދި ހައިވޭ ލިންކްއަކީ އެއް ރީޖަން އަނެއް ރީޖަންއާ ގުޅުވައިދޭ މައި ދަތުރުފަތުރުގެ ހަބްއެވެ.

އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކްގައި ހިމެނޭ ދެވަނަ ޚިދުމަތަކީ ކާގޯ ނުވަތަ މުދާ އުފުލާ ފެރީގެ ޚިދުމަތެވެ. މި ޚިދުމަތަކީ، އެ ރީޖަންއެއްގައި ހިމެނޭ ހުރިހާ ރަށްތަކާ އެންމެ ކައިރީގައި އޮންނަ ކޮމަރޝަލް ހަބް އާއި ގުޅުވައިދޭނެ ޚިދުމަތެކެވެ.