އައިޑީއެއް ގޮއްވާލަން އުޅުނު މައްސަލައިގައި ދައުވާ އުފުލި މީހުންނަށް ދައުވާ ހުށައަޅައި ޖަވާބުދާރީވުން ދެން އޮންނަ އަޑުއެހުމެއްގައި

2017 ވަނަ އަހަރުގެ އޭޕްރީލްމަހުގެ ތެރޭގައި މާލޭގައި ބޮން ގޮއްވަން އުޅުނު ކަމުގެ ތުހުމަތުގައި ދައުވާ އުފުލި މީހުންނަށް ދައުވާ ހުށައަޅައި ޖަވާބުދާރީވުން ދެން އޮންނަ އަޑުއެހުމަކަށް ތާވަލުކޮށްފިއެވެ.

އައިއީޑީއެއް ތައްޔާރުކުރުމަށް ބޭނުންވާ ތަކެއްޗާއި ކެމިކަލް، ތަނެއްގެ ތެރޭގައި ތައްޔާރުކޮށް އައިއީޑީއެއް ހަދާ އެ ގޮއްވާލުމަށް ރާވަމުންދާކަމުގެ ތުހުމަތުގައި ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ އިއުތިސާމް މުޙައްމަދު ސައީދާއި، މުޙައްމަދު ތަސްލީމާއި، ނާސިއު މުޙައްމަދުގެ އިތުރުން، ޝިމާން ޝަރީފެވެ. އެ 4 މީހުންގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރަން އުޅުމުގެ ކުށުގެ ދައުވާއެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ދައުލަތުން ވަނީ މި އަޑުއެހުންތައް ސިއްރު ކޮށްގެން ކުރިއަށް ގެންދިއުމަށް އެދިފައެވެ. ނަމަވެސް އަންގާރަ ދުވަހުގެ އަޑުއެހުމުގައި ދައުލަތުން ވަނީ މި މައްސަލަ ހުޅުވާލައިގެން ކުރިއަށް ގެންދިއުމަށް އިއުތިރާޒު ނުކުރާކަމަށް ފާހަގަކޮށްފައެވެ. އަދި ސިއްރު ހެކިންގެ ހެކިބަސް ނެގުމުގެ ބައި އެކަނި ސިއްރު ކޮށްގެން ކުރިއަށް ގެންދިއުމަށްް ވަނީ އެދިފައެވެ. 

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.

މި މައްސަލައިގައި ދައުވާލިބޭ ތަސްލީމަށް ވަކީލަކު ހަމަޖެއްސުމަށް ކުރިން ދިން ފުރުސަތުގައި އޭނާއަށް ވަކީލަކު ހަމަޖެހިފައިނުވާތީ މި އަޑުއެހުމުގައި ފަހު ފުރުސަތެއް އޭނާއަށް ވަނީ ދެއްވާފައެވެ. އަދި ޝިމާން ޝަރީފްގެ ވަކީލުވެސް މި އަޑުއެހުމަށް ހާޒިރުވެފައެއް ނުވެއެވެ.

މި އަޑުއެހުމުގައި ހާޒިރުވީ ހަމައެކަނި އިއުތިސާމްއާއި ނާސިއުގެ ވަކީލުން އެކަންޏެވެ.

މި އަަޑުއެހުމަށް 2 ވަކީލަކު ހާޒިރުވެފައިނުވާތީ އިބްތިދާއީ އަޑުއެހުމުގެ ބައި ކުރިއަށް ގެންގޮސްފައެއް ނުވެއެވެ. އެގޮތުން ދައުވާ ސާފުކޮށް، ޖަވާބުދާރީވުން ވަނީ އެހެން ދުވަހަކަށް ތާވަލު ކޮށްފައެވެ.

މައްސަލަ ބައްލަވާ ގާޒީ ވަނީ މާރޗް 1 ވަނަ ދުވަހުގެ 14:00 އަށް މައްސަލައިގެ އަޑުއެހުމެއް ތާވަލުކޮށްފައެވެ.