ބޮޑީ ވޯން ކެމެރާ ބޭނުންކުރުން ބައެއް ހާލަތްތަކުގައި އިސްތިސްނާވޭ
15 ފެބުރުއަރީ 2022 | އަންގާރަ 01:51ރެކޯޑް ނުކުރެވޭ ފަދަ ހާލަތްތަކުގައި ކެމެރާ ލެންސު މަތީގައި އަތް އެޅުން ނުވަތަ ކެމެރާ ނިއްވާލަންޖެހޭ
ދިވެހި ފުލުހުންގެ ހިދުމަތުން ބޭނުންކުރަން ފެށި ބޮޑީވޯން ކެމެރާ
ބޮޑީ ވޯން ކެމެރާ ބޭނުންކުރުން ބައެއް ހާލަތްތަކުގައި އިސްތިސްނާވާނެ ކަމަށް ޗީފް އިންސްޕެކްޓަރ އޮފް ޕޮލިސް އަމީން އަބްދުލް ގައްޔޫމް ވިދާޅުވެއްޖެއެވެ.
ފުލުހުންގެ މަސައްކަތުގައި އުޅޭ ވަގުތު ބޮޑީ ވޯން ކެމެރާ ބޭނުންކުރަން ފެށުމާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އަމީން ވިދާޅުވީ ބޮޑީ ވޯން ކެމެރާއަކީ ހުރިހާ ހާލަތެއްގައިވެސް ބޭނުންކުރަންޖެހޭނެ އެއްޗެއް ކަމަށެވެ. މިގޮތުން މުޒާހަރާތަކާއި، ގެވެށި އަނިޔާގެ ސީންތަކަށް ދާއިރު އަދި ކޮންމެ ސީން އަކަށް ދިޔަޔަސް ބޮޑީ ވޯން ކެމެރާ ބޭނުންކުރަން ލާޒިމުވާނެ ކަމަށް އަމީން ވިދާޅުވިއެވެ.
އެހެންނަމަވެސް ބައެއް ސީންތަކަށް އެޓެންޑުވާއިރު ބޮޑީ ވޯން ކެމެރާ ބޭނުންކުރުން އިސްތިސްނާވާނެ ކަމަށް އަމީން ވިދާޅުވިއެވެ. އޭގެ ތެރޭގައި ވިކްޓިމަކު ނިވާކަން ކުޑަގޮތަކަށް ހުރުން ފަދަ ހާލަތްތައް ހިމެނޭކަމަށް ވިދާޅުވިއެވެ. އެފަދަ ހާލަތްތަކުގައި ކެމެރާ ލެންސު މަތީގައި އަތް އެޅުން ނުވަތަ ކެމެރާ ނިއްވާލަން ޖެހޭނެ ކަމަށް އަމީން ވިދާޅުވިއެވެ.
އަމީން ވިދާޅުވީ ސީންތަކަށް އެޓެންޑުވާއިރު ބޮޑީ ވޯން ކެމެރާ ބޭނުންކުރަން ފަށާފައިވަނީ 200 ކެމެރާއާއެކު ކަމަށެވެ. އެހެންކަމުން ކޮންމެ އޮފިސަރެއްގެ އަތުގައި ކެމެރާއެއް ނޯންނާނެ ކަމަށާ އަދި ކޮންމެ ސީންއެއް ރެކޯޑުކުރެވިގެންވެސް ނުދާނެ ކަމަށެވެ. އެހެންނަމަވެސް ގިނަ ފަހަރަށް ސީންއަކަށް އެޓެންޑުވާއިރު ފުލުހުންގެ ގައިގައި ކެމެރާ ހަރުކޮށްފައި ހުންނާނެ ކަމަށް އަމީން ވިދާޅުވިއެވެ.
ފުލުހުން ސީންއަކަށް ގޮސް، އެ ސީންއެއް ރެކޯޑުކުރާނަމަ ކެމެރާގެ ލެޑު ލައިޓުން ރެކޯޑު ކުރާކަން އެނގޭނެ ކަމަށް އަމީން ވިދާޅުވިއެވެ. މިގޮތުން ރެކޯޑުކުރާވަގުތު ކެމެރާގެ ލެޑު ލައިޓް ރަތްކުލައިން ދިއްލޭނެ ކަމަށް އަމީން ވިދާޅުވިއެވެ.
