އޮޑިޓް ރިޕޯޓުތަކާގުޅިގެން ޖަވާބުދާރީވުމެއް ނޯވޭ؟

އޮޑިޓަރ ޖެނެރަލްގެ އޮފީހުން ފާއިތުވި ދުވަސްތަކުގައި ވަނީ ދައުލަތުގެ ބައެއް މުއައްސަސާތަކުގެ އޮޑިޓް ރިޕޯޓުތައް އާންމުކޮށްފައެވެ. އޭގެ ތެރެއިން ބައެއް އޮޑިޓުތަކުގައި ބޮޑެތި މައްސަލަތައް ފާހަގަވެފައިވާއިރު، އެކަންކަމާ ގުޅުންހުރި މުއައްސަސާތަކުން އެކަށީގެންވާ ގޮތެއްގައި ޖަވާބުދާރީ ނުވާކަމަށް ގިނަ ބަޔަކު ބުނެއެވެ.

މިސާލެއްގެ ގޮތުން ދައުލަތުގެ މީޑިއާ (ޕީއެސްއެމް)ގެ 2017، 2018 އަދި 2019 ވަނަ އަހަރުގެ އޮޑިޓް ރިޕޯޓު އޮޑިޓަރ ޖެނެރަލް އޮފީހުން ވަނީ އާންމުކޮށްފައެވެ. 

އޮޑިޓް ރިޕޯޓުގައި ބަޔާންކޮށްފައިވާ ގޮތުން 31 ޑިސެމްބަރު 2019ގެ ނިޔަލަށް އާމްދަނީގެ ގޮތުގައި 22 މިލިއަނަށްވުރެ ގިނަ ރުފިޔާ ވަނީ ރެކޯޑު ކޮށްފައެވެ. އަދި ފިނޭންސުން ބަޖެޓް އެހީގެ ގޮތުގައި 129 މިލިއަނަށްވުރެ ގިނަ ރުފިޔާ ލިބިފައިވާކަން އޮޑިޓް ރިޕޯޓުން އެނގެއެވެ. ހަމައެއާއެކު، ޚަރަދުގެ ގޮތުގައި 111 މިލިއަނަށްވުރެ ގިނަ ރުފިޔާ ރެކޯޑު ކޮށްފައިވާއިރު، އޭގެ ތެރޭގައި އިދާރީ ޚަރަދުގެ ގޮތުގައި ހިމެނޭ 71 މިލިއަން ރުފިޔާއާއި، މާކެޓިންގ ޚަރަދުގެ ގޮތުގައި ބަޔާންކޮށްފައިވާ 23 ހާހަށްވުރެ ގިނަ ރުފިޔާ ހިމެނެއެވެ.

އެހެން ނަމަވެސް، ޚަރަދާއި އާމްދަނީއާ ގުޅޭ މި އަދަދުތައް ކުންފުނީގައި ހުރި މާލީ ލިޔެކިޔުންތަކުން ސާފުނުވާކަން އޮޑިޓުގައި ފާހަގަކޮށްފައިވެއެވެ. އެގޮތުން ކުންފުނިން މާލީ ލިޔެކިޔުންތަކުގެ ރެކޯޑު ރަނގަޅަށް ފުރިހަމައަށް ބަލަހައްޓާފައި ނުވާކަން މި 3 އަހަރުގެ އޮޑިޓް ރިޕޯޓުންވެސް ފާހަގަވެފައިވެއެވެ.

އޭގެ އިތުރުން، އަތް ނުލެވޭ ހަރު މުދަލުގެ ގޮތުގައި ބައެއް ތަކެތި ރެކޯޑު ކޮށްފައިވީނަމަވެސް، އެއާގުޅޭ ލިޔެކިއުންތަކެއްވެސް ރެކޯޑުތަކުން ސާފުވާކަށް ނެތެވެ. އެ ތަކެތީގެ އަގުވެސް 2 މިލިއަނަށްވުރެ ބޮޑެވެ.

އެންމެ ފަހުން މި މައްސަލަ ރައްޔިތުންގެ މަޖިލީހުގެ އެސްއޯއީ ކޮމިޓީގެ ސަމާލުކަމަށް އައިސް، ކުންފުނީގެ ބޯޑުން އެކުލަވާލާފައިވާ އިންޓަރނަލް އޮޑިޓުތައް ހޯދައި، އެ ރިޕޯޓުތައް ރިވިއު ކުރުމުގެ މަސައްކަތް ކުރާނެކަން ކޮމިޓީން ވަނީ ހާމަކޮށްފައެވެ.

ހަމައެގޮތަށް ޖެންޑަރ މިނިސްޓްރީގެ އޮޑިޓާގުޅޭ ގިނަ މައްސަލަތަކެއްވެސް ވަނީ ފާހަގަވެފައެވެ. އެގޮތުން ކޮވިޑް-19އާ ގުޅިގެން ހާލުގައި ޖެހުނު އާއިލާތަކަށް ކެއިން ބުއިމުގެ އިންތިޒާމް ހަމަޖެއްސީ ދައުލަތަށް ގެއްލުންވާގޮތަށް ކަން އޮޑިޓުން ހާމަވެފައިވާއިރު، ބިޑްތަކަށް މާކްސް ދިނުމުގައި މަސައްކަތުގެ ތަޖުރިބާ ނުވަތަ މަސައްކަތް ކޮށްދިނުމުގެ ގާބިލިއްޔަތުކަން ހުރި މިންވަރު އެއްވެސްވަރަކަށް ވަޒަންކޮށްފައި ނުވާކަންވެސް އެނގިފައިވެއެވެ. ކުޑަމިނުން މިނިސްޓްރީން ބެލެހެއްޓި ޝެލްޓަރތަކުގައި, އެކި ދުވަހު ތިބި މީހުންގެ އަދަދު ވަކިން އެނގޭނެ ގޮތަށް ހަރުދަނާ ގޮތެއްގައި ލިޔެކިޔުން ބަލަހައްޓާފައި ނުވާކަންވެސް ވަނީ ފާހަގަވެފައެވެ.

އޭގެ އިތުރުން، ޖެންޑަރއިން 2019 އާއި 2020 ވަނަ އަހަރުގެ މާލީ ބަޔާންތައް އޮޑިޓުކުރުމަށް ހުށަހަޅާފައިނުވާއިރު، ޖެންޑަރއަށް އެހީގެ ގޮތުގައި ލިބިފައިވާ ފައިސާ މާލިއްޔަތުގެ ގަވައިދާ ޚިލާފަށް ޚަރަދުކޮށްފައިވާކަން, މިއީ ހައްތަހާވެސް ފާހަގަވެފައިވާ މައްސަލަތަކެވެ.

އެހެންނަމަވެސް، މިފަދަ މައްސަލަތައް ފެންމަތިވުމާގުޅިގެން ޖަވާބުދާރީވުމާއި، ރައްޔިތުންނަށް ކަންކަން ސާފުކޮށްދިނުން އަބަދުވެސް ފެންނަނީ މަޑުޖެހިފައި އޮންނަ މަންޒަރެވެ. ގިނަ ފަހަރަށް, ކަމާބެހޭ އިދާރާއަކަށް ހާޒިރުކޮށް ޖަވާބުދާރީ ކުރުވަންދެން، ނުވަތަ ނޫސްތަކުން އެތައް ފަހަރަކު ސުވާލުކުރަންދެން މަޑުކުރުން މިއީ އާންމުކޮށް ފެންނަ މަންޒަރެވެ. އެ މުއައްސަސާއަކުން އަމިއްލަ އިސްނެގުމުގެ މައްޗަށް ނޫސްވެރިންގެ ބައްދަލުވުމެއް ބާއްވާލުމާއި، ރައްޔިތުންނަށް ކަންކަން ވީ ގޮތް ސާފުކޮށްދިނުން މިއީ މި ގައުމުގައި ފެނުން ނާދިރު މަންޒަރެކެވެ.