މިއަހަރުގެ މިހާތަނަށް އެއްލައްކަ ހަތްދިހަ ހާހަށްވުރެ ގިނަ ފަތުރުވެރިން ރާއްޖެ އައިސްފައިވޭ

މިއަހަރުގެ މިހާތަނަށް އެއްލައްކަ ހަތްދިހަ ހާހަށްވުރެ ގިނަ ފަތުރުވެރިން ރާއްޖެ އައިސްފައިވާކަމަށް ޓުއަރިޒަމް މިނިސްޓްރީން ހާމަކޮށްފިއެވެ.

ޓުއަރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މިއަހަރުގެ ފެބްރުއަރީ މަހުގެ 10 ވަނަ ދުވަހާ ހަމައަށް 171،982 ފަތުރުވެރިން ރާއްޖެ އައިސްފައިވެއެވެ. 2021 ވަނަ އަހަރުގެ ޑިސެމްބަރުގެ ނިޔަލަށް 1،321،932 ފަތުރުވެރިން ރާއްޖެ އައިސްފައިވާއިރު 2019 ވަނަ އަހަރު 1،702،887 ފަތުރުވެރިން ރާއްޖެ އައިސްފައިވާ ކަމަށް ޓުއަރިޒަމް މިނިސްޓްރީން ހާމަކޮށްފައިވެއެވެ.

ޓުއަރިޒަމް މިނިސްޓްރީން ބުނީ މިއަހަރުގެ މި މުއްދަތުގައި ދުވާލެއްގެ މައްޗަށް 4،469 ފަތުރުވެރިން ރާއްޖެ އައިސްފައިވާކަމަށެވެ.

މިއަހަރުގެ މިހާތަނަށް އައި ފަތުރުވެރިންގެ އެންމެ ބޮޑު ބައެއް ހިއްސާކުރަނީ ރަޝިއާ މާކެޓުގެ ފަތުރުވެރިންނެވެ. އެގޮތުން ރަޝިއާ މާކެޓުން އައި ފަތުރުވެރިން 16.1 އިންސައްތަ ހިއްސާކުރާއިރު، ދެވަނައަށް އެންމެ ގިނައިން ފަތުރުވެރިން އައިސްފައިވަނީ ޔޫކޭ މާކެޓުން ކަމަށް ޓުއަރިޒަމް މިނިސްޓްރީން ބުނެފައިވެއެވެ. ޔޫކޭ މާކެޓަށްފަހު އެންމެ ގިނަ ފަތުރުވެރިން އައިސްފައިވަނީ އިންޑިއާއިން ކަމަށް ޓުއަރިޒަމް މިނިސްޓްރީން ހާމަކޮށްފައިވެއެވެ. އެއަށްފަހު އިޓަލީ، ޖަރުމަނު، ޔޫކްރޭން، ފްރާންސް، އެމެރިކާ، ސައުދީ އަރަބިއާ އަދި އޮސްޓްރޭލިއާ ހިމެނެއެވެ.

މީގެ އިތުރުން ރާއްޖޭގައި ހުރި ފަތުރުވެރިންގެ އެކޮމޮޑޭޝަން ފެސިލިޓީތަކުގެ ތެރެއިން 950 ތަނެއް މިވަގުތު ޚިދުމަތަށް ހުޅުވާލާފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ. މި ފެސިލިޓީތަކުގައި 59،947 ބެޑް ކެޕޭސިޓީ އެބަހުރި ކަމަށް ވެސް އެމިނިސްޓްރީން ހާމަކޮށްފައިވެއެވެ.

މިއަހަރު ނިމުމުގެ ކުރިން 2 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ. 2021 ވަނަ އަހަރު 1.3 މިލިއަން ފަތުރުވެރިން ގެނައުމަށް އަމާޒުކޮށް، އެއަމާޒު ކާމިޔާބުކޮށް 2021 ވަނަ އަހަރު ނިމުނުއިރު 1.32 މިލިއަން ފަތުރުވެރިން ވަނީ ރާއްޖެ ގެނެސްފައެވެ.