ހުޅުމާލޭގައި އިތުރު ޕެޓްރޯލް ޝެޑެއް ހެދުމަށް އިއުލާނުކޮށްފި
11 ފެބުރުއަރީ 2022 | ހުކުރު 09:03މި ޝެޑުގެ މަސައްކަތް ހަވާލުކުރުމަށް ހަމަޖެހިފައިވަނީ 100 އިންސައްތަ ދިވެހި ކުންފުންޏަކަށް
ހުޅުމާލޭގެ އެކި ސަރަހައްދުތައް
ހުޅުމާލޭގައި އިތުރު ޕެޓްރޯލް ޝެޑެއް ހެދުމަށް އިއުލާނުކޮށްފިއެވެ.
ހައުސިންގ ޑިވެލޮޕްޕެންޓް ކޯޕަރޭޝަން (އެޗްޑީސީ)ން ވަނީ ހުޅުމާލޭގެ ފުރަތަމަ ފިޔަވަހީގައި އިތުރު ޕެޓްރޯލް ޝެޑެއް ހެދުމަށް އިއުލާނުކޮށްފައެވެ. މި ޝެޑް ހެދުމަށް ހަމަޖެހިފައި ވަނީ ހުޅުމާލޭގެ ފުރަތަމަ ފިޔަވަހީގެ މުނިސިޕަލް ސަރވިސް އޮޕަރޭޝަން ސަރަހައްދުގައެވެ.
އެޗްޑީސީން ހެދުމަށް ހަމަޖެހިފައިވާ މި ޝެޑުގެ މަސައްކަތް ހަވާލުކުރުމަށް ހަމަޖެހިފައިވަނީ 100 އިންސައްތަ ދިވެހި ކުންފުންޏަކަށެވެ. މި މަސައްކަތަށް ޝައުގުވެރިވާ ފަރާތްތަކުން މިއަންނަ މާޗު މަހުގެ ދެވަނަ ދުވަހުގެ ކުރިން ބިޑް ހުށަހަޅަން ޖެހޭނެކަމަށް އެޗްޑީސީގެ އިއުލާނުގައިވެއެވެ. ޕްރީ ބިޑް ބައްދަލުވުން ބޭއްވުމަށް ހަމަޖެހިފައިވަނީ މިމަހުގެ 17 ގައެވެ.
ހުޅުމާލޭގެ ފުރަތަމަ ފިޔަވަހީގައި މިހާރުވެސް ދެ ޕެޓްރޯލް ޝެޑަކުން އަންނަނީ ޚިދުމަތް ދެމުންނެވެ. އެއީ އެފްއެސްއެމްއާއި ވިލާގެ ޕެޓްރޯލް ޝެޑްތަކެކެވެ.
ފުރަތަމަ ފިޔަވަހީގައި އިތުރު ޕެޓްރޯލް ޝެޑެއް ހެދުމަށް ހުޅުވާލާފައި ވާއިރު، ހުޅުމާލޭގެ ދެވަނަ ފިޔަވަހީގައި ޕެޓްރޯލް ޝެޑެއް ހަދާނެ ބަޔަކު ހޯދުމަށްވެސް އެޗްޑީސީން ވަނީ މިދިޔަ މަހުގެ ތެރޭގައި އިއުލާނު ކޮށްފައެވެ.
