ޔޫވީ ބަލިކޮށް ސަސް ފައިނަލަށް

ޔޫތު ޗެމްޕިއަންޝިޕްގައި ޕެނަލްޓީ ޖަހައިގެން ޔުނައިޓެޑް ވިކްޓްރީ (ޔޫވީ) ބަލިކޮށް ސުޕަ ޔުނައިޓެޑް ސްޕޯޓްސް (ސަސް) އިން ފައިނަލުގެ ފަހު ޖާގަ ހޯދައިފިއެވެ.

ގައުމީ ފުޓުބޯޅަ ދަނޑުގައި ބުދަ ދުވަހުގެރޭ ކުޅުނު މެޗުގެ ފުރިހަމަ ވަގުތު ހަމަވީ ލަނޑެއް ނުޖެހި ދެ ޓީމު އެއްވަރުވެގެންނެވެ. އެއާއެކު ޖެހި ޕެނަލްޓީން ސަސް ކުރި ހޯދީ 3-2 ގެ ނަތީޖާއަކުންނެވެ.

މެޗު ފަށައިގެން ޔޫވީން ސަސްގެ ހާފަށް ބާރުބޮޑުކުރިއިރު، ޔޫވީގެ ކުރިއަށް ކުޅޭ އަބްދުލް ރަޙްމާން ތިބްޔާން އަލީ ސައީދު އާއި ޒައިޝާން އަޝްރަފް ފޮނުވާލި ހަމަލާތައް ސަސްގެ ކީޕަރު މީސަމް އަބްދުﷲ ވަނީ ހުށިޔާރުކަމާއެކު ދިފާއުކޮށްފައެވެ.

މި ހާފުގައި ސަސްގެ ވިޝާހު އަބްދުލް މަޖީދަށް ވެސް ލަނޑު ޖަހަން ފުރުސަތުތަކެއް ލިބި ވަނީ ބޭކާރުވެފައެވެ. އޭނާ ފޮނުވާލި ހަމަލާތައް ގޯލާ އަމާޒުނުވެ ދިޔައީ ބޭރަށެވެ.

ދެވަނަ ހާފުގައި ޔޫވީން ސަސްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލިއިރު، މެޗުގެ 62 ވަނަ މިނެޓުގައި ޒައިޝާން ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ.

މެޗުގެ ފުރިހަމަ ވަގުތު ހަމަވުމުން ނަތީޖާ ނެރުމަށް ވަނީ ޕެނަލްޓީ ޖަހައިފައެވެ. ޔޫވީގެ ޒައިޝާން ފޮނުވާލި ބޯޅަ ސަސްގެ ކީޕަރު މީސަމް ވަނީ ދިފާއުކޮށްފައެވެ. އަދި ސަސްގެ ފުރަތަމަ ޕެނަލްޓީ ޖެހި ސާލިފް ހުސެއިންގެ ޕެނަލްޓީ ޔޫވީގެ ކީޕަރު ޝައިބާން ވަނީ މަތަކޮށްފައެވެ. ޔޫވީގެ ކެޕްޓަން މުޙައްމަދު ޒައިން ޝުޖާއު ޖެހި ޕެނަލްޓީވެސް މީސަމް ވަނީ ދިފާއުކޮށްފައެވެ. ސަސްގެ ދެވަނަ ޕެނަލްޓީ ޖެހި އިޝް އާފް މުޙައްމަދު ފިރާގު ވަނީ ކާމިޔާބުކޮށްފައެވެ. ޔޫވީން ތިން ވަނަ ޕެނަލްޓީ ލަމާން ޒުހައިރު ވަނީ ކާމިޔާބު ކޮށްފަ އެވެ. ސަސްގެ ތިން ވަނަ ޕެނަލްޓީ އަހުމަދު އައިހަމް މޫސާ ޖެހިއިރު، ދިޔައީ އަރިމަތިން ބޭރުންނެވެ.

ޔުނައިޓެޑް ވިކްޓްރީގެ ހަތަރު ވަނަ ޕެނަލްޓީ ޒަހުވާން މުހައްމަދު ފޮނުވާލިއިރު، ކީޕަރު މީސަމް މަތަކުރި އެވެ. އެކަމަކު، މީސަމް ކުރިއަށް ޖެހިފައި މަތަކުރުމުން ދެ ވަނަ ފަހަރަށް ޖަހަން ދިނުމުން ޒަހުވާން ވަނީ ކާމިޔާބުކޮށްފައެވެ.

ސަސްގެ ހަތަރު ވަނަ ޕެނަލްޓީ ވިޝާހު ވަނީ ކާމިޔާބުކޮށްފަ އެވެ. ޔޫވީ ތިބްޔާން އެ ޓީމުގެ ފަސް ވަނަ ޕެނަލްޓީ ޖެހުމުން ކީޕަރު މީސަމް އެ ބޯޅަ ހުއްޓުވައި އެ ޓީމަށް މޮޅުވާން ފުރުސަތު ހޯދައިދިނެވެ. ސަސްގެ ފަސް ވަނަ ޕެނަލްޓީ ޖަހައި އަލީ ޒާލިފް ވަނީ އެ ޓީމު މޮޅުކޮށްދީފައެވެ.

ސަސް އިން ފުރަތަމަ ފަހަރަށް ޔޫތު ޗެމްޕިއަންޝިޕްގައި ކުޅުނު ފަހަރު މި ވަނީ ފައިނަލުން ފުރުސަތު ހޯދައިފައެވެ. އަންނަ އާދިއްތަ ދުވަހު ފ، ނިލަންދޫ ޓާފް ދަނޑުގައި ކުޅޭ ފައިނަލުގައި ސަސް ކުޅޭނީ ކްލަބް އީގަލްސްއާއެވެ. އީގަލްސް ފައިނަލުން ފުުރުސަތު ހޯދީ ޓީސީ ސްޕޯޓްސް ކްލަބް ސެމީގައި ބަލިކުރުމަށް ފަހުއެވެ.