ދަ ގްރާންޑޭ ބަލިކޮށް ސަސް ސެމީއަށް

ޔޫތު ޗެމްޕިއަންޝިޕް ފުޓްބޯޅަ މުބާރާތުގައި ހޮނިހިރު ދުވަހުގެރޭ ކުޅުނު މެޗުން ފަސޭހަކަމާއެކު ދަ ގްރާންޑޭ ސްޕޯޓްސް ކުލަބު ބަލިކޮށް ސެމީ ފައިނަލަށް ސުޕަ ޔުނައިޓެޑް ސްޕޯޓްސް (ސަސް) ދަތުރުކޮށްފިއެވެ.

ގައުމީ ފުޓްބޯޅަ ދަނޑުގައި ކުޅުނު މެޗުން ސަސް މޮޅުވީ ފަސޭހަކަމާއެކު 6-0 ގެ ނަތީޖާއަކުންނެވެ.

މި މެޗު ފަށައިގެން ސަސްއިން ދަ ގްރާންޑޭގެ ހާފަށް ބާރު ބޮޑުކޮށް ގިނަ ހަމަލާތަކެއް އުފެއްދިއިރު، މެޗުގެ 20 ވަނަ މިނެޓުގައި އެ ޓީމުން ވަނީ ލަނޑު ޖަހައި ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ ސާލިފް ހުސައިނެވެ. އަދި އޭގެ ތިން މިނެޓު ފަހުން ސަސްއިން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. ދަ ގްރާންޑޭގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި މި ލަނޑު އެ ޓީމަށް ކާމިޔާބުކޮށްދިނީ އައިހަމް މުޙައްމަދެވެ.

މި މެޗުގައި ސަސްގެ ތިންވަނަ ލަނޑު މެޗުގެ 25 ވަނަ މިނެޓުގައި އެ ޓީމަށް ކާމިޔާބުކޮށްދިނީ ވިޝާހު އަބްދުލްމަޖީދެވެ. މިއީ އެ ޓީމުގެ އަޙްމަދު ޖުމާންގެ އެހީތެރިކަމާއެކު ވިޝާހު ކާމިޔާބުކުރި ލަނޑެކެވެ.

މި މެޗުގެ ދެވަނަ ހާފުގައިވެސް ސަސްއިން ދަ ގްރާންޑޭގެ ގޯލަށް ނުރައްކާކޮށް ގިނަ ހަމަލާތަކެއް އުފެއްދިއިރު، ދެވަނަ ހާފުގައި ސަސްއިން ވަނީ ގާތްގާތުގައި އިތުރު ދެ ލަނޑު ޖަހާފައެވެ. އެގޮތުން އެ ޓީމުން ކާމިޔާބުކުރި ހަތަރުވަނަ ލަނޑު މެޗުގެ 58 ވަނަ މިނެޓުގައި ވިޝާހު ޖަހައިދިންއިރު، އޭގެ ދެ މިނެޓު ފަހުން ފަސްވަނަ ލަނޑު ކާމިޔާބުކޮށްދިނީ އަލީ ޝާޒް ހަބީބެވެ. ދެން މި މެޗުގައި ސަސްއިން ކާމިޔާބުކުރި ހަވަނަ ލަނޑު މެޗު ނިމެން ހަ މިނެޓަށް ވެފައި ވަނިކޮށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެންއެރި މުތާއު މުޙައްމަދެވެ.

މި މެޗާއެކު ޔޫތު ޗެމްޕިއަންޝިޕުގެ ގްރޫޕް ސްޓޭޖުގެ ކުޅުން ނިމުނުއިރު، ފަސް ޓީމު ހިމެނޭ ގްރޫޕް އޭގެ އެއްވަނަ ހޯދީ 10 ޕޮއިންޓާއެކު ކުލަބު އީގަލްސްއެވެ. ނުވަ ޕޮއިންޓާއެކު ސަސްއަށް ދެވަނަ ލިބުނުއިރު، ތިންވަނައަށް ދިޔައީ ހަތް ޕޮއިންޓް ހޯދާފައިވާ މާޒިޔާ ސްޕޯޓްސް އެންޑް ރެކްރިއޭޝަނެވެ. އަދި ހަތަރުވަނައަށް ދިޔަ ދަ ގްރާންޑޭއަށް ތިން ޕޮއިންޓް ލިބުނުއިރު، ގްރޫޕްގެ ފުލުގައި އޮތް ކުލަބު ގްރީން ސްޓްރީޓްސްއަށް ޕޮއިންޓެއް ލިބިފައެއް ނުވެއެވެ.

ގްރޫޕް އޭގެ ދެވަނަ ޓީމުގެ ގޮތުގައި ސަސް ސެމީއަށް ދަތުރުކުރިއިރު، ސެމީގައި ސަސް ކުޅޭނީ ގްރޫޕް ބީގެ އެއްވަނަ ހޯދި ޔުނައިޓެޑް ވިކްޓަރީ (ޔޫވީ) އެވެ. އެ މެޗު ކުޅޭނީ އަންނަ ބުދަ ދުވަހުގެރެއެވެ.