މިހާރު ކުރިއަށްދާ 16 އަހަރުން ދަށުގެ ޔޫތު ޗެމްޕިއަންޝިޕްގެ ސެމީ ފައިނަލުގެ ޖާގަ ވެލެންސިޔާއިން ކަށަވަރުކޮށްފިއެވެ.

ވެލެންސިޔާއަށް ސެމީގެ ޖާގަ ޔަގީންވީ ގްރޫޕް ސްޓޭޖުގައި މިއަދު ހަވީރު ކުޅުނު މެޗުން މޮޅު ވުމުންނެވެ. ގްރޫޕް ސްޓޭޖުގެ ފަހު މެޗުގައި އީގަލްސްގެ މައްޗަށް ވެލެންސިޔާ ކުރިހޯދީ 1-0ންނެވެ. މެޗުގެ ހަމައެކަނި ގޯލު ދެވަނަ ހާފުގެ 64 ވަނަ މިނެޓުގައި ވެލެންސިޔާއަށް ކާމިޔާބު ކޮށްދިނީ އަހްމަދު ހަމްދާން އަޒްލީންއެވެ. މިއީ އީގާލްސް ހާފުގެ މެދެއްހާ ހިސާބު ހުރެފައި ގޯލަށް ފޮނުވާލައިގެން އޭނާ ކާމިޔާބުކުރި ހިތްގައިމު ލަނޑެކެވެ.

ގްރޫޕް ބީގެ އެއްވަނާގައި ވެލެންސިޔާ ސެމީއަށް ދަތުރުކުރިއިރު، ފުރަތަމަ މެޗުން އެޓީމު ވަނީ 10-1ން ދަ ގްރާންޑޭ ބަލިކޮށްފައެވެ. ގްރޫޕް ބީން ސެމީއަށް ދަތުރުކުރާ ދެވަނަ ޓީމު ޔަގީންވާނީ ބުރާސްފަތި ދުވަހުއެވެ. ގްރޫޕްގެ ފަހު މެޗުގައި ބުރާސްފަތި ދުވަހު ހަވީރު ދަ ގްރާންޑޭއާއި އީގަލްސް ބައްދަލުކޮށް މޮޅުވާ ޓީމެއް ސެމީއަށް ދާނެއެވެ.

ގްރޫޕް އޭއިން ސެމީގެ ޖާގަ މިހާތަނަށް ޔަގީންވެފައި އޮތީ ޓީސީ ސްޕޯޓްސް ކްލަބަށެވެ. ޓީސީ ވަނީ ބާކީ އެއްމެޗު އޮއްވައި، ގްރޫޕްގެ އެއްވަނާގައި ސެމީގެ ޖާގަ ކަށަވަރުކޮށްފައެވެ. ޓީސީން ވަނީ މާޒިޔާ ސްޕޯޓްސް އެންޑް ރެކްރިއޭޝަނާއި ސުޕަރ ޔުނައިޓެޑް ސްޕޯޓްސް (ސަސް) ބަލިކޮށްފައެވެ.

މުބާރާތުގެ މެޗުތައް ދެން އޮންނާނީ ބުދަ ދުވަހުއެވެ. ބުދަ ދުވަހު ހަވީރު ޓީސީ ނިކުންނާނީ ޔުނައިޓެޑް ވިކްޓްރީއާ ދެކޮޅަށެވެ. އެރޭ އޮންނާނީ މާޒިޔާއާ ސަސް ބައްދަލުކުރާ މެޗެވެ.