ޓީސީ ބަލިކޮށް އީގަލްސްއިން ފައިނަލުގެ ފުރަތަމަ ޖާގަ ހޯދައިފި

އެފްއޭއެމް ޔޫތު ޗެމްޕިއަންޝިޕްގައި ޓީސީ ސްޕޯޓްސް ކްލަބް ބަލިކޮށް ކުލަބް އީގަލްސްއިން ފައިނަލުގެ ފުރަތަމަ ޖާގަ ހޯދައިފިއެވެ.

ގައުމީ ފުޓުބޯޅަ ދަނޑުގައި ބުދަ ދުވަހުގެ ހަވީރު ކުޅުނު މެޗު އީގަލްސްއިން ކާމިޔާބުކުރީ 1-0 ގެ ނަތީޖާއަކުންނެވެ.

މި މެޗު ފަށައިގެން އީގަލްސްއިން ފުރަތަމަ 25 މިނެޓުގެ ތެރޭގައި މުހިންމު ދެ ކުޅުންތެރިންނަށް އަނިޔާވެ، ބަދަލުކުރަން ޖެހުނެވެ. އެގޮތުން ޒައިން ޒަފަރާއި މުޙައްމަދު ރަޔާން މުއްސަދު މަންސޫރަށް އަނިޔާވެ ބަދަލުކުރިއެވެ.

މެޗުގެ ފުރަތަމަ ހާފުގައި ޓީސީން ވަނީ ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން ޓީސީގެ ކުރިއަށް ކުޅޭ އަޙްމަދު ޒައުލް ނާޒިމާއި ޔޫސުފް ޝާއިފަށް ލިބުނު ފުރުސަތުތަކުގެ ހުރަހަކަށްވީ އީގަލްސްގެ ކީޕަރު ޝައިހާން އަލީއެވެ.

ދެވަނަ ހާފުގެ ކުރީކޮޅު ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 65 ވަނަ މިނެޓުގައި ޓީސީގެ ގޯލްކީޕަރު ނައިޝަމް އަޙްމަދު ކުރިއަށް އެރި ބޯޅައެއް ހޯދައި، އީގަލްސްގެ ސަމާހު އަލީ އަށް ލިބުނު ނަމަވެސް އޭނާއަށް ރަނގަޅަށް ހަމަލާއެއް ފޮނުވައިނުލެވެނީސް ޓީސީގެ ޑިފެންޑަރު އަޙްމަދު މާއިޝް ރަޝީދު ވަނީ ދިފާއުކޮށްފައެވެ. އެކަމަކު އޭގެ އިރުކޮޅެއް ފަހުން އީގަލްސްއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ މުޙައްމަދު ސަމާޙް މޫސާ ފަތުހީއެވެ.

މި ލަނޑާއެކު ޓީސީން އެ ޓީމުގެ ކުޅުން ރަނގަޅުކޮށް އީގަލްސްގެ ހާފަށް ބާރުބޮޑުކުރިއިރު، މެޗުގެ 72 ވަނަ މިނެޓުގައި ޓީސީގެ އަޒޫމް އަލީ ފޮނުވާލި ހަމަލާ އީގަލްސްގެ ކީޕަރު ޝައިހާން ވަނީ ހުށިޔާރުކަމާއެކު ދިފާއުކޮށްފައެވެ.

އެފްއޭއެމް އިން 2011 ވަނަ އަހަރު ޔޫތު ޗެމްޕިއަންޝިޕް ބާއްވަން ފެށި ފަހުން ކުޅުނު ނުވަ މުބާރާތުގެ ތެރެއިން ހަތް ފަހަރު އީގަލްސް އިން ފައިނަލުގައި ކުޅޭނެ އެވެ. އީގަލްސް އިން ހަތަރު ފަހަރު މުބާރާތުގެ ތަށި ހޯދާފައިވާއިރު، ދެ ފަހަރު ވަނީ ފައިނަލުގައި ބަލިވެފައެވެ.

އަންނަ އަންގާރަ ދުވަހު ހަވީރު ފ. ނިލަންދޫ ޓާފް ދަނޑުގައި ކުޅޭ ޔޫތު ޗެމްޕިއަންޝިޕްގެ ފައިނަލުގައި އީގަލްސްއާ ދެކޮޅަށް ކުޅޭނެ ޓީމެއް ކަށަވަރުވަނީ ބުދަ ދުވަހުގެރޭ ކުޅޭ ސެމީ ފައިނަލުގެ ދެވަނަ މެޗަށް ފަހުގައެވެ. އެ މެޗުގައި ބައްދަލުކުރާނީ ޔުނައިޓެޑް ވިކްޓްރީ (ޔޫވީ) އާއި ސުޕަ ޔުނައިޓެޑް ސްޕޯޓްސް (ސަސް)އެވެ.