ޔޫތު ޗެމްޕިއަންޝިޕް: ވެލެންސިއާއިން ދަ ގްރާންޑޭ ކޮޅަށް 10 ލަނޑު ޖަހައިފި
ދަ ގްރާންޑޭ އަތުން މޮޅުވެ ވެލެންސިއާއިން ވަނީ ސެމީ ފައިނަލްގެ ފުރުސަތު ބޮޑުކޮށްފައި
16 އަހަރުން ދަށުގެ ޔޫތު ޗެމްޕިއަންޝިޕްގެ ތެރެއިން
އެފްއޭއެމް 16 އަހަރުން ދަށުގެ ޔޫތު ޗެމްޕިއަންްޝިޕްގައި ދަ ގްރާންޑޭއާ ދެކޮޅަށް ކުޅުނު މެޗުގައި ވެލެންސިއާއިން އެ ޓީމު ކޮޅަށް 10 ލަނޑު ޖަހައިފިއެވެ.
މުބާރާތުގައި އިއްޔެ ކުޅުނު މެޗުން ވެލެންސިއާ މޮޅުވި 1-10ންނެވެ. ފުރަތަމަ ހާފުގައި ވެލެންސިއާއިން ވަނީ ދެ ލަނޑު ޖަހާފައެވެ. އެއީ މުހައްމަދު ނާމީ ނަޒީފުއާއި މުހައްމަދު އައިހަމް އިބްރާހީމް ޖެހި ދެ ލަނޑެވެ. ވެލެންސިއާގެ އަނެއް އަށް ލަނޑު އެ ޓީމުން ޖެހީ ދެ ވަނަ ހާފުގައެވެ.
ދެ ވަނަ ހާފުގައި ވެލެންސިއާގެ މުހައްމަދު ޖޫދު އަޝްފާގާއި އަގްސަމް އަހުމަދު ނަސީމު ވަނީ ތިން ހެޓްރިކް ހަދާފައެވެ. އެ ޓީމުގެ އަނެއް ދެ ލަނޑު ޖެހީ މުހައްމަދު ނައިސަމް ނަދީމާއި އަބްދުލް އައްވަލް މައުރޫފެވެ. މި މޮޅާއެކު ވެލެންސިއާއިން ވަނީ މުބާރާތުގެ ސެމީ ފައިނަލްގެ ފުރުސަތު ބޮޑުކޮށްފައެެވެ.
މުބާރާތުގެ ކުޅުން ދެން އޮންނާނީ އާދީއްތަ ދުވަހުއެވެ. އެ ދުވަހު ހަވީރުގެ މެޗުގައި މާޒިޔާ ސްޕޯޓްސް އެންޑް ރެކްރިއޭޝަން ނުކުންނާނީ ޔުނައިޓެޑް ވިކްޓަރީއާ ދެކޮޅަށެވެ. އަދި އެ ރޭގެ މެޗުގައި ޓީސީ ސްޕޯޓްސް ކުލަބް ނުކުންނާނީ ސުޕަރ ޔުނައިޓެޑް ސްޕޯޓްސް (ސަސް)އާ ދެކޮޅަށެވެ.
