16 އަހަރުން ދަށުގެ ޔޫތް ޗެމްޕިއަންޝިޕްގައި ކުޅުނު ދެވަނަ މެޗުންވެސް މޮޅުވެ, ޓީސީ ސްޕޯރޓްސް ކްލަބް ސެމީފައިނަލްގެ ޖާގައެއް ޔަޤީންކޮށްފިއެވެ. ހަތަރު ޓީމް ހިމެނޭ ގްރޫޕްގެ އެއްވަނާގައި ޓީސީ އޮތީ ދެ މެޗުން ހަ ޕޮއިންޓް ހޯދައިގެންނެވެ.

ދެވަނަ މެޗު އާދިއްތަ ދުވަހުގެރޭ ޓީސީން ކާމިޔާބުކުރީ ސުޕަރ ޔުނައިޓެޑް ސްޕޯރޓްސް (ސަސް) އާ ވާދަކޮށް 2-1 ނެވެ. މެޗު ޓީސީން ކާމިޔާބުކުރީ ސަސްގެ ރަޒާން ހަސަން ލަނޑު ޖަހާ އެޓީމަށް ކުރި ހޯދައިދީފައިވަނިކޮށެވެ. ޓީސީއަށް ހާފް ނިމުމުގެ ކުރިން ނަތީޖާ ހަމަހަމަކޮށްދިނީ މުޙައްމަދު މާކިން އިބްރާހީމްއެވެ. ޓީސީ މެޗުން މޮޅުކޮށްދިން ލަނޑު ޖެހީ ޔޫސުފް އާއިޝް މުޙައްމަދެވެ. މެޗުގެ މޮޅު ކުޅުންތެރިއަކީވެސް އާއިޝްއެވެ.

މިގްރޫޕްގައި މާޒިޔާއާއި ޔުނައިޓެޑް ވިކްޓްރީ ވާދަކުރި މެޗު 3-1 ން ކާމިޔާބުކުރީ ޔުނައިޓެޑް ވިކްޓްރީއެވެ. މިބައްޔާއެކު ދެ މެޗުންވެސް ބަލިވެ, މާޒިޔާއަށް ފުރުޞަތު ގެއްލުނީއެވެ. މެޗުގައި ޔޫވީގެ ތިން ލަނޑުގެ ތެރެއިން ދެ ލަނޑު ޖެހީ އަހުމަދު އަޒުލާން އަލީއެވެ. އެޓީމްގެ ފުރަތަމަ ލަނޑު ޖެހީ އަހުމަދު އަލްތާފް އަޒީމްއެވެ. މާޒިޔާގެ ލަނޑު ޖެހީ ނާޝިހު އަހުމަދު ޝިހާމްއެވެ. ޔޫވީގެ ފުރަތަމަ މެޗު ނިމުނީ ސަސްއާ ވާދަކޮށް އެއްވަރުވެގެންނެވެ.