ބީޗް ފްރަންޓްގެ 26 ބިން، އެންމެ އަގުބޮޑުކޮށް ބިޑްހުށަހެޅި ފަރާތްތަކަށް ދީފި
ހުޅުމާލޭގެ ދެވަނަ ފިޔަވަހިން މާލޭގެ މީހުންނަށް 60 ބިން ވިއްކުމަށް ހަމަޖެހިފައިވޭ
ހުޅުމާލެ ބީޗް ފްރަންޓުން ދޫކުރާ ބިންތައް
ހުޅުމާލޭގެ ދެވަނަ ފިޔަވަހިން މާލޭގެ މީހުންނަށް ވިއްކަން ނިންމި ބިމުގެ ތެރެއިން އެންމެ އަގުބޮޑުކޮށް ބިޑްހުށަހެޅި 26 ފަރާތައް ބިން ދީފިއެވެ.
ހުޅުމާލޭގެ ދެވަނަ ފިޔަވަހިން މާލޭގެ މީހުންނަށް ވިއްކާ 60 ބިމުގެ ތެރެއިން ބީޗް ފްރަންޓްގެ 26 ބިމަށް 211 މީހަކު ބުދަ ދުވަހު ބީލަން ހުށަހެޅި ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެެއެވެ. އެޗްޑީސީން ބީލަން ހުށަހަޅަން ހުޅުވައިލީ ބުދަ ދުވަހުގެ ހެނދުނު 9:00ން މެންދުރު 12:00އާ ހަމައަށެވެ.
ބީޗް ފްރަންޓުން ގޯތި ގަތުމަށް ހުށަހެޅޭނެ އެންމެ ދަށް އަގު ކަމަށް އެޗްޑީސީން ކަނޑައަޅާފައި ވަނީ އަކަފޫޓަކަށް 3،900 ރުފިޔާއެވެ. އަދި ބީލަން ފޯމު ވިއްކުމަށް ހަމަޖެހިފައި ވަނީ 500 ރުފިޔާއަށެވެ. އެޗްޑީސީން ބުނީ، ބީލަމުގެ ބިޑް ސެކިއުރިޓީގެ ގޮތުގައި 320،000 ރުފިޔާ ކޮންމެ ފަރާތަކުން ވެސް ދައްކާފައިވާކަމަށެވެ. ހުޅުމާލޭ ދެވަނަ ފިޔަވަހިން ގޯތި ވިއްކުމަށް ހުޅުވާލީ، 1،603.07 (އެއްހާސް ހަސަތޭކަ ތިނެއް ޕޮއިންޓް ހަތެއް) އަކަފޫޓާ 2،633.82 (ދެހާސް ހަސަތޭކަ ތިރީސްތިނެއް ޕޮއިންޓް އަށެއް ދޭއް) އަކަފޫޓާ ދެމެދުގެ ބިމެވެ. މީގެ ތެރޭގައި ހިމެނެނީ އަތިރިމަތިން 26 ގޯއްޗާއި، އަތިރިމައްޗާ ކައިރިން 34 ގޯއްޗެވެ.
އެޗްޑީސީން ބުނީ މިފަހަރު ބިން ގަންނަން ހުޅުވާލި ފުރުސަތުގައި, އަލަށް ބިން ގަންނަ ފަރާތްތަކަށް ޚާއްސަ އިސްކަމެއް ދީފައިވާ ކަމަށެވެ. އަދި މާލެ ސަރަހައްދުގައި ދިރިއުޅުމަށް 600 އަކަފޫޓަށްވުރެ ބޮޑު ބިމެއް ނުވަތަ ގޯއްޗެއް ރަޖިސްޓްރީ ކުރެވިފައި ނުވާ މީހުންނަށް ވެސް އިސްކަންދީފައިވާކަމަށެވެ.
އަތިރިމަތީ ކައިރި އެހެން ސަރަހައްދުތަކުން ވިއްކުމަށް ހަމަޖެހިފައިވާ 34 ގޯތީގެ ބީލަން ހުޅުވާލުން އޮންނާނީ މިމަހުގެ 16 ވަނަ ދުވަހުއެވެ.
