ހުޅުމާލޭ ބީޗް ފްރަންޓުން ވިއްކާ 26 ގޯއްޗަށް 211 ބީލަން
9 ފެބުރުއަރީ 2022 | ބުދަ 09:02ބީލަން ކެނޑުން ކުރިއަށް ދަނީ ހ. މީރުމާގެ ދެވަނަ ވަނަ ފަންގިފިލާގައި
ހުޅުމާލެ ފޭސް 2
ހުޅުމާލޭގެ ދެވަނަ ފިޔަވަހިން މާލޭގެ މީހުންނަށް ވިއްކާ 60 ބިމުގެ ތެރެއިން ބީޗް ފްރަންޓްގެ 26 ބިމަށް 211 މީހަކު ބުދަ ދުވަހު ބީލަން ހުށަހެޅި ކަމަށް ހައުސިންގ ޑިވަލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެޗްޑީސީން ބީލަން ހުށަހަޅަން ހުޅުވައިލީ ބުދަ ދުވަހުގެ ހެނދުނު 9:00 އިން މެންދުރު 12:00އާ ހަމައަށެވެ. އަދި މިހާރު ބީލަން ކެނޑުން ކުރިއަށް ދަނީ ހ. މީރުމާގެ ދެވަނަ ވަނަ ފަންގިފިލާގައެވެ.
ބީޗް ފްރަންޓުން ގޯތި ގަތުމަށް ހުށަހެޅޭނެ އެންމެ ދަށް އަގު ކަމަށް އެޗްޑީސީން ކަނޑައަޅާފައި ވަނީ، އަކަފޫޓަކަށް 3،900 ރުފިޔާއެވެ. އަދި ބީލަން ފޯމު ވިއްކުމަށް ހަމަޖެހިފައި ވަނީ 500 ރުފިޔާއަށެވެ.
މީގެ އިތުރުން އެޗްޑީސީން ބުނީ، ބީލަމުގެ ބިޑް ސެކިއުރިޓީގެ ގޮތުގައި ނަގާނީ 320،000 ރުފިޔާ ކަމަށެވެ.
އެޗްޑީސީން ބުނީ މިފަހަރު ބިން ގަންނަން ހުޅުވާލި ފުރުސަތުގައި އަލަށް ބިން ގަންނަ ފަރާތްތަކަށް ޚާއްސަ އިސްކަމެއް ދޭނެ ކަމަށެވެ. އަދި މާލެ ސަރަހައްދުގައި ދިރިއުޅުމަށް 600 އަކަފޫޓަށްވުރެ ބޮޑު ބިމެއް ނުވަތަ ގޯއްޗެއް ރަޖިސްޓްރީ ކުރެވިފައި ނުވާ މީހުންނަށް ވެސް އިސްކަންދޭނެ ކަމަށް ވެސް އެ ކުންފުނިން ބުނެއެވެ.
މި 60 ގޯތީގެ ތެރެއިން ބީޗް ސައިޑުން ވިއްކާ ބިންތަކަށް ބީލަން ފޯމު ހުށަހެޅުމަށް ހަމަޖެހިފައި ވަނީ އަންނަ ހަފުތާގެ ބުދަ ދުވަހުގައެވެ.
