ޓޫރިޒަމް އަޕްބީޓް ޓޯކް ޝޯ ސިލްސިލާގެ ފުރަތަމަ ސެޝަން މިމަހު ފަށަނީ

ޓޫރިޒަމްގެ 50 އަހަރު ފާހަގަކުރުމުގެ ގޮތުން މިނިސްޓްރީ އޮފް ޓޫރިޒަމް އާއި ޓޫރިޒަމް އިންޑަސްޓްރީ އާއި ގުޅިގެން ބާއްވާ ތަފާތު އިވެންޓްތަކުގެ ތެރެއިން މުހިންމު އިވެންޓެއް ކަމަށްވާ ޓޫރިޒަމް އަޕްބީޓް ޓޯކް ޝޯ ސިލްސިލާގެ ފުރަތަމަ ސެޝަން ފެބްރުއަރީ 17 ގައި ފަށާނެއެވެ.

މި ސިލްސިލާ ފެށުމުގެ ގޮތުން ބާއްވާ ސެޝަންގެ ޕެނަލިސްޓުންގެ ގޮތުގައި ބައިވެރިވެވަޑައިގަންނަވާނީ ފަތުރުވެރިކަމުގެ ޕައަރނިއަރުންގެ ގޮތުގައި ފާހަގަކޮށްލެވޭ މަޓީގެ ޗެއަރމަން މުޙައްމަދު އުމަރު މަނިކު، މިނިސްޓަރ އޮފް ހެލްތު އަޙްމަދު ނަސީމް، މަޓީގެ ވައިސް ޗެއަރމަން ހުސެއިން އަފީފް، އަދި އިޓަލީވިލާތުގެ ޖޯޖް ކޯބިން އެވެ. މި ޓޯކް ޝޯގައި ރާއްޖޭގެ ފަތުރުވެރިކަން ފެށުނު ގޮތާއި 50 އަހަރު ތެރޭގައި ފަތުރުވެރިކަމަށް އައި ބަދަލުތަކުގެ މައްޗަށް ޕެނެލިންސްޓުން ވާހަކަދައްކަވާނެއެވެ.

ދިވެހިރާއްޖެއަށް ފުރަތަމަ ޓުއަރ ގްރޫޕެއް ޖޯޖް ކޯބިން ގެނައީ 16 ފެބްރުއަރީ 1972 ގައެވެ. ފެބްރުއަރީ 17 ވާ ބުރާސްފަތި ދުވަހު 16:00 ގައި މޯލްޑިވްސް ނެޝަނަލް ޔުނިވަރސިޓީގެ އޮޑިޓޯރިއަމްގައި ބާއްވާ ޓޯކް ޝޯ ޕްރެސެންޓްކޮށް ދެއްވާނީ މިނިސްޓަރ އޮފް ޓޫރިޒަމް ޑރ. ޢަބްދުﷲ މަޢުޞޫމް އެވެ. އަދި މި ޓޯކް ޝޯ ވަގުތުން ދުރަށް ދެއްކޭނެއެވެ. މި ޓޯކް ޝޯ ޚާއްޞަ ކުރެވިފައިވަނީ ސްކޫލް އަދި ޔުނިވަރސިޓީ ކުދިންނަށް ވިޔަސް ޢާންމުންނަށްވެސް މި ޝޯގައި ބައިވެރިވުމުގެ ފުރުޞަތު ވަނީ ހުޅުވާލާފައެވެ.

މި ޓޯކް ޝޯގައި ބައިވެރިވުމަށް އޮޑިޓޯރިއަމްއަށް ވަދެގެން އެފަރާތްތަކުން ލިންކެއް މެދުވެރިކޮށް ރަޖިސްޓްރީ ކުރަންޖެހޭ ކަމަށާއި ރަޖިސްޓްރީ ކުރާ ތަރުތީބަށް ބަލައިގެން އޮޑިޓޯރިއަމްގައި ޖާގަ އޮތް މިންވަރުން އޮޑިޓޯރިއަމްއަށް ވަނުމުގެ ފުރުޞަތު ދެވޭނެއެވެ.