ހުޅުމާލޭ ބީޗް ފްރަންޓުން ވިއްކާ 26 ގޯތީގެ ބީލަން ހުށަހެޅުން އަންގާރަ ދުވަހު
8 ފެބުރުއަރީ 2022 | އަންގާރަ 17:47ބީލަން ފޯމު ބަލައިގަތުން އޮންނާނީ އަންގާރަ ދުވަހުގެ ހެނދުނު 9:00އިން 12:00އަށް، ހ. މީރުމާ އިވެންޓްސްގެ ފަސްވަނަ ފަންގިފިލާގައި
ހުޅުމާލޭ ދެވަނަ ފިޔަވަހި
ހުޅުމާލޭ ބީޗް ފްރަންޓުން ވިއްކާ 26 ގޯތީގެ ބީލަން ހުށަހެޅުން އަންގާރަ އޮންނާނެ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ
ހުޅުމާލޭ ދެވަނަ ފިޔަވަހިން 60 ގޯތި ވިއްކުމަށް އެޗްޑީސީން ހުޅުވާލީ ޑިސެމްބަރ މަހުގެ 27 ވަނަ ދުވަހުއެވެ. އެއީ ބީޗް ފްރަންޓްގެ 26 ގޯއްޗާއި ބީޗް ސައިޑްގެ 34 ގޯތި ވިއްކުމަށެވެ.
އޭގެ ތެރެއިން އަންގާރަ ދުވަހު ބީލަމަށް ހުށަހެޅުން އޮންނާނީ ބީޗް ފްރަންޓްގެ ގޯތިތަކަށެެވެ.
އެޗްޑީސީން ބުނީ ބީލަން ފޯމު ބަލައިގަތުން އޮންނާނީ އަންގާރަ ދުވަހުގެ ހެނދުނު 9:00އިން 12:00އަށް, ހ. މީރުމާ އިވެންޓްސްގެ ފަސްވަނަ ފަންގިފިލާގައި ކަމަށެވެ. އަދި ބީލަން ފޯމު ހުޅުވުން އޮންނާނީ މެންދުރު 13:00 ގައި، ހ. މީރުމާ އިވެންޓްސްގެ ފަސްވަނަ ފަންގިފިލާގައެވެ.
ކޮންމެ ބީލަން ފޯމަކާއެކު، ބީލަން ހުށަހެޅުމުގައި ބައިވެރިވެވޭނީ އެކަކަށް ކަމަށާއި ބީލަމަށް ހާޒިރުވާ މީހުން ހުރިހާ ވަގުތެއްގައިވެސް މާސްކު އަޅައި ގައިދުރުކަން ބެހެއްޓުމަށް އެޗްޑީސީން ވަނީ އިލްތިމާސް ކޮށްފައެވެ.
ބިޑް ހުށަހަޅާ މީހާގެ ބަދަލުގައި އެހެން މީހަކު ބީލަން ފޯމު ހުށަހަޅަން ދާނަމަ ޕަވަރ އޮފް އެޓަރނީ ގެންދިއުމަށް އެޗްޑީސީން ވަނީ ހަނދާންކޮށްދީފައެވެ.
ބީޗް ފްރަންޓުން ގޯތި ގަތުމަށް ހުށަހެޅޭނެ އެންމެ ދަށް އަގު ކަމަށް އެޗްޑީސީން ކަނޑައަޅާފައި ވަނީ، އަކަފޫޓަކަށް 3،900 ރުފިޔާއެވެ. އަދި ބީލަން ފޯމު ވިއްކުމަށް ހަމަޖެހިފައި ވަނީ 500 ރުފިޔާއަށެވެ.
މީގެ އިތުރުން އެޗްޑީސީން ބުނީ، ބީލަމުގެ ބިޑް ސެކިއުރިޓީގެ ގޮތުގައި ނަގާނީ 320،000 ރުފިޔާ ކަމަށެވެ.
އެޗްޑީސީން ބުނީ މިފަހަރު ބިން ގަންނަން ހުޅުވާލި ފުރުސަތުގައި އަލަށް ބިން ގަންނަ ފަރާތްތަކަށް ޚާއްސަ އިސްކަމެއް ދޭނެ ކަމަށެވެ. އަދި މާލެ ސަރަހައްދުގައި ދިރިއުޅުމަށް 600 އަކަފޫޓަށްވުރެ ބޮޑު ބިމެއް ނުވަތަ ގޯއްޗެއް ރަޖިސްޓްރީ ކުރެވިފައި ނުވާ މީހުންނަށް ވެސް އިސްކަންދޭނެ ކަމަށް ވެސް އެ ކުންފުނިން ބުނެއެވެ.
މި 60 ގޯތީގެ ތެރެއިން ބީޗް ސައިޑުން ވިއްކާ ބިންތަކަށް ބީލަން ފޯމު ހުށަހެޅުމަށް ހަމަޖެހިފައި ވަނީ އަންނަ ހަފުތާގެ ބުދަ ދުވަހުގައެވެ.
