އަޅުގަނޑުމެންގެ ތެރޭގައި ތިބި ވިސްނޭ މީހުން ފިތުނަ ފަސާދަ ހުއްޓާލައި, ރައްޔިތުންނަށް ރަނގަޅުގޮތް ހޯދައިދޭން ނައިބު ރައީސް ފައިސަލް ނަސީމް ގޮވާލައްވައިފިއެވެ.

އެމަނިކުފާނު މިހެން ގޮވާލެއްވީ ހުޅުމާލެ މަސްވެރިންގެ މައިޒާން ރަސްމީގޮތުން ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ނައިބު ރައީސް ވިދާޅުވީ ރައްޔިތުންގެ ތެރޭގައި ހިތްހަމަ ނުޖެހުންތަކެއް އެބަހުރި ކަމަށެވެ. އަދި ކުރިން ކަންކަން ކުރިއަށްދިޔައީ ޕްލޭންކުރެވި, ރޭވިގެން ނޫން ކަމަށާއި، ނަމަވެސް ރައީސް ޚާއްސަ ސަމާލުކަމެއް ދީގެން ޕްލޭންކުރެވިގެން ކުރައްވާ ކަންކަމުގެ ފައިދާ އެތައް ބަޔަކަށް މިހާރު ލިބިގެންދާނެ ކަމަށެވެ. އަދި ހިތް ހަމަ ނުޖެހިގެން ފާޅުކުރާ ކަންކަން ބަލައިގަނެ އެކަންކަން ރަނގަޅު ކުރުން އެއީ ސަރުކާރުގެ އަމާޒު ކަމަށާއި، ހުޅުމާލެ އާ ސިޓީއެއްގެ ގޮތުގައި ތަރައްގީވެގެން އަންނަ އިރު އެކިއެކި ކަންކަން އެކިއެކި ދާއިރާތަކަށް އަމާޒުކޮށްގެން ޕްލޭން ކުރެވިފައިވާ ކަމަށެވެ.

ނައިބު ރައީސް ވިދާޅުވީ މި އަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރައީސްގެ ރިޔާސީ ބަޔާނުގައި ވިދާޅުވިފަދައިން މާލެ ސަރަހައްދުގެ ރައްޔިތުންނަށް ގޯތި ދެއްވާނެ ކަމުގެ ވާހަކަފުޅު ދެއްކެވި ކަމަށެވެ. އަދި އަޅުގަނޑުމެންގެ ތެރޭގައި ތިބި ވިސްނޭ މީހުން ފިތުނަ ފަސާދަ ހުއްޓާލަން ޖެހޭ ކަމަށާއި، ކުރިން އަތުގައި އެ ބާރު އޮވެގެން ކަންކަން ނުކުރެވުނު ފަރާތްތަކުން ވެސް ރައްޔިތުންނަށް ހެޔޮގޮތް އެދޭނަމަ އެ ކަންތައް ކުރެވޭނެ ގޮތްތައް ހޯދުމަށްޓަކައި މަސައްކަތް ކުރަން ޖެހޭ ކަމަށެވެ. ފިތުނަ ފަސާދަ އުފެއްދުމާއި ރުޅިވެރިކަން އުފެއްދުމަކީ އަޅުގަނޑުމެން ދޫކޮށްލަން ޖެހޭ ކަންކަން ކަމަށާއި، އިރާދަ ކުރެއްވިޔާ މި ސަރުކާރުން އެކަންކަން ވެސް ކުރާނެ ކަމަށް ނައިބު ރައީސް ވިދާޅުވިއެވެ.

ނައިބު ރައީސް ވިދާޅުވީ ހުޅުމާލޭ ފޭސް 2ގައި ވަޒަންވެރިވެގެން ވަރަށް ގިނަ ބަޔަކު ދިރިއުޅެން ފަށާފައިވާ ކަމަށެވެ. އެފަރާތްތަކަށް ފަސޭހަވާނެ ކަންތައްތައް ކުރަމުން ރާވަމުން އަންނަ އިރު، އެކަންތައްތައް ކުރިއަށްދާނެ ކަމަށެވެ. އަދި ރައީސް ސޯލިހުގެ ސަރުކާރު އައިސް މިއޮތީ ރައްޔިތުންނަށް ޚިދުމަތް ކުރުމަށް ކަމަށެވެ. އަދި ރައްޔިތުންނަށް ފަސޭހަކުރުމަށްޓަކައި, ދޫކޮށްލާނެ އެއްވެސް ކަމެއް ނޯންނާނެ ކަމަށެވެ. އެގޮތުން އަޅުގަނޑުމެންގެ ވަރަށްބޮޑު ބޭނުމަކަށް އަދި އަމާޒަކަށްވީ ނުކުޅެދުންތެރިކަން ހުންނަ ފަރާތްތަކަށް ހުޅުމާލެ ހޮސްޕިޓަލުން ރަނގަޅު ފެންވަރުގެ ފަރުވާ ލިބޭނެ ތަނެއް ބިނާކޮށް, އެ މަސައްކަތް ފެއްޓެވުން ކަމަށެވެ. އަދި މިއަދު އެތަން ވަނީ ދުނިޔޭގެ ފެންވަރުގެ ތަނެއްގެ ގޮތުގައި ހަދައި ހުޅުވަން ތައްޔާރުވެފައި ކަމަށާއި، މިކަމުގެ ސަބަބުން ފަސޭހަކަމެއް އެ އާއިލާތަކަށް ލިބިގެންދާނެ ކަމަށް އެމަނިކުފާނު ވިދާޅުވިއެވެ.

ނައިބު ރައީސް ވިދާޅުވީ ވައުދު ފުއްދުމުގައާއި ރާއްޖޭގެ ތަރައްގީގެ މަޝްރޫއު ކުރިއަށް ގެންދިއުމުގައި މި ސަރުކާރު މެދުނުކެނޑި މަސައްކަތްތައް ކުރާނެ ކަމަށެވެ. މިކަންކަން ކުރަމުން ދަނީ ވަރަށް އުނދަގޫ ދަނޑިވަޅެއްގައި ކަމަށާއި، ކައިރި ގައުމުތަކާއި ދުރު ގައުމުތަކަށް ބަލާލި ނަމަވެސް ފެންނަނީ ދިމާވި ކަންތައްތަކާހުރެ ގައުމުގެ ބޯޑަރު ބަންދުވެ މުޅިން ހުއްޓި އަދިވެސް ނުހުޅުވިގެން އުޅޭތަން ކަމަށެވެ. ނަމަވެސް ރައީސްގެ ވިސްނުންފުޅާއެކު އަޅުގަނޑުމެންނަށް މިވަނީ ގައުމު ހުޅުވާލެވި އާންމު ހާލަތަކަށް ގެނެވުމުގެ މަގުމަތީގައި ކަމަށެވެ. ނައިބު ރައީސް ވަނީ ހުރިހާ އެންމެން ގުޅިގެން މިއަދު މަސައްކަތް ކޮށް، ޚާއްސަކޮށް އިގުތިސާދު ކުރިއެރުވުމަށްޓަކައި ގަދައަޅައި މަސައްކަތް ކުރުމަށް އެދިވަޑައިގެންފައެވެ.