ޕީއެސްއެމްގެ އޮޑިޓް ރިޕޯޓުގައި ހުރި މައްސަލަތައް މަޖިލީހުގެ އެސްއޯއީ ކޮމިޓީން ބަލާނެ
އަތް ނުލެވޭ ހަރު މުދަލުގެ ގޮތުގައި ބައެއް ތަކެތި ރެކޯޑު ކޮށްފައިވީ ނަމަވެސް، އެކަން ރެކޯޑުތަކުން ސާފުވާކަށް ނެތް
އެސްއޯއީ ކޮމިޓީގެ ބައްދަލުވުމެއްގެ ތެރެއިން- ފޮޓޯ: ޔޫސުފް ސޮފްވާން
ދައުލަތުގެ މީޑިއާ (ޕީއެސްއެމް) ގެ އޮޑިޓް ރިޕޯޓުގައި ފާހަގަވެފައިވާ މައްސަލަތައް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމިޓީން ބަލާނެކަމަށް އެ ކޮމިޓީން ބުނެފިއެވެ.
ޕީއެސްއެމްގެ 2017، 2018 އަދި 2019 ވަނަ އަހަރުގެ އޮޑިޓް ރިޕޯޓު އޮޑިޓަރ ޖެނެރަލް އޮފީހުން ވަނީ އާންމުކޮށްފައެވެ. އެގޮތުން 28 އޭޕްރީލް 2015 ގައި މޯލްޑިވްސް ބްރޮޑްކާސްޓިންގ ކޯޕަރޭޝަން (އެމްބީސީ) ގެ ހުރިހާ އެސެޓަކާއި މިލްކިއްޔާތެއް ޕީއެސްއެމްގެ ނަމަށް ބަދަލުކޮށްފައިވީނަމަވެސް، މި މުއާމަލާތާއި ގުޅޭ އެކަށީގެންވާ ތަފްސީލުތައް ލިބިފައިނުވާތީ އެކަމާއި ގުޅިގެން ނުކުންނަ މާލީ ނަތިޖާތައް މުޅިން ދެނެގަނެވިފައިނުވާކަމަށް އޮޑިޓް ރިޕޯޓުގައި ބަޔާން ކޮށްފައިވެއެވެ.
އޮޑިޓް ރިޕޯޓުގައި ބަޔާންކޮށްފައިވާ ގޮތުން 31 ޑިސެމްބަރު 2019 ގެ ނިޔަލަށް އާމްދަނީގެ ގޮތުގައި 22 މިލިއަނަށްވުރެ ގިނަ ރުފިޔާ ވަނީ ރެކޯޑު ކޮށްފައެވެ. އަދި ފިނޭންސުން ބަޖެޓް އެހީގެ ގޮތުގައި 129 މިލިއަނަށްވުރެ ގިނަ ރުފިޔާ ލިބިފައިވާކަން އޮޑިޓް ރިޕޯޓުން އެނގެއެވެ. ހަމައެއާއެކު، ޚަރަދުގެ ގޮތުގައި 111 މިލިއަނަށްވުރެ ގިނަ ރުފިޔާ ރެކޯޑު ކޮށްފައިވާއިރު، އޭގެ ތެރޭގައި އިދާރީ ޚަރަދުގެ ގޮތުގައި ހިމެނޭ 71 މިލިއަން ރުފިޔާއާއި، މާކެޓިންގ ޚަރަދުގެ ގޮތުގައި ބަޔާންކޮށްފައިވާ 23 ހާހަށްވުރެ ގިނަ ރުފިޔާ ހިމެނެއެވެ.
އެހެން ނަމަވެސް، ޚަރަދާއި އާމްދަނީ އާއި ގުޅޭ މި އަދަދުތައް ކުންފުނީގައި ހުރި މާލީ ލިޔެކިޔުންތަކުން ސާފުނުވާކަން އޮޑިޓުގައި ފާހަގަކޮށްފައިވެއެވެ. އެގޮތުން ކުންފުނިން މާލީ ލިޔެކިޔުންތަކުގެ ރެކޯޑު ރަނގަޅަށް ފުރިހަމައަށް ބަލަހައްޓާފައި ނުވާކަން މި 3 އަހަރުގެ އޮޑިޓް ރިޕޯޓުންވެސް ފާހަގަވެފައިވެއެވެ.
އޭގެ އިތުރުން، އަތް ނުލެވޭ ހަރު މުދަލުގެ ގޮތުގައި ބައެއް ތަކެތި ރެކޯޑު ކޮށްފައިވީނަމަވެސް، އެއާގުޅޭ ލިއެކިއުންތަކެއްވެސް ރެކޯޑުތަކުން ސާފުވާކަށް ނެތެވެ. އެ ތަކެތީގެ އަގުވެސް 2 މިލިއަނަށްވުރެ ބޮޑެވެ.
ޕީއެސްއެމްގެ އޮޑިޓް ރިޕޯޓާއި ގުޅޭގޮތުން ރާއްޖެއެމްވީން ސުވާލުކުރުމުން އެސްއޯއީ ކޮމިޓީގެ މުޤައްރިރު ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވީ، އޮޑިޓަރ ޖެނެރަލް އޮފީހުގެ އޮޑިޓް ރިޕޯޓާއި ގުޅިގެން ޕީއެސްއެމްގެ އިންޓަރނަލް އޮޑިޓް ހޯދުމުގެ މަސައްކަތް ކޮމިޓީން ކޮށްފައިވާ ކަމަށެވެ. އެގޮތުން ކުންފުނީގެ ބޯޑުން އެކުލަވާލާފައިވާ އިންޓަރނަލް އޮޑިޓު މަޖިލިސް ޗުއްޓީއަށް ދިއުމުގެ ކުރިން ލިބިފައިވާކަން މެމްބަރު އިލްޔާސް ފާހަގަ ކުރެއްވިއެވެ.
އިލްޔާސް ވިދާޅުވީ، މަޖިލިސް ކޮމިޓީގެ މަސައްކަތްތައް އަލުން ފެށުމާއެކު އެ އޮޑިޓް ރިޕޯޓުތައް ރިވިއު ކުރުމުގެ މަސައްކަތްތައް ކޮމިޓީން ކުރާނެ ކަމަށެވެ. އަދި އެކަން ބައްލަވާނެކަމަށް އިލްޔާސް ވިދާޅުވިއެވެ.
ކުރީގެ ރައީސް އަބްދުﷲ ޔާމީންގެ ސަރުކާރު ބަދަލުވިއިރު ދައުލަތުގެ މީޑިއާ, ޕީއެސްއެމް އޮތީ 200 މިލިއަށްވުރެ ބޮޑު އަދަދަކުން ދަރަނިވެފައިވެފައެވެ.
