މޫސުމަށް އަންނަ ބަދަލުތައް ކުޑަކުރުމަށް ދުނިޔޭގެ ގަައުމުތަކުން ޕެރިހުގައިވި އެއްބަސްވުމުން އެމެރިކާ ކުއްލިއަކަށް ބޭރުވުމަކީ އެގައުމުން ފަހަތަށް އެޅިފިޔަވަޅެއްކަމަށް ރާއްޖެއިން ބުނެފިއެވެ.

ރައީސް ޔާމީންގެ ނަންފުޅުގައި ރާއްޖޭގެ ފޮރިން މިނިސްްޓްރީން ހުކުރު ދުވަހު ނެރެފައިވާ ބަޔާނެއްގައި ބުނެފައިވަނީ، ދުނިޔޭގެ 195 ގައުމަކުން ސޮއިކޮށްފައިވާ ޕެރިސް އެއްބަސްވުމުން ބޭރުވުމަށް އެމެރިކާގެ ރައީސް ޓްރަމްޕް ނިންމެވި ނިންމެވުމަމަކީ އެލަޔަސް އޮފް ސްމޯލް އައިލެންޑް ސްޓޭޓްސް (އެއޯސިސް) ގެ ރިޔާސަތު ބަލަހައްޓާ ގައުމެއްގެ ހައިސިއްޔަތުން ދިވެހިރާއްޖެއިން ވަރަށް ކަންބޮޑުވާ ކަމެއް ކަމަށެވެ. 

ފޮރިން މިނިސްޓްރީން ބުނެފައިވަނީ  ދިވެހިރާއްޖެއަކީ ތިމާވެށީގެ ގޮތުން ވަރަށް ނާޒުކު ފައްތަރެއްގައިވާ ގައުމެއްކަމަށެވެ. ދުނިޔޭގެ އެންމެ ބޮޑު ގައުމުން މިކަމުގައި ފަހަތުފަޔަށް ބުރަވުމަކީ، ރާއްޖެއިން ހިތާމަ ކުރާކަމެއްކަމަށާއި، ޕެރިސް އެގްރީމެންޓުން ދުނިޔޭގެ އެންމެ ބޮޑު އިގްތިސޯދު ކަމުގައިވާ އެމެރިކާ ބޭރުވުމަކީ ސީރިއަސް މައްސަލައެއްކަމަށް ދެކޭކަމަށެވެ. 

މޫސުމީ ބަަދަލުތަކަށް އެންމެ ބޮޑަށް މަގުފަހިކުރުވި ގައުމު ކަމުގައިވާ އެމަރިކާއިން، އަމިއްލަ ޒިންމާއިން ރެކެން މަސައްކަތްކުރުމަކީ ރާއްޖެއިން ނުހަނު ހިތާމަ ކުރާކަމެއްކަމަށް ވެސް ފޮރިން މިނިސްޓްރީގެ ބަޔާނުގައިވެއެވެ.

ޕެރިސް އެގްރީމެންޓް ތަންފީޒުކުރުމަށް އިތުުރު މަސައްކަތް ކުރުމަށް ރާއްޖެއިން ވަނީ ގޮވާވެސް ލައިފަ އެވެ. 

 ތިމާވެއްޓާމެދު ގައުމުތައް އިތުރަށް ހޭލުންތެރިކުރުވުމަށް، ޔޫރަޕިއަން ޔޫނިއަން އާއި ޗައިނާއިން ކްލައިމެޓް ސަމިޓެއް އަންނަ ސެެޕްޓެމްބަރު މަހު ބޭއްވުމަށް ވަނީ ނިންމާފައެވެ.

ތިމާވެއްޓަށް އަންނަ ބަދަލުތަކަށް ހޭލުންތެރިކރުވުމަށާއި، ތިމާވެށިގެ ކަންކަމުގައި ދުނިޔޭގެ ގައުމުތަކާއި ގުޅިގެން ކުރެވެން ހުރި ހުރިހާ ކަމެއް ކުރުމުގައި ރާއްޖެ އެއްބާރުލުންދީ ދެމި އޮންނާނެކަމަށް ފޮރިން މިނިސްޓްރީގެ ބަޔާނުގައިވެއެވެ.

ތިމާވެއްޓަށް ގެއްލުންދޭ ކަންކަމާއި ރާއްޖެއިން ދެކޮޅުކަން ހާމަކުރަމުން ދިޔަ ނަމަވެސް، ރާއްޖެއިން ތެޔޮހޯދުމަށް ރައީސް ޔާމީން ވެފައިވާ ވައުދަކީވެސް އެކަމުގެ ސަބަބުން ތިމާވެއްޓަށް އިންތިހާއަށް ނޭދެވޭ އަސަރު ފޯރާނެ  ކަމެއް ކަމަށް އިދިކޮޅު ފަރާތްތަކުން ކަންބޮޑުވުން ފާޅުކުރި އެވެ.