މޮޅަށް ކިޔެވި މުދައްރިސުންނާއި، މަތީތައުލީމުގެ އަގުވަޒަންކުރީ މި ސަރުކާރުން

އަބަދުވެސް ކުރާ ޝަކުވާއެއް އޮވެއެވެ. ކިތައްމެ މޮޅަށް ކިތައްމެ މައްޗަށް ކިޔެވި ނަމަވެސް އޭގެ ފައިދާއެއް ނުކުރާ ވާހަކައެވެ. އެއްމެ އުހަށް ކިޔަވައިގެން ވެސް މޮޅެއް ނުލިބޭ ވާހަކައެވެ. ރަނގަޅު ވާހަކައެކެވެ. ރާއްޖޭގެ ކަންކަން ތަރުތީބުވެ ސިޔާސީ ހަލަބޮލި ކަމުގެ ތެރެއިން މި ކަންކަން ފަނޑުވަމުން ދިޔައެވެ. އަދި ވަކި ދުވަސް ވަރެއްގައި ވަކި ކަމެއް ކުރުމުގެ ބޭނުމުގައި މިފަދަ ކަންކަމުގެ ވާހަކަ ދެކެވެއެވެ.

މިކަމުގެ ޝަކުވާ ކުރާ އެއްބަޔަކީ ތައުލީމީ ޖީލެއް ބިނާ ކުރުމަށް މަސައްކަތް ކުރާ ރާއްޖޭގެ މުދައްރިސުންނެވެ. އުނގަންނައިދެއްވުމުގެ އިތުރުން އުނގެނުމުގެ މަސައްކަތް ވެސް ބުރަކޮށް ކުރައްވާ އެ މުދައްރިސުންގެ އެއް ޝަކުވާއެއް އޮވެއެވެ. މުސާރައިގެ މައްސަލައެވެ. ކިތައްމެ ދައްކަން ބޭނުން ނުވިޔަސް އެ ޝަކުވާ އަބަދުވެސް ހިތުގައި އޮވެއެވެ. މޮޅަށް ކިޔަވައިގެން ޑީގްރީއާއި މާސްޓަރސް އަދި ޕީއެޗްޑީން ފެށިގެން ޑޮކްޓަރޭޓާއި ހަމައަށް ކިޔެވި ނަމަވެސް ވާކަމެއް ލިބޭ މޮޅެއް ނޯންނަ ވާހަކައެވެ.

ނަމަވެސް އިހައް ދުވަހަކު މުދައްރިސުންގެ އެ ސުވާލަށް ޖަވާބެއް ލިބިއްޖެއެވެ. ނުރުހުމުގެ ރާގުގައި މި ވާހަކަ ދައްކަމުން ދިޔަ މުދައްރިސުންގެ ހިތަށް ތަސައްލީއެއް ލިބިއްޖެއެވެ. އެއީ މުޅި ތައުލީމީ ނިޒާމުގައި މަސައްކަތް ކުރާ ޓީޗަރުން މުސާރައަށް އަންނާނެ ހެޔޮ ބަދަލުގެ މެސެޖާއެކުއެވެ. ވަކިން ހާއްސަކޮށް މޮޅަށް ކިޔަވައިގެން ޒަމާންތަކެއް ވަންދެން ކުރިއެރުމެއް ނުލިބި ތިބި ޓީޗަރުންނަށެވެ. ވަކިން ހާއްސަކޮށް ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރައެވެ.

މިއަހަރަށް ރައްޔިތުންގެ މަޖިލީސް ހުޅުވަން ބޭއްވި ޖަލްސާގައި ރިޔާސީ ބަޔާން އިއްވަމުން ރައީސް އިބްރާހިމް މުހައްމަދު ސޯލިހު އެންމެ ގިނައިން ފާހަގަ ކުރެއްވި އެއްކަމަކީ މިއެވެ. ތައުލީމުގެ ވާހަކައެވެ. އެމަނިކުފާނު ޓީޗަރުންނަށް ދެއްވި އުފާވެރި ހަބަރަކީ ޤައުމު ބިނާކުރުމުގެ އެންމެ ބުރަ މަސްއޫލިއްޔަތު އަދާކުރަނީ، ދަރިން ބިނާކުރާ އެދުރުންނެވެ. އެމީހުންނަށް، އެކަށީގެންވާ އުޖޫރައެއް ލިބިދިނުމަކީ ވަޢުދެއް ކަމަށާއި، އަންނަ މޭ މަހުން ފެށިގެން ތަޢުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރައްވަން ނިންމަވާފައިވާ ކަމަށެވެ. އަދި މިބަދަލާއެކު، ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ، އިތުރުގަޑި ނުލައި، 12،628 ރުފިޔާއިން 19،740 ރުފިޔާއަށް ބޮޑުވެގެންދާނެއެވެ. މިއީ 56 ޕަސެންޓްގެ ކުރިއެރުމެކެވެ.

މިއީ މީގެ ކުރިން އެއްވެސް ސަރުކާރަކުން ކޮށްދީފައި ނުވާ ކަމެކެވެ. ތައުލީމީ ދާއިރާގައި މަސައްކަތް ކުރާ މުވައްޒަފުން ވަކިން ހާއްސަކޮށް މުދައްރިސުންނަށް މުސާރަ މިހާރު ލިބޭ މުސާރައިގެ ދެބައިކުޅަ އެއްބަޔަށްވުރެ ބޮޑުކޮށް އިތުރުގަޑި ނުލާ ކޮށްދިނުމެވެ. މީގެ ކުރިން ކުރީ ޑިގްރީ ސެޓްފިކެޓެއް އޮންނަން ޖެހޭނެކަމަށް ބުނެ މަޖުބޫރެވެ. އެކަން ކޮށްގެން އިތުރު ކުރިއެރުމެއް ނުދިނެވެ.

ތައުލީމީ ދާއިރާ ހަރުދަނާ ކުރުމަކީ ރަނގަޅު ޖީލުތައް ބިނާ ކުރުމަށް ސަރުކާރުން ކުރާ މުހިންމު އެއް މަސައްކަތެވެ. ސަރުކާރުން ވަނީ ރާއްޖެއިން ބޭރުން މަތީ ތަޢުލީމް ޙާޞިލުކުރުމަށް ބޭނުންވާ 1500 އަށްވުރެ ގިނަ ދަރިވަރުންނަށް، 2021 ވަނަ އަހަރުގެ ނިޔަލަށް ސްޓޫޑަންޓް ލޯނު ދޫކޮށްފައެވެ. މިކަމުގައި މާލީ ތަނަވަސްކަން ނެތް މީހުންނާއި، ނުކުޅެދުންތެރިކަން ހުރި މީހުންނަށް ސަރުކާރުން އިސްކަންދީފައިވެއެވެ. އަދި މި ހިނގާ 2022 ވަނަ އަހަރު، މި ސްކީމްގެ ދަށުން އިތުރު 720 ފުރުޞަތު، އަންނަ ހޯމަ ދުވަހު ހުޅުވައިލެވޭނެ ކަމަށް ރައީސް ވަނީ އިއުލާން ކުރައްވާފައެވެ.

ރާއްޖެއަށް ބޭނުންވާ ތަފާތު ދާއިރާތަކުން ދިވެހި ޕްރޮފެޝަނަލުން އުފެއްދުމުގެ މަސައްކަތް ދަނީ ހިނގަމުންނެވެ. މިގޮތުން މިހާރުވެސް ދިވެހި ޑޮކްޓަރުން އިތުރުކުރުމަށް 124 ދަރިވަރުންނަށް ވަނީ ލޯނު ދޫކުރެވިފައެވެ. 1150 ޕްރޮފެޝަނަލުން އުފެއްދުމުގެ ޕްރޮގްރާމްގެ ދަށުން އައި.ސީ.ޓީ. އަދި އެކައުންޓިންގ ޕްރޮފެޝަނަލުން ބިނާކުރުމުގެ މަސައްކަތް، މި މަހުން ފެށިގެން ކުރިއަށްދާނެ ކަމަށް ރައީސް ވިދާޅުވިއެވެ. ރާއްޖޭގެ އެކި ސަރަޙައްދުގައި ޓިވެޓް ސެންޓަރުތަކާއި، ޖޫނިއަރ ކޮލެޖް އަދި ޕޮލިޓެކްނިކް ޤާއިމުކުރުމުގެ މަސައްކަތް ހިންގަމުންދާ ކަމަށާއި، ހއ. ދިއްދޫ ޖޫނިއަރ ކޮލެޖް އަދި ރ. އަލިފުށީ ޓިވެޓް ސެންޓަރު ބިނާކުރުމުގެ މަސައްކަތް މިއަހަރު ހިނގާނެ ކަމަށް ރައީސް ވިދާޅުވިއެވެ.

ކެނދިކުޅުދޫ ޖޫނިއަރ ކޮލެޖާއި، ތުލުސްދޫގެ ޕޮލިޓެކްނިކް ޢިމާރާތް ކުރުމުގެ މަސައްކަތް އިއުލާންކުރެވި ޤައުމަށްޓަކައި އެންމެ ވަރުގަދަ އުސް ބިނާއަކީ، ހެދިހުރި ދިވެހި އިންސާނާ ކަމަށް ސަރުކާރުން ގަބޫލު ކުރެއެވެ. ކުޑަ ރަށެއްގެ ދަރިވަރަކަށްވުމަކީ، ހަމަހަމަ ފުރުޞަތުން މަޙްރޫމްވާންޖެހޭ ސަބަބެއް ނޫން ކަމުގައި ދެކި ބ. ފެހެންދޫ އަދި ވ. ތިނަދޫގެ ދަރިވަރުންނަށް ސެޓެލައިޓް ސްކޫލްގެ ޚިދުމަތް، މުޅިން އަލަށް މި އަހަރު ދޭން ވަނީ ފަށާފައެވެ.

މިދިޔަ އަހަރު 4082 ޓީޗަރުންނަށް ބޭނުންވާ ތަފާތު ހުނަރާއި ތަމްރީނު އަދި 20 ޕްރިންސިޕަލަކަށް މާސްޓަރސް ފެންވަރަށް ތަމްރީނުވުމަށް ރާއްޖެއިން ބޭރުން ފުރުސަތު ދީފައިވާ އިރު އަދި އިތުރު ޕްރޮގްރާމްތައް ވަނީ ރޭވިފައެވެ.

ސްކޫލްތައް، އެއްދަންފަޅިއަށް ބަދަލުކުރުމަށް ބޭނުންވާ ޢުމްރާނީ ވަސީލަތް ބިނާކުރަމުންދާއިރު، މި ދައުރުގައި 23 ސްކޫލެއް އެއްދަންފަޅިއަށް މުޅިން އަލަށް ބަދަލުކުރެވި، ނިމިދިޔަ އަހަރު 22 ސްކޫލެއްގައި 117 ކްލާސްރޫމާއި، 6 މަލްޓިޕަރޕަސް ހޯލް ޢިމާރާތްކޮށް ނިންމާފައިވެއެވެ. އަދި އިތުރު 55 ސްކޫލެއްގައި 473 ކްލާސްރޫމާއި، 27 މަލްޓިޕަރޕަސް ހޯލުގެ މަސައްކަތް ކުރިއަށްދާއިރު، މިކަމަށް ޖުމްލަ 941 މިލިއަން ރުފިޔާ ހޭދަވެއެވެ. މިއީ ހުސް ތައުލީމީ ދާއިރާގެ ތަރައްގީއަށް ކުރާ ކަންކަމެވެ.

ކޮންމެ ގޮތެއްވިޔަސް މިކަމުގެ އެންމެ މުހިންމު ބަދަލަކީ ޓީޗަރުންގެ މުސާރައެވެ. ބޮޑުކޮށްދެއްވާނެކަމަށް އެމަނިކުފާނު ވައުދުފުޅުވެވަޑައިގެންނެވި ގޮތަށް އެ މުސާރަ ލިބޭނެކަމަށް ޓީޗަރުން ތިބީ އުއްމީދުން ފުރިފައެވެ. ސަރުކާރުން އެކަން ރަނުން ރަނަށް ކޮށްދެއްވާނެކަމަށް ޓީޗަރުން ތިބީ އުއްމީދުގައެވެ.