ކެންސަރު ބައްޔަށް ހޭލުންތެރިކަން އިތުރުކުރުމަށް މިމަހުގެ ތެރޭގައި ގިނަ ހަރަކާތްތަކެއް ކުރިއަށް ގެންދާނެ ކަމަށް ކެންސަރ ސޮސައިޓީ އޮފް މޯލްޑިވްސްއިން ބުނެފިއެވެ.

ކޮންމެ އަހަރެއްގެ ފެބްރުއަރީ މަހުގެ 4 ވަނަ ދުވަހަކީ ދުނިޔޭގެ ކެންސަރު ބަލީގެ ދުވަހުގެ ގޮތުގައި ފާހަގަކުރަމުން އަންނަ ދުވަހެވެ. އެދުވަހާއި ގުޅުވައިގެން ކެންސަރ ސޮސައިޓީން ބުނީ ޔޫނިއަން ފޮރ އިންޓަނޭޝަނަލް ކެންސަރު ކޮންޓްރޯލް (ޔޫއައިސީސީ) އިން އިސްނަގައިގެން ދުނިޔޭގެ ކެންސަރުބަލީގެ ދުވަސް ފާހަގަކުރުމަށް ކުރިޔަށް ގެންދާ ސޯޝަލް މީޑިޔާ ކެމްޕެއިން "ފަރުވާގެ ފަރަގު ކުޑަ ކުރަމާ" ޖަނަވަރީ މަހުގެ 20 ވަނަ ދުވަހުން ފެށިގެން ކުރިޔަށް ގެންދާ ކަމަށެވެ.

"ކެންސަރ ތަޖުރިބާ" މިނަމުގައި ސޯޝަލް މީޑިޔާ ކެމްޕެއިނެއް ފަށާ އެކި މީހުންގެ ކެންސަރުގެ ތަޖުރިބާތައް ހިއްސާކުރަމުންދާކަން ފާހަގަކޮށް ކެންސަރ ސޮސައިޓީން ބުނީ ކެންސަރު ބަލީގެ ދުވަހުގެ ޝިޔާރު "ފަރުވާގެ ފަރަގު ކުޑަ ކުރަމާ" އާއި ގުޅޭ ގޮތުން ފޭސްބުކް ލައިވްސްޓްރީމް ސެޝަނެއް ކުރިޔަށް ގެންދާއިރު، ކެންސަރު ބައްޔަށް ހޭލުންތެރިކުރުވުމުގެ ސެޝަނެއް ކްލަބްހައުސްގައި ކުރިޔަށް ގެންދާ ކަމަަށެވެ.

މީގެ އިތުރުން ކުޑަކުދިން ކެންސަރު ބައްޔަށް ހޭލުންތެރިކުރުވުމުގެ ގޮތުން ދިރާގާއެކު ޚާއްސަ މަސައްކަތްތަކެއް ކުރަމުންދާ ކަމަށާއި، ''އަލީގެ އެދުން'' މިނަމުގައި ލިޔެފައިވާ ކުޑަކުދިންގެ ފޮތުގެ އެނިމޭޓަޑް ފޮތް ނެރިފައިވާ ކަމަށެވެ.

ކެންސަރ ސޮސައިޓީ އޮފް މޯލްޑިވްސް (ސީއެސްއެމް) އަކީ ދިވެހިރާއްޖޭގައި ކެންސަރުޖެހުމަށް މެދުވެރިވާ ސަބަބުތަކާއި، މިބަލިން ރައްކާތެރިވުމަށް ބޭނުންވާނެ މައުލޫމާތު އާންމުންނަށް ފޯރުކޮށްދީ ހޭލުންތެރިކަން އިތުރުކުރުވައި، ކެންސަރު ބަލީގެ މީހުންނަށް އެހީތެރިކަން ފޯރުކޮށްދިނުމާއި ކެންސަރާއި ބެހޭގޮތުން ދިރާސާތައް ކުރުމާއި ތަފާސް ހިސާބު އެއްކުރުމުގެ މަގުސަދުގައި އުފައްދާފައިވާ ހިލޭ ސާބަހަށް މަސައްކަތްކުރާ ކަތްކުރާ ޖަމުއިއްޔާ އެކެވެ.