ފަހަތުން އަރައި މަހިބަދޫ ބަލިކޮށް ވެލެންސިއާއަށް މޮޅެއް
މަހިބަދޫ އަތުން ވެލެންސިއާ މޮޅުވީ 3-2 ގެ ނަތީޖާއަކުން
ވެލެންސިއާ އާއި މަހިބަދޫ ބައްދަލުކުރި މެޗުގެ ތެރެއިން
ޔޫތް ޗެމްޕިއަންޝިޕް ފުޓްބޯޅަ މުބާރާތުގައި ބުރާސްފަތި ދުވަހުގެރޭ ކުޅުނު މެޗުން މަހިބަދޫ ސްޕޯޓްސް ކުލަބު ބަލިކޮށް ކުލަބު ވެލެންސިއާއިން މޮޅަކާއެކު މުބާރާތް ނިންމާލައިފިއެވެ.
ގައުމީ ފުޓުބޯޅަ ދަނޑުގައި ކުޅުނު މެޗުން ވެލެންސިއާ މޮޅުވީ ފަހަތުން އަރައި 3-2 ގެ ނަތީޖާއަކުންނެވެ.
މި މެޗު ފަށައިގެން މަހިބަދޫން ވެލެންސިއާގެ ހާފަށް ބާރުބޮޑުކުރިއިރު، މެޗުގެ ހަވަނަ މިނެޓުގައި އެ ޓީމުން ވަނީ ލަނޑު ޖަހައި ލީޑު ނަގާފައެވެ. ވެލެންސިއާގެ ދެ ކުޅުންތެރިން ކައިރިން ނައްޓާލުމަށްފަހު މި ލަނޑު މަހިބަދޫއަށް ކާމިޔާބުކޮށްދިނީ މުޙައްމަދު އިޝްހާމްމެވެ. އަދި އޭގެ ހަތަރު މިނެޓު ފަހުން މަހިބަދޫން ވަނީ އިތުރު ލަނޑެއް ޖަހައި، ލީޑު ފުޅާކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބު ކޮށްދިނީ ހަސަން ނާއިމެވެ. މިއީ އޭރިއާ ތެރެއިން މަހިބަދޫގެ އިޝްހާމަށް ވެލެންސިއާގެ ގޯލްކީޕަރު މުޙައްމަދު އަތޫފް ރިފާއު ކުރި ފައުލަކާ ގުޅިގެން ދިން ޕެނަލްޓީއެކެވެ.
އޭގެ ފަހުން ވެލެންސިއާއިން ކުޅުން ރަނގަޅުކުރިއިރު، މެޗުގެ 14 ވަނަ މިނެޓުގައި ވެލެންސިއާއިން ވަނީ ލަނޑެއް ޖަހައި، ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަބަދުﷲ ފާސިރެވެ. އަދި މެޗުގެ ފުރަތަމަ ހާފު ނިމުމުގެ ކުރިން ވެލެންސިއާއިން ވަނީ އިތުރު ލަނޑެއް ޖަހައި، ނަތީޖާ ހަމަހަމަކޮށްފައެވެ. ފާސިރުގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ އަޙްމަދު ރާހިލް ރަޝީދެވެ.
މި މެޗުގެ ދެވަނަ ހާފު ފަށައިގެން ހަތަރުވަނަ މިނެޓުގައި ވެލެންސިއާއިން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން އާމިން އުމަރު މޫސާއެވެ. މި ލަނޑަށްފަހުވެސް ވެލެންސިއާއަށް ވަނީ ލަނޑު ޖަހަން ގިނަ ފުރުސަތުތަކެއް ލިބި ބޭކާރުވެފައެވެ.
މި ނަތީޖާއާއެކު ހަތަރު ޓީމު ވާދަކުރާ ގްރޫޕް ބީގެ އެއްވަނައިގައި އޮތީ ބުރާސްފަތި ދުވަހު ހަވީރު ކުޅުނު މެޗުން ޓީސީ ސްޕޯޓްސް ކުލަބު ބަލިކުރި ޔުނައިޓެޑް ވިކްޓަރީ (ޔޫވީ) އެވެ. ޔޫވީއަށް ކުޅުނު ތިން މެޗުން ހަތް ޕޮއިންޓް ލިބިފައިވާއިރު، ދެވަނައިގައި އޮތް ޓީސީއަށް ތިން މެޗުން ވަނީ ހަ ޕޮއިންޓް ލިބިފައެވެ. އަދި ތިންވަނައަށްދިޔަ ވެލެންސިއާއަށް ތިން މެޗުން ތިން ޕޮއިންޓް ލިބިފައިވާއިރު، މަހިބަދޫ މުބާރާތް ނިންމާލީ ޕޮއިންޓެއް ނުލިބި ގްރޫޕުގެ ފުލުގައި އޮވެގެންނެވެ. މި ގްރޫޕުން ސެމީއަށް ދަތުރުކޮށްފައިވަނީ ޔޫވީ އާއި ޓީސީއެވެ.
