ދަ ގްރާންޑޭ ބަލިކޮށް މާޒިޔާ ސެމީގެ އުއްމީދުގައި

ޔޫތު ޗެމްޕިއަންޝިޕް ފުޓްބޯޅަ މުބާރާތުގައި ބުދަ ދުވަހުގެ ހަވީރު ކުޅުނު މެޗުން ފަސޭހަކަމާއެކު ދަ ގްރާންޑޭ ސްޕޯޓްސް ކުލަބު ބަލިކޮށް ސެމީ ފައިނަލުގެ އުއްމީދު މާޒިޔާ ސްޕޯޓްސް އެންޑް ރެކްރިއޭޝަނުން ބޮޑުކޮށްފިއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗުން މާޒިޔާ މޮޅުވީ 6-0 ގެ ތަފާތު ބޮޑު ނަތީޖާއަކުންނެވެ.

މި މެޗުގައި މާޒިޔާއިން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ހަތަރުވަނަ މިނެޓުގައި އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު އިޔާން ހަސަނެވެ. އަދި އޭގެ 10 މިނެޓު ފަހުން މާޒިޔާއިން ލީޑު ފުޅާކުރިއިރު، އަޙްމަދު އުވައިސް ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ހުސެއިން ފާއިޒެވެ.

އޭގެ ފަހުން މި މެޗުގައި މާޒިޔާގެ ފަރާތުން އާދައިގެ ކުޅުމެއް ފެނިގެންދިޔައިރު، އެ ޓީމުގެ ތިންވަނަ ލަނޑު ފެނިގެންގޮސްފައިވަނީ މެޗުގެ 67 ވަނަ މިނެޓުގައެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި އިބްރާހިމް އީމާން ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އިޔާނެވެ. އަދި އޭގެ އަށް މިނެޓު ފަހުން އީމާން ދިން ޕާހަކުން މާޒިޔާގެ ހަތަރުވަނަ ލަނޑު ޖަހައިދިނީ މުޙައްމަދު މަޒީނެވެ.

ދެން މި މެޗުގައި މާޒިޔާއިން ކާމިޔާބުކުރި ފަސްވަނަ ލަނޑު ފެނިގެންގޮސްފައިވަނީ މެޗު ނިމެން އަށް މިނެޓަށް ވެފައި ވަނިކޮށެވެ. އޭރިއާ ތެެރެއިން ލިބުނު ބޯޅައިން މި ލަނޑުވެސް އެ ޓީމަށް ކާމިޔާބުކޮށްދިނީ މަޒީނެވެ. އަދި އޭގެ ހަ މިނެޓު ފަހުން މާޒިޔާއިން ހަވަނަ ލަނޑެއް ޖެހިއިރު، އޭރިއާ ތެރެއަށް ވަދެ ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޔޫޝައު ބިން އަލީ ނަޝީދެވެ.

މި މޮޅާއެކު މާޒިޔާއަށް ވަނީ ގްރޫޕް ސްޓޭޖުގެ ހަތަރު މެޗު ނިމިފައެވެ. އެއާއެކު ގްރޫޕް އޭގެ އެއްވަނައިގައި އޮތް މާޒިޔާ އާއި ދެވަނައިގައި އޮތް ކުލަބު އީގަލްސްއަށް ވަނީ ހަތް ޕޮއިންޓް ލިބިފައެވެ. އަދި މި ގްރޫޕްގެ ތިންވަަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އާއި ހަތަރުވަނައިގައި އޮތް ދަ ގްރާންޑޭއަށް ތިން ޕޮއިންޓް ލިބިފައިވާއިރު، އެންމެ ފުލުގައި އޮތް ކުލަބު ގްރީން ސްޓްރީޓްސްއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ. މި ގްރޫޕުން ސެމީގެ ދެ ޖާގައަށް ވާދަކުރަނީ އީގަލްސް އާއި މާޒިޔާ އަދި ސަސް އެވެ. ސަސްއަށް ބާކީ ދެ މެޗު އޮތްއިރު، އީގަލްސްއަށް އޮތީ އެންމެ މެޗެކެވެ.