ޕޮޒިޓިވް މީހަކާ ކޮންޓެކްޓް ވިޔަސް، ވެކްސިން ފުރިހަމަކޮށް، ބަލީގެ އަލާމަތްތައް ނެތްނަމަ ކަރަންޓީނުވާކަށް ނުޖެހޭ
1 ފެބުރުއަރީ 2022 | އަންގާރަ 11:52ޕޮޒިޓިވްވާ މީހުންގެ ކޮންޓެކްޓުން ކަރަންޓީނުކުރާ މުއްދަތަށް ވަނީ ބަދަލުގެނެސްފައި
މާލޭގެ މަގެއް- ފަހަކަށް އައިސް ފެންނަ ކޮވިޑު ކޭސްތައް ވަނީ އިތުރުވެފައި
ޕޮޒިޓިވް މީހަކާ ކޮންޓެކްޓް ވިޔަސް، ވެކްސިން ފުރިހަމަކޮށް, ބަލީގެ އަލާމަތްތައް ނެތްނަމަ ކަރަންޓީނުވާން ނުޖެހޭގޮތަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އުސޫލު އާންމުކޮށްފިއެވެ.
އަންގާރަ ދުވަހު އެޗްޕީއޭއިން ވަނީ, ޕޮޒިޓިވްވާ މީހުންގެ ކޮންޓެކްޓުން ކަރަންޓީނުކުރާ މުއްދަތަށް ބަދަލުގެނެސް، އެކަން އިއުލާނުކޮށްފައެވެ. އެގޮތުން ކޮވިޑު-19އަށް ޕޮޒިޓިވްވާ މީހުންގެ ކޮންޓެކްޓުންގެ ތެރެއިން ކޮވިޑް-19 ވެކްސިންގެ ޑޯޒްތައް ފުރިހަމަކޮށްފައިވާ މީހުން، ބަލީގެ އެއްވެސް އަލާމާތެއް ނެތްނަމަ ކަރަންޓީނުވާން ނުޖެހޭނެކަމަށް އެޗްޕީއޭއިން ބުނެއެވެ. އަދި އެފަދަ މީހުން ބަލީގެ އެއްވެސް އަލާމާތެއް ހުރިނަމަ, އެންޓިޖެން ނުވަތަ ޕީ.ސީ.އާރު ޓެސްޓު ހަދައި ނަތީޖާ ނެގެޓިވް ވެއްޖެނަމަ ކަރަންޓީނުވާން ނުޖެހޭ ގޮތަށް ބަދަލު ގެނެސްފައިވާއިރު، ނަތީޖާ ލިބެންދެން ކަރަންޓީނުގައި ހުންނަން ޖެހޭނެކަމަށް އެޗްޕީއޭއިން ބުނެއެވެ.
އެޗްޕީއޭއިން މައުލޫމާތު ދޭ ގޮތުގައި, އެގޮތުގެ މަތިން އަމަލު ކުރެވޭނީ ކޮވިޑު-19އަށް ޕޮޒިޓިވްވެފައިވާ މީހުންނާ މުޅިން ވަކިން ކަރަންޓީނުގައި ތިބޭ, ކޮންޓެކްޓު ވެފައިވާ މީހުންނަށެވެ.
އެހެންނަމަވެސް، ކޮވިޑް-19އަށް ޕޮޒިޓިވްވާ މީހުންގެ ކޮންޓެކްޓުންގެ ތެރެއިން ކޮވިޑް-19 ވެކްސިންގެ ޑޯޒްތައް ފުރިހަމަކޮށްފައިވާ މީހުން، ޕޮޒިޓިވްވި މީހާއާ އެންމެ ފަހުން ދިމާވި ތާރީޚުން ފެށިގެން 5 ދުވަސް ވުމުން ޕީ.ސީ.އާރު ޓެސްޓެއް ހަދަން ޖެހެއެވެ.
ކޮވިޑު-19އަށް ޕޮޒިޓިވްވެފައިވާ މީހުންގެ ކޮންޓެކްޓުން އެ މީހުންނާ އެކުގައި އުޅޭނަމަ އަމަލު ކުރަންޖެހޭ ގޮތްތަކެއްވެސް ވަނީ ބަޔާންކޮށްފައެވެ. އެގޮތުން ޕޮޒިޓިވްވި މީހާގެ އެކަހެރިވުމުގެ މުއްދަތު ނިމެންދެން ކަރަންޓީނުގައި ހުރުމާއި، އޭނާގެ އެކަހެރިވުމުގެ މުއްދަތު ހަމަވުމުން ޕީ.ސީ.އާރު ޓެސްޓް ހެދުން، އަދި މި ޓެސްޓުގެ ނަތީޖާ ލިބެންދެން ކަރަންޓީނުގައި ހުރުން ހިމެނެއެވެ. ނަމަވެސް ނަތީޖާ ނެގެޓިވް ވެއްޖެނަމަ އިތުރަށް ކަރަންޓީނުވާކަށް ނުޖެހޭނެއެވެ.
އެޗްޕީއޭއިން މައުލޫމާތު ދޭ ގޮތުގައި ކޮވިޑު-19ގެ ޓެސްޓުކުރުމަށް އެންޓިޖެން ޓެސްޓްގެ ސެލްފް ކިޓެއް ބޭނުންކޮށްގެން ގޭގައި ކޮވިޑް-19އަށް ޓެސްޓު ކުރަންވާނީ ކޮވިޑް-19ގެ އަލާމާތެއް ހުންނަ މީހުންނެވެ. އެންޓިޖެން ސެލްފްކިޓް ބޭނުންކޮށްގެން ޓެސްޓް ހަދާ ފަރާތްތައް ކޮވިޑް-19އަށް ޕޮޒިޓިވްވެއްޖެނަމަވެސް އެގޮތުގެ މަތިން އަމަލުކުރަންވާނެކަމަށް ބަޔާންކޮށްފައިވެއެވެ. ނަމަވެސް މި ފަރާތްތަކަށް އައިސޮލޭޝަން އަދި ކަރަންޓީން ޑޮކިއުމަންޓް ދޫކުރެވޭނީ ކޮވިޑު-19އަށް ޓެސްޓުކުރުމަށް ރަޖިސްޓަރ ކޮށްފައިވާ ލެބަކުން ނުވަތަ ސިއްހީ ފަރުވާދޭ ތަނަކުން ކޮވިޑް-19އަށް އެންޓިޖަން ނުވަތަ ޕީސީއާރް ޓެސްޓު ހެދުމުންކަމަށް އެޗްޕީއޭއިން ބުނެއެވެ.
ކޮވިޑް-19ގެ ވެކްސިންގެ ޑޯޒްތައް ފުރިހަމަވެފައިވާ ކަމުގައި ބެލެވޭނީ ދިވެހި ރާއްޖޭގައި ބޭނުން ކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީއިން ހުއްދަދީފައިވާ, ނުވަތަ ދުނިޔޭގެ ސިއްހަތު ޖަމްއިއްޔާއިން އިމަރޖެންސީ ޔޫސް ލިސްޓިންގގައި ހިމަނާފައިވާ ވެކްސިނެއްގެ ކަނޑައެޅިފައިވާ ޑޯޒްތައް ފުރިހަމަކޮށް 14 ދުވަސް ފުރިހަމަވެފައި، އަދި ދެވަނަ ޑޯޒް ޖެހުމަށްފަހު 6 މަސް ފާއިތުނުވާނަމައެވެ. އަދި ދެވަނަ ޑޯޒް ޖެހުމަށްފަހު 6 މަސް ފާއިތުވެފައިވާނަމަ، ބޫސްޓަރ ޑޯޒްފުރިހަމަކޮށްފައިވާ ނަމައެވެ.
އޭގެ އިތުރުން، މި އިއުލާނަށް އަމަލު ކުރަންފަށާއިރު ކޮވިޑު-19ގެ ވެކްސިން ޑޯޒްތައް ފުރިހަމަކޮށްފައިވާ, ކޮވިޑު-19އަށް ފައްސިވާ މީހުންގެ ކޮންޓެކްޓުންގެ ގޮތުގައި ކަރަންޓީނުކުރެވިފައިވާ ފަރާތްތައް، މި އިއުލާންގައި ބުނެފައިވާ ޝަރުތުތައް ފުރިހަމަވާނަމަ ކަރަންޓީނުގެ މުއްދަތު ނިމޭނެކަމަށް އެޗްޕީއޭއިން ބުނެއެވެ. އަދި މި އިއުލާނަށް އަމަލުކުރަން ފެށުމާ ހަމައަށް، ކޮންޓެކްޓުންގެ ގޮތުގައި އެޗްޕީއޭއަށް ރިޕޯޓު ކޮށްފައިވާ ފަރާތްތަކުގެ ކަރަންޓީނު ޑޮކިއުމަންޓް, ހާލުބެލުން ޕޯޓަލްއަށް އަޕްލޯޑް ކުރެވޭނެއެވެ.
