އިތުރު 2838 މީހުން ޕޮޒިޓިވް، އަތޮޅުތެރެއިން 1000 އަށްވުރެ ގިނަ ކޭސް

ކޮވިޑް-19 އަށް އިތުރު 2838 މީހުން ޕޮޒިޓިވްވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން ބުނީ ހޮނިހިރު ދުވަހު އިރުއޮއްސި 6:00 އިން އާދިއްތަ ދުވަހުގެ އިރުއޮއްސި 6:00 އަށް 7394 ސާމްޕަލް ނަގާފައިވާ ކަމަށެވެ. އޭގެ ތެރެއިން 3615 ސާމްޕަލް ނަގާފައިވަނީ މާލެ ސަރަހައްދުންނެވެ. މި ސާމްޕަލްތަކުގެ ތެރެއިން ޕޮޒިޓިވްވެފައިވަނީ 2838 މީހުންނެވެ. އެއީ މާލެ ސަރަހައްދުން 1295 މީހުން، އަތޮޅުތެރެއިން 1066 މީހުން، ހިންގަމުންދާ ރިސޯޓުތަކުން 49 މީހުން، ސަފާރީތަކުން 4 މީހުންނެވެ. އަދި 424 މީހުން ޕޮޒިޓިވްވެފައިވަނީ ކޮން ސަރަހައްދަކުންކަން ދެނެގަނެވިފައިނުވާ ކަމަސް އެޗްޕީއޭއިން ބުނެއެވެ.

މާލޭގެ ޕޮޒިޓިވްވިޓީ ރޭޓް 36 އިންސައްތާގައި ހުރިއިރު، 17589 އެކްޓިވް ކޭސް ހިމެނެއެވެ. އަދި 53 މީހަކަށް ހޮސްޕިޓަލްގައި ދަނީ ފަރުވާ ދެމުންނެވެ.

އެޗްޕީއޭއިން ބުނީ މިހާތަނަށް 136126 މީހުންނަށް ޕޮޒިޓިވްވެފައިވާ ކަމަށާއި، 118249 މީހުން ބަލިން ރަނގަޅުވެފައިވާ ކަމަށެވެ. އަދި 275 މީހުން ނިޔާވެފައިވެއެވެ.

ކޮވިޑް-19ގެ ހާލަތު ގޯސްވަމުންދާއިރު، މާލޭގެ އިތުރުން އަތޮޅުތެރެއިން ފެންނަ ކޭސްތަކުގެ އަދަދު ވެސް ދަނީ މަތިވަމުންނެވެ. މިހާތަނަށް އައިރު 33 ރަށެއް މޮނިޓަރިންގެ ހާލަތަށް ގެނެސްފައިވެއެވެ.

ކޮވިޑް-19 ކޮންޓްރޯލް ކުރުމަށް ފިޔަވަޅުތައް ވަރުގަދަ ނުކުރި ނަމަވެސް މިހާރު އަޅާފައިވާ ފިޔަވަޅުތަކާއި އެއްގޮތަށް އަމަލުކޮށް، ގިނަ މީހުން އެއްވެ ނޫޅުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ. އޮމިކްރޯން ވޭރިއެންޓްއާއެކު ބަލި ފެތުރޭ މިންވަރު ވަނީ އިތުރުވެފައެވެ. އެހެންކަމުން ހައިރިސްކް މީހުން އިތުރަށް ސަމާލުވުމަށް ވެސް އިލްތިމާސްކޮށްފައިވެއެވެ.