ލައިސަންސް ނެގުން ހުޅުމާލެއަށް ބަދަލުކޮށްފި
ޓްރާންސްޕޯޓް މިނިސްޓްރީން މާލެ ސިޓީ ކައުންސިލާއި ހަވާލުކޮށްގެން ހެދި ޑްރައިވިންގ ޓެސްޓް ހަދާ ސަރަހައްދުގެ 90 ޕަސެންޓް މަސައްކަތް މިހާރު ވަނީ ނިމިފައި
ހުޅުމާލޭގައި ހަދާފައިވާ ލައިސަންސް ނަގާ ސަރަހައްދު
މާލެ ސަރަހައްދުގައި ޑްރައިވިން ލައިސަންސް ނެގުމަށް ފަރިތަކުރުމާއި ޑްރައިވިންގ ޓެސްޓް ހެދުން ހުޅުމާލެ އަށް ބަދަލުކޮށްފިއެވެ.
ލައިސަންސް ނަގަން ބޭނުންވާ މީހުން ފަރިތަކުރުމާއި ޑްރައިވިންގ ޓެސްޓުތައް ކުރިން ކުރިއަށް ގެންދިޔައީ މާލޭގެ އިންޑަސްޓްރިއަލް ވިލެޖް ސަރަހައްދުގައެވެ. ނަމަވެސް ތިލަމާލެ ބްރިޖުގެ މަސައްކަތްތައް އެ ސަރަހައްދުގައި ކުރުމަށް އެ ތަން ބަންދު ކޮށްފައިވާތީ ހުޅުމާލޭގައި ޓެސްޓްތައް ހަދަން ފަށާފައިވާ ކަމަށް މާލޭ ސިޓީ ކައުންސިލުން ބުނެއެވެ.
ސިޓީ ކައުންސިލުން ބުނީ ޓްރާންސްޕޯޓް މިނިސްޓްރީން އެ ކައުންސިލާއި ހަވާލުކޮށްގެން ހެދި ޑްރައިވިންގ ޓެސްޓް ހަދާ ސަރަހައްދުގެ 90 ޕަސެންޓް މަސައްކަތް މިހާރު ނިމިފައިވާ ކަމަށެވެ.
ހުޅުމާލޭގައި ލައިސަންސް ނަގަން ދުއްވާ ތަނެއްގެ ގޮތުގައި ކަނޑައަޅާފައި ވަނީ ފިތުރޯނުގަސް މަގުގައި އެމްޕީއެލްގެ ޕޯޓާ ޖެހިގެން އޮންނަ ހުސް ބިމެވެ. މިހާރު އެ ސަރަހައްދުގައި ވަނީ ޑްރައިވިންގ ޓެސްޓް ހަދާއިރު ސަމާލުކަން ދޭން ޖެހޭ ނިޝާންތައް ކުރަހާފައެވެ. ހުޅުމާލޭގައި ތަރައްގީ ކުރާ އެ ޓްރެކުގެ މަސައްކަތް އެއްކޮށް ނިމޭއިރު ދެ ފާހާނާ އާއި ވެއިޓިން އޭރިއާ ވެސް ގާއިމުކުރެވޭނެކަމަށް ސިޓީ ކައުންސިލުން ބުނެއެވެ.
