އިނގިރޭސި ޕްރިމިއާ ލީގުގެ އެވަޓަންގެ ކޯޗަކަށް ކުރިން ޗެލްސީއަށް ކޯޗުކަން ކޮށްދިން ފްރޭންކް ލަމްޕާޑް ގެންނަން ނިންމާފައިވާ ކަމަށް މީޑިއާ ރިޕޯޓްތައް ބުނެފިއެވެ.
އެވެޓަންގެ ކޯޗުގެ މަގާމު ހުސްވެފައިވަނީ ކުރިން ކޯޗަކަށް ހުރި ރަފައެލް ބެނިޓޭޒް މި މަހުގެ 18 ވަނަ ދުވަހު މަގާމުން ވަކިކުރުމާއި ގުޅިގެންނެވެ. މީގެ ކުރިން ޗެލްސީ އާއި ލިވަޕޫލާއި ނިއުކާސަލް ޔުނައިޓެޑަށްވެސް ކޯޗުކަން ކޮށްދިން ބެނިޓޭޒްގެ މަގާމު ގެއްލުނީ އެވެޓަންގެ ކޯޗުކަމާއި ހަވާލުވިތާ 200 ދުވަސް ދުވަސް ހަމަވިފަހުންނެވެ.
ބެނިޓޭޒް ވަކިކުރުމާއި ގުޅިގެން އެވެޓަންއިން ލީގުގައި ކުޅުނު މެޗުތަކުގައި އެ ޓީމަށް އިރުޝާދުދިނީ އެސިސްޓަންޓް ކޯޗު ޑަންކަން ފާގަސަންއެވެ. އޭނާ ވަނީ މީގެ ކުރިންވެސް އެވެޓަންގެ ކޯޗުކަމުގެ ޒިންމާ ވަގުތީ ގޮތުން ނަގައިފައެވެ.
ރިޕޯޓްތައް ބުނާ ގޮތުން އެވެޓަންއިން އައު ކޯޗަކު ހޯދުމަށް ފަސް ކޯޗުން ވަނީ ޝޯޓްލިސްޓް ކޮށްފައެވެ. އެއީ ޗެލްސީގެ ކުރީގެ ކޯޗު ލަމްޕާޑްގެ އިތުރުން ޑާބީ ކައުންޓީގެ ކޯޗު ވޭން ރޫނީ އާއި ބެލްޖިއަމްގެ ކޯޗު ރޮބާޓޯ މާޓިނޭޒް އަދި ކުރިން ޕޯޗުގަލްގެ ޕޯޓޯ އާއި ތުރުކީގެ ފެނަބާޗޭއަށް ކޯޗުކަންކޮށްދިން ވިކްޓާ ޕެރޭރާއެވެ. މި ކޯޗުގެ ތެރެއިން ހަތަރު ކޯޗަކާއި އިންޓަރވިއު ކުރަން ނިންމި ނަމަވެސް އިންޓަރވިއުއަށް ހާޒިރުވެފައިވަނީ ލަމްޕާޑާއި ޑަންކަން އަދި ޕެރޭރާއެވެ.
އެވެޓަންއިން އެ ޓީމުގެ ކުރީގެ ކުޅުންތެރިޔާ ރޫނީއާވެސް އިންޓަރވިއުކުރަން ނިންމި ނަމަވެސް ޑާބީ ކައުންޓީއަށް ވަގުތު ދޭން ނިންމާ ރޫނީ ވަނީ އެވެޓަންގެ ފުރުސަތައް ނޫނެކޭ ބުނެފައެވެ.
ރިޕޯޓްތައް ބުނާ ގޮތުން އެވެޓަންގެ ބޯޑުން އެންމެ ބޮޑަށް ގެންނަން ބޭނުންވަނީ ވިކްޓާ ޕެރޭރާއެވެ. އެހެން ނަމަވެސް އެވެޓަންގެ ސަޕޯޓަރުން ވިކްޓާ ޕެރޭރާ ގެނައުމަށް ދެކޮޅެވެ. އަދި ސަޕޯޓަރުން ވަނީ އެ ޓީމުގެ ސްޓޭޑިއަމް ބޭރުގައި އިހުތިޖާޖުކޮށް އައު ކޯޗުގެ ޒިންމާ ލަމްޕާޑް އާއި ހަވާލުކުރަން ގޮވާލާފައެވެ. އެއާއިއެކު ހުކުރު ދުވަހު އެވެޓަންއިން ވަނީ ލަމްޕާޑާ ކޯޗުގެ ޒިންމާ ހަަވާލުކުރަން ނިންމާފައެވެ.
ލަމްޕާޑްގެ ކޯޗިން ކެރިޔަރު ފެށީ ޑާބީ ކައުންޓީންނެވެ. އަދި އޭގެ ފަހުން ޗެލްސީއަށްވެސް ލަމްޕާޑް ވަނީ ކޯޗުކަންކޮށްދީފައެވެ.
މީޑިއާ ރިޕޯޓްތައް ބުނާ ގޮތުން ލަމްޕާޑް އެވެޓަންގެ ކޯޗުކަމާ ހަވާލުވެ އިރުޝާދުދޭނެ ފުރަތަމަ މެޗަކީ އެފްއޭ ކަޕްގައި އެވެޓަން އިން ބްރެންޓްފޯޑާ ދެކޮޅަށް ކުޅޭ މެޗެވެ.
