އިނގިރޭސި ޕްރިމިއާ ލީގުގައި އެވަންޓަންއާ ދެކޮޅަށް ކުޅުނު މެޗުން ވެސް މޮޅުވެ، އެންމެ ފަހުގެ ޗެމްޕިއަން ލިވަޕޫލް އިން އެއް ވަނަައިގައި ހިފަހައްޓައިފި އެވެ.

ލިވަޕޫލްގެ އަމިއްލަ ދަނޑު އެންފީލްޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ލިވަޕޫލް އިން ދެ ލަނޑު ޖެހިއިރު، އެވަޓަން އިން ވަނީ ދެ ވަނަ ހާފުގައި ލަނޑު ޖަހައިފަ އެވެ.

މެޗު ފަށައިގެން ދިހަ ވަނަ މިނެޓުގައި ލިވަޕޫލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ރަޔަން ގްރެވެންބާޗް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މިޞްރުގެ ފޯވާޑު މުޙައްމަދު ޞަލާޙު އެވެ.

އޭގެ ފަހުން މެޗުގެ 29 ވަނަ މިނެޓުގައި ލިވަޕޫލް އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ހޫގޯ އެކިޓީކޭ އެވެ. އެއީ ގްރެވެންބާޗް ތަނަވަސްކޮށްދިން ފުރުސަތެއްގައި އެކިޓީކޭ ޖެހި ލަނޑެކެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު އެވަޓަން އިން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ. އެގޮތުން މެޗުގެ ދެ ވަނަ ހާފުގެ 13 ވަނަ މިނެޓުގައި އެވަޓަންގެ ހަމައެކަނި ލަނޑު ޖެހީ އިދްރީސާ ގާނާ ގުއެޔޭ އެވެ. އޭނާ އެ ލަނޑު ޖެހީ އިލިމަން ނިޑާޔޭ ތަނަވަސްކޮށްދިން ފުރުސަތެއްގަ އެވެ.

މެޗުން މޮޅުވެ ލިވަޕޫލް އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ ފަަސް މެޗުން ވެސް މޮޅުވެ، 15 ޕޮއިންޓާ އެކު އެވެ.