ލަމްޕާޑާއެކު ޗެލްސީގެ ކުޅުންތެރިންނަށް ހަރުކަށި "ޖޫރިމަނާ" ތަކެއް؟

މި ސީޒަން ނިމެންދެން ޗެލްސީގެ ކޯޗުކަމާ ހަވާލުވި ފްރޭންކް ލަމްޕާޑު ހަރުކަށި ޖޫރިމަނާތަކެއް ތައާރަފްކުރާނެ ކަމަށް އިނގިރޭސި ނޫސްތަކުން ބުނަން ފަށައިފި އެވެ.

ކުލަބުގެ ތާރީހުގައި ކުޅުންތެރިއެއްގެ ގޮތުގައި ޗެލްސީގައި ބޮޑެތި ކާމިޔާބީތަކެއް ހޯދި ކުޅުންތެރިޔާ ވަނީ މީގެ ކުރިން ވެސް ޗެލްސީ އަށް ކޯޗުކޮށްދީފަ އެވެ. އެއަށްފަހު އެވަޓަންއާ ހަވާލުވެ އެ ޓީމުން އޭނާ ބޭރުކުރިތާ ދުވަސްކޮޅެއް ފަހުން އަލުން ޗެލްސީއާ ހަވާލުވީ މީގެ ދެ ދުވަސްކުރިންނެވެ.

ޗެލްސީގެ ތާރީހުގައި އެކުލަބަށް އެންމެ ގިނަ ގޯލު ޖަހަދިން ކުޅުންތެރިޔާ ލަމްޕާޑް ޗެލްސީއަށް އެންމެ ފުރަތަމަ ކޯޗުކޮށްދިނީ 2019 ވަނަ އަހަރުން ފެށިގެން 2021އާ ހަމައަށެވެ. މި ދުވަސްވަރު އޭނާ ތައާރަފްކުރި 12 ގަވާއިދުގެ ތެރެއިން އެންމެ ހަރުކަށި އެއް ޖޫރިމަނާއަކީ ޕްރެކްޓިހަށް ގަޑިޖެހިއްޖެނަމަ 2500 ޕައުންޑުން ޖޫރިމަނާކޮށް، އިތުރަށް ހިނގާ ކޮންމެ 15 މިނިޓަކަށް ޖޫރިމަނާގެ ގޮތުގައި 2500 ޕައުންޑް ދައްކަން އެންގުމެވެ. މީގެ އިތުރުން މެޗު އޮންނަ ދުވަހު ޓީމު ހޮޓަލުން ދަނޑަށް ނައްޓާލާއިރު ގަޑިޖެހޭނަމަ އަދަބަކީ ވެސް 2500 ޕައުންޑުން ޖޫރިމަނާކުރުމެވެ.

ޖިމް ހަދާ ދުވަހު ގަޑިޖެހިއްޖެނަމަ 1000 ޕައުންޑުން ޖޫރިމަނާ ކުރާނެ އެވެ. ބޭސްފަރުވާ ނުވަތަ ޓްރީޓްމަންޓަކަށް ހާޒިރުވާން އޮންނަ ގަޑިޖެހިއްޖެ ނަމަ އެކަމަށްވެސް 2500 ޕައުންޑް ޖޫރިމަނާގެ ގޮތުގައި ދައްކަން ޖެހޭނެ އެވެ. ޓީމް މީޓިންއަކަށް ގަޑިޖެހިއްޖެނަމަ ޖޫރިމަނާކުރަން ނިންމީ ކޮންމެ މިނިޓަކަށް 500 ޕައުންޑުގެ ރޭޓުންނެވެ.

ޓީމުގެ ހުރިހާ އެންމެން އެއްކޮށް ކާގަޑިތަކުގައި ފޯނު ރިންގުވެއްޖެނަމަ އެމީހަކު 1000 ޕައުންޑުން ޖޫރިމަނާވާނެ އެވެ. ޓީމުގެ ހަރަކާތްތަކުގައި ބޭނުންކުރުމަށް ދީފައިވާ އަންނައުނު ނޫން އެއްޗެއް ލައިގެން އަތުވެއްޖެނަމަ އެކުޅުންތެރިއަކު 1000 ޕައުންޑުން ޖޫރިމަނާވާނެ އެވެ. އަދި 24 ގަޑިއިރު ކުރިން ވަކިއެއްޗެއް ނާންގައި ޓީމުގެ ކޯޗިން ސްޓާފަކު ހާޒިރުނުވެއްޖެނަމަ އެމީހަކު 5000 ޕައުންޑުން ޖޫރިމަނާވާނެ އެވެ.

ޗެލްސީން ރާވާ އިޖްތިމާއީ ހަރާކާތްތަކުގައި ބައިވެރިވާން ދެކޮޅު ހަދައިފިނަމަ ވެސް 5000 ޕައުންޑުން ޖޫރިމަނާ ކުރެ އެވެ. ބަލިވެ، ނުވަތަ އިންޖަރީއެއްވެ އެކަން އެންމެ ލަސްވެގެން އެއްގަޑި 30 މިނިޓް ކުރިން ނާންގައިފިނަމަ ޖޫރިމަނާކުރަން ނިންމީ 10000 ޕައުންޑުންނެވެ. ޑޮކްޓަރަކަށް ދައްކަން އޮންނަ ގަޑިޖެހިއްޖެނަމަ 2500 ޕައުންޑުން ޖޫރިމަނާކުރަން ވެސް ނިންމި އެވެ.

ޖޫރިމަނާކޮށްގެން ލިބޭ ފައިސާ ހަރަދުކުރަން ނިންމާފައިވަނީ ކުލަބުގެ ހަރަކާތްތަކަށާއި ހިލޭ ސާބަހަށް މަސައްކަތް ކުރާ ފަރާތްތަކަށެވެ.

ލަމްޕާޑުގެ ކޯޗުކޮށްދިން ދުވަސްދުވަހު ކުޅުންތެރިން އާއިލާތަކަށް ކުލަބުގެ ޕްރެކްޓިސް ބަލަން ވަދެވޭނީ 24 ގަޑިއިރު ކުރިން އެކަމަށް ހުއްދަ ހޯދައިގެންނެވެ. އަދި ކުޅުންތެރިންގެ އެޖެންޓުންނަށް ޕްރެކްޓިސްތަކަށް ވަނުން މަނާކުރި އެވެ. އެޖެންޓުންނަށް ޕްރެކްޓިސް ގަޑީގައި އެތަނަށް ވަދެވޭނީ ރަސްމީ ކަމެއްގައި އެކަންޏެވެ. އަދި ކުޅުންތެރިންނަށް ކާގަޑިތަކުގައި އަމިއްލަ ތަކެތި ގެނެސްގެން ކެއުން މަނާކުރި އެވެ. ފުރައިގެންދާނަމަ އެކަމަށް ވެސް ވަގުތު އޮއްވައި ހުއްދަ ހޯދަންޖެހެ އެވެ.

ލަމްޕާޑަށް އަލުން ކޯޗުކަން ދިނުމުން މި ގަވާއިދުތައް އަލުން ތައާރަފް ކުރާނެކަމަށް ބުނެ ސޯޝަލް މީޑިއާގައި ވަނީ އޭނާގެ 12 ގަވާއިދު ދައުރުކުރަން ފަށާފަ އެވެ.