ޗެލްސީގެ ކޯޗުކަމާ ދެ ވަނަ ފަހަރަށް ހަވާލުވީއިރު ކުރިމަތީގައި އޮތް ޗެލެންޖު ބޮޑު ކަމަށާއި، ނަމަވެސް އެނބުރި އާދެވުމުން އުފާވާ ކަމަށް ފްރޭންޑް ލަމްޕާޑު ބުނެފި އެވެ.

ޗެލްސީގެ ޖާޒީގައި މޮޅު ކުޅުމެއް ވެސް ދައްކާފައިވާ ލަމްޕާޑަށް އެ ކުލަބުގެ ކޯޗުކަން އެންމެ ފުރަތަމަ ހަވާލުކުރީ 2019 ވަނަ އަހަރު އެވެ. ނަމަވެސް އޭނާގެ އިރުޝާދުގެ ދަށުން ކުލަބުގެ ނަތީޖާތައް ދަށްވުމުން 2021 ވަނަ އަހަރު އޭނާ ވަނީ މަގާމުން ވަކިކޮށްފަ އެވެ. އެއަށްފަހު އެ މާގަމަށް ހަމަޖެއްސީ ޖަރުމަނުގެ ތޯމަސް ޓުޗެލް އެވެ. ޓުޗެލްގެ އިރުޝާދުގެ ދަށުން ޗެލްސީން ކާމިޔާބުތަކެއް ހޯދި ނަމަވެސް، ކުލަބުގެ ވެރިން ބަދަލުވުމާއެކު އޭނާ ވަނީ މަގާމުން ވަކިކޮށްފަ އެވެ. އެއަށްފަހު އެ މަގާމަށް ހަމަޖެއްސީ ގްރަހަމް ޕޮޓާ އެވެ. ނަމަވެސް ޕޮޓާއާއެކު ޗެލްސީގެ ނަތީޖާ އިންތިހާ އަށް ދަށްވެ، އޭނާ ވެސް ވަނީ މަގާމުން ވަކިކޮށްފަ އެވެ. އެއަށްފަހު މިހާރު ކުރިއަށްދާ ސީޒަންގެ ބާކީ މުއްދަތަކަށް ވަގުތީ ކޯޗަކަށް ހަމަޖެއްސީ ލަމްޕާޑު އެވެ.

ދެ ވަނަ ފަހަރަށް ޗެލްސީއާ ހަވާލުވުމަށްފަހު ވާހަކަ ދައްކަމުން ލަމްޕާޑު ބުނީ، އޭނާ އަށް ވެވުނު އެންމެ ރަނގަޅަކަށް މަސައްކަތް ކުރާނެ ކަމަށެވެ. އެއަށްފަހު މުސްތަޤުބަލު އޮންނާނެ ގޮތެއް ވެސް ފެންނާނެ ކަމަށާއި، ދިގު މުއްދަތަކަށް މަޑު ކުރުމަކީ އޭނާގެ އަތް މަތީގައި އޮތް ކަމެއް ނޫން ކަމަށެވެ. ލަމްޕާޑު ބުނީ އެކަމުގެ ސުވާލުތައް ވެސް އިންތިހާ އަށް އޭނާ އަަށް ކުރިމަތިވާނެކަން އިނގޭ ކަމަށާއި، ނަމަވެސް އޭނާ ކުރިއަށް ދާނީ ވަރަށް ރަނގަޅަށް ލޯ ހުޅުވިގެން ކަމަށެވެ. އޭނާ ބުނީ ޗެލްސީގައި އެތައް ހުނަރު ހުރި ކުޅުންތެރިން ތިބި ކަމަށާއި، އެކަމާ އޭނާ އުފާވާ ކަމަށެވެ. އޭނާ ބުނީ ޗެލްސީން އެދުމުން އެހާ ފަސޭހަ އިން ވަޒީފާ ޤަބޫލު ކުރެވުނީ އެއީ އޭނާގެ ވެސް ކުލަބަށް ވުމުން ކަމަށެވެ.

މީގެ އިތުރުން ލަމްޕާޑު ބުނީ އޭނާ އަށް ޤަބޫލު ކުރެވޭ ގޮތުގައި ޗެލްސީން ބޭނުންވަނީ ކުލަބަށް އެންމެ އެކަށީގެންވާ ކޯޗު ހޯދުން ކަމަށެވެ. އެހެންކަމުން މިހާރު ޗެލްސީގައި ހުރީ އޭނާގެ އެންމެ ކާމިޔާބު މަސައްކަތް ކުރުމަށް ކަމަށާއި، ވަގުތު ކޮޅަކަށް ނަމަވެސް އެކަމުން އެހެން ދިމާލަކަށް ސިކުނޑި އަނބުރާ ނުލެވޭނެ ކަމަށެވެ. އިތުރަށް ލަމްޕާޑު ބުނީ އޭނާ ބޭނުންވަނީ ޗެލްސީ އަށް އެހީތެރިވާން ކަމަށާއި، ކުލަބުގެ ކޮންމެ މީހަކަށް ވެސް އޭނާާއާ ވާހަކަ ދެއްކޭނެ ކަމަށެވެ. އެގޮތުން ޗެލްސީގެ ވެރިންނާއި، މެޑިކަލް މީހުންނާއި، އާދައިގެ މުވައްޒަފުން އަދި ސަޕޯޓަރުންނަށް ވެސް އޭނާއާ ވާހަކަ ދެއްކޭނެ ކަމަށެވެ. ލަމްޕާޑު ބުނީ ކުރިމަތީގައި އޮތީ ބޮޑު ޗެލެންޖެއްކަން ވެސް އިނގޭ ކަމަށާއި، ނަމަވެސް ބޭނުންވަނީ ކުލަބުގެ އެންމެހައި ފަރާތްތަކާ ގުޅިގެން ކުރިއަށްދާން ކަމަށެވެ.

ޗެލްސީގެ ކޯޗުކަމުން 2021 ވަނަ އަހަރު ވަކިކުރި ފަހުން، 2022 ވަނަ އަހަރު ލަމްޕާޑު ހަވާލުވީ އެވަޓަންއާ އެވެ. ނަމަވެސް އެ ކުލަބުން ވެސް އޭނާ ވަކިކޮށްފައި ވަނީ ނަތީޖާ ނުނެރެވުމުންނެވެ. ދެ ވަނަ ފަހަރަށް ލަމްޕާޑު ޗެލްސީއާ ހަވާލުވީއިރު، އޭނާގެ އިރުޝާދުގެ ދަށުން ދެން ކުޅޭނެ އެންމެ ފުރަތަމަ މެޗަކީ އިނގިރޭސި ޕްރިމިއާ ލީގުގައި ހޮނިހިރު ދުވަހު ވުލްވްސްއާ ދެކޮޅަށް ކުޅޭ މެޗެވެ. އޭގެ ފަހުން ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި އަމިއްލަ ދަނޑުގައި އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށް ނިކުންނާނީ މި މަހުގެ 13 ވަނަ ދުވަހު އެވެ.