ޕްރެޒިޑެންޓްސް ކަޕުގެ ފަހު ތިން މެޗުން ނުކުތް ދަށް ނަތީޖާތަކަށް ފަހު މާޒިޔާ ސްޕޯޓްސް އެންޑް ރެކްރިއޭޝަނުން އެ ޓީމުގެ ކޯޗު މުޙައްމަދު ޝިޔާޒް (މޯހަން) މަގާމުން ވަކިކޮށްފިއެވެ.

މޯހަންއަށް މާޒިޔާގެ ވަޒީފާ ގެއްލުނީ ޖެހިޖެހިގެން ތިން މެޗުން މާޒިޔާ ބަލިވެފައިވަނިކޮށެވެ. އެއީ ޕްރެޒިޑެންޓްސް ކަޕުގެ ލީގު ބުރުގައި ގްރީން ސްޓްރީޓްސް އަތުން 2-0 ގެ ނަތީޖާއަކުން ބަލިވި މެޗާއި، ލީގު ބުރުގައި ވެލެންސިއާ އަތުން 1-0 ގެ ނަތީޖާއަކުން ބަލިވި މެޗުގެ އިތުރުން ފައިނަލުގައި ވެލެންސިއާ އަތުން 2-1 ގެ ނަތީޖާއަކުން ބަލިވި މެޗެވެ.

މާޒިޔާއިން ބުރާސްފަތި ދުވަހު ނެރުނު ބަޔާނުގައި ބުނީ މޯހަން ވަކިކުރަން ނިންމި ނިންމުމަކީ އެ ޓީމުގެ ބޯޑުން ނިންމަން ޖެހުނު އުނދަގޫ ނިންމުމެއް ކަމަށެވެ. އެކަމަކު ކްލަބުގެ މިވަގުތު ހާލަތައް ބަލާއިރު، އެންމެ ރަނގަޅު ގޮތަކީ އައު ކޯޗަކާއެކު ކުރިޔަށް ދިޔުން ކަމަށް ފެންނާތީ އެ ގޮތަށް ނިންމީ ކަމަށް މާޒިޔާއިން ބުނެއެވެ.

މާޒިޔާގެ ބަޔާނުގައި އިތުރަށް ބުނީ އައު ކޯޗެއް ހޯދުމުގެ މަސައްކަތް ކުރިޔަށްދާ ކަމަށެވެ.

މިދިޔަ އޮކްޓޫބަރު މަހުގެ 28 ވަނަ ދުވަހު މާޒިޔާގެ ކޯޗުކަމާއި މޯހަން ހަވާލުވިއިރު، މޯހަން ވަނީ މި ސީޒަނަށް ތައްޔާރުވާން އެ ޓީމު ގޮވައިގެން ނ. ކެނދިކުޅުދޫގައި ޓްރެއިނިން ކޭމްޕެއް ކޮށްފައެވެ. އަދި މޯހަންގެ އިރުޝާދުގެ ދަށުން މާޒިޔާއިން ޗެރިޓީ ޝީލްޑް ވަނީ ކާމިޔާބުކޮށްފައެވެ.

މާޒިޔާއިން މިދިޔަ ސީޒަން ވެސް ފެށީ ދިވެހި ކޯޗަކާއެކުގައެވެ. އެކަމަކު ޕްރިމިއާ ލީގުގެ ވަކި ހިސާބަކުން ސާބިއާގެ ގައުމީ ޓީމުގެ ކުރީގެ އެސިސްޓެންޓް ކޯޗު ރިސްޓޯ ވިޑަކޮވިޗް ވަނީ މާޒިޔާގެ ކޯޗުކަމުގެ މަގާމާއި ހަވާލުވެފައެވެ.

ކޯޗިންގގެ އެންމެ މަތީ ލައިސަންސް ކަމަށްވާ ޕްރޯ ލައިސަންސް މޯހަން އަތުގައި އޮންނައިރު، މޯހަން މި ވަނީ އެއް އަހަރު ތެރޭ ތިން ކްލަބެއްގެ ވަޒީފާ އިން ވަކިވެފައެވެ. މިދިޔަ ޖެނުއަރީ 16 ވަނަ ދުވަހު އީގަލްސް އާއިއެކު މޯހަން ހަދާފައިވާ އެއްބަސްވުން އުވާލާފައިވާއިރު، އޭގެ ތިން ދުވަސް ފަހުން މޯހަން ވަނީ ސުޕަ ޔުނައިޓެޑް ސްޕޯޓްސް (ސަސް)އަށް ބަދަލުވެފައެވެ. ސަސް އާއިއެކު މޯހަން ހަދާފައިވާ ކޮންޓްރެކްޓް އުވާލީ އޮކްޓޫބަރު މަހު 20 ވަނަ ދުވަހުއެވެ.