ހުޅުމާލޭގައި ހިނގި އަލިފާނުގެ ހާދިސާގައި އެއްވެސް މީހަކަށް އަނިޔާއެއް ނުވޭ
ގަސްތަކުގައި ރޯވި އަލިފާން އެއްކޮށް ނިވާލެވުނީ އަންގާރަ ދުވަހުގެރޭ 1:20 ގައި
ހުޅުމާލޭގައި ހުންނަ ސިފައިންނާއި ފުލުހުންގެ ފްލެޓްތަކުގެ ކުރިމަތީގައި އަލިފާން ރޯވެފައި
ހުޅުމާލޭގައި ހުންނަ ސިފައިންނާއި ފުލުހުންގެ ފްލެޓްތަކުގެ ކުރިމަތީގައި އޮތް ހުސް ބިމުގައި ހުރި ގަސްތަކުގައި އަލިފާން ރޯވެ ހިނގި އަލިފާނުގެ ހާދިސާގައި އެއްވެސް މީހަކަށް ގެއްލުމެއް ނުލިބޭ ކަމަށް މޯލްޑިވްސް ނޭޝަނަލް ޑިފެންސް ފޯރސް (އެމްއެންޑީއެފް)އިން ބުނެފިއެވެ.
އެމްއެންޑީއެފުން ބުނެފައިވަނީ، ގަސްތަކުގައި ރޯވި އަލިފާން އެއްކޮށް ނިވާލެވުނީ އަންގާރަ ދުވަހުގެރޭ 1:20 ގައި ކަމަށެވެ. އަދި އަލިފާނުގެ ހާދިސާގެ ރިޕޯޓް ފަޔަރ އެންޑް ރެސްކިއު ސަރވިސްއަށް ލިބުނީ އަންގާރަ ދުވަހުގެ ރޭ 22:29 ގައެވެ.
އަލިފާން ރޯވީ، ސިފައިންގެ ފްލެޓްތައް ކުރިމަތީގައި ހުންނަ ހިކި ގަސްތަކުގައި ކަމަށްވެސް ބުނެފައި ވެއެވެ. ރިޕޯޓް ލިބުމާއެކު އަލިފާން ނިއްވުމުގެ މަސައްކަތް ސިފައިންވަނީ ފަށާފައެވެ.
އަދި ގަސްތަކުގައި ރޯވި އަލިފާންގަނޑުގެ 90 އިންސައްތަ ނިއްވާލެވުނު ކަމަށް ބުނެފައިވަނީ އަންގާރަ ދުވަހުގެ ރޭ 23:27 ގައެވެ.
ގަސްތަކުގައި އަލިފާން ރޯވާން ދިމާވި ސަބަބާމެދު ސިފައިންނާއި ފުލުހުންވެސް ވަކި އެއްޗެއް ބުނެފައެއް ނުވެއެވެ. ނަމަވެސް ސޯޝަލް މީޑިޔާގައި އާންމުވެފައިވާ ވީޑިއޯތަކާއި ފޮޓޯތަކުން ފެންނަ ގޮތުގައި ގަސްތަކުގައި ވަރަށް ބޮޑަށް ހުޅު ހިފާފައިވެއެވެ.
