ކޮވިޑް ނަންބަރުތައް މައްޗަށް ދާންފެށުމާއެކު އެޗްއީއޯސީއަށް މީހުން ހޯދަން އިއުލާންކޮށްފި

ރާއްޖޭގައި ކޮވިޑް-19ގެ އަދަދުތައް ރިކޯޑް މިންވަރަކަށް މައްޗަށްދާން ފަށާފައިވާއިރު ކޮވިޑް-19އާ ގުޅިގެން އުފައްދާފައިވާ ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން މީހުން ހޯދަން އިއުލާންކޮށްފިއެވެ.

އެގޮތުން ހެލްތު މިނިސްޓްރީން ވަނީ ތިން މަގާމަކަށް 80 މީހުން އެޗްއީއޯސީއަށް ހޯދަން އިއުލާންކޮށްފައެވެ. އެގޮތުން ސަޕޯޓް ސްޓާފުންގެ ގޮތުގައި 10 މީހުންނާއި ސާމްޕަލް ޓޭކަރުންގެ ގޮތުގައި 60 މީހުންނާއި މެޑިކަލް އޮފިސަރުންގެ ގޮތުގައި 10 މީހުން ހޯދުމަށް ވަނީ އިއުލާންކޮށްފައެވެ. މިއެންމެންވެސް ނަގަނީ ހަމަސް ދުވަހުގެ މުއްދަތަށެވެ. ސަޕޯޓް ސްޓާފުންނާއި ސާމްޕަލް ޓޭންކަރުންނަށް މަހަކު 7500 ރުފިޔާ ލިބޭއިރު މެޑިކަލް އޮފިސަރުންނަށް ލިބޭ މަހު މުސާރައަކީ 24,240 ރުފިޔާއެވެ. މިހުރިހާ މަގާމަށްވެސް ކުރިމަތިލުމަށް ހުޅުވާލާފައިވަނީ 30 ޖަނަވަރީ 2022 ގެ 14:00 އާ ހަމައަށެވެ.

Advertisement

ކޮވިޑް-19އާ ގުޅިގެން އެލަވަންސް ފްރަންޓްލައިން މަސައްކަތްތެރިން ދޭން ނިންމާފައިވަނީ ތިން ކެޓަގަރީއަކަށް ބަހާލައިގެންނެވެ. އެއީ ހައި ރިސްކް ކެޓަގަރީ، މީޑިއަމް ރިސްކް ކެޓަގަރީ، އަދި ލޯ ރިސްކް ކެޓަގަރީއެވެ.

ކޮވިޑް-19އަށް ޕޮޒިޓިވްވާ މީހުން ނުވަތަ ބަލި ހުރެދާނެ ކަމަށް ބެލެވޭ ހައި ރިސްކް މީހުންނާ އެންމެ ގާތުން މަސައްކަތްކުރަންޖެހޭ މީހުން، ހައި ރިސްކް ކެޓަގަރީގައި ހިމެނޭއިރު، އެ ކެޓަގަރީގެ މީހުންނަށް ދުވާލަކަށް 500 ރުފިޔާ އެލަވަންސްގެ ގޮތުގައި ދޭން ވަނީ ނިންމާފައެވެ. އަދި ކޮވިޑް-19އަށް ޕޮޒިޓިވްވާ މީހުންނަށް ސީދާގޮތުން ޚިދުމަތް ދޭން ނުޖެހުނު ނަމަވެސް، ހައި ރިސްކް މީހުންނާއެކު ސީދާ މަސައްކަތް ކުރަންޖެހޭ މީޑިއަމް ރިސްކް ކެޓަގަރީގައި ހިމެނޭ މީހުންނަށް ދުވާލަކަށް ދިނުމަށް ނިންމީ 250 ރުފިޔާއެވެ.

ލޯ ރިސްކް ކެޓެގަރީގައި ހިމެނޭ މީހުންނަށް ދޭން ނިންމީ ދުވާލަކަށް 200 ރުފިޔާގެ މަގުންނެވެ. ލޯ ރިސްކް ކެޓަގަރީގައި ހިމެނެނީ ހައި ރިސްކް އަދި މީޑިއަމް ރިސްކް ކެޓެގަރީގައި ނުހިމެނޭ، އެހެން ނަމަވެސް ކޮވިޑް-19ގެ އޮޕަރޭޝަންތަކުގައި މަސައްކަތްކުރާ މީހުންގެ ތެރެއިން ދުވާލެއްގެ މައްޗަށް 6 ގަޑިއިރު ހޭދަކުރާ މީހުންނެވެ.

ސަރުކާރުން ފްރަންޓްލައިން އެލަވަންސް ދޭން ފަށާފައި ވަނީ 2020 ވަނަ އަހަރުގެ މެއި މަހުއެވެ.