ޔަމަންގެ ޑިޓެންޝަން ސެންޓަރަކަށް ސައުދީ އިސްވެ ދިން ހަމަލާ ތަހުގީގުކުރުމަށް އދން ގޮވާލައިފި

ޔަމަންގެ ސަދާ ސިޓީއަށް ސައުދީ އިސްވެ ވައިގެ މަގުން ދިން ހަމަލާތަކުގައި 70 މީހުން މަރުވުމާއި ގުޅިގެން އެހަމަލާ ކުށްވެރިކޮށް ދެފުށް ފެންނަ ތަހުގީގެއް ހިންގުމަށް އދ ގެ ސެކެޓްރީ ޖެނެރަލް އެންތޯނިއޯ ގުޓަރޭސް ގޮވާލައްވައިފިއެވެ.

ގުޓަރޭސްގެ ސްޕޯކްސްމަން ސްޓެފެން ޑުޖާރިކް ވިދާޅުވީ ހަމަލައާ ގުޅިގެން ވީއެންމެ އަވަހަކަށް ދެފުށް ފެންނަ ތަހުގީގެއް ފަށާ މިކަމުގައި ޒިންމާވާން ޖެހޭ ފަރާތްތައް ހޯދާ ޒިންމާދާރުކުރުވުމަށް އދގެ ސެކެޓްރީ ޖެނެރަލް ގޮވާލައްވާކަމަށެވެ.

ސަދާ ސިޓީގައި ހުރި ޑިޓެންޝަން ސެންޓަރަކަށް ބޮން އަޅާފައިވަނީ ހުކުރު ދުވަހުއެވެ. ޔަމަންގެ ރެޑް ކްރޮސް ސްޕޯކްސް ޕާސަން ބަޝީރު އުމަރު ވިދާޅުވީ އަދިވެސް މިހަމަލާއިން ސަލަމާތްވި މީހުން ހޯދަމުންދާ ކަމަށެވެ. މިހާތަނަށް އައިއިރު މިހަމަލާގައި މަރުވި މީހުންނާއި ޒަޚަމްވި މީހުންގެ އަދަދު 100ން މައްޗަށް އަރާކަމަށްވެސް ބަޝީރު ވިދާޅުވިއެވެ.

ޔަމަންގެ ހޫޘީންނާއި އެހީދޭ ޖަމާއަތްތަކުން ހޮނިހިރު ދުވަހު ބުނެފައިވަނީ ހަމަލާގައި މަރުވި މީހުންގެ އަދަދު 82ށް އަރާފައިވާކަމަށެވެ. ޑޮކްޓަރސް ވިތައުޓް ބޯރޑަރސް އިން ބުނެފައިވާ ގޮތުގައި ޒަޚަމްވި މީހުންގެ އަދަދު 200ށް އަރައެވެ.

ޔަމަންގެ ހޫޘީ ހެލްތު މިނިސްޓަރ ތާހާ އަލް މުތްވައްކިލް ވަނީ ބައިނަލްއަގްވާމީ އެހީތެރިކަމަށް އެދިވަޑައިގަންނަވާފައެވެ. އަދި ސައުދީން ގަސްތުގައި އާންމުންނަށް އަމާޒުކޮށް ހަމަލާތައް ދެމުން ގެންދަނީ ކަމަށް ތާހާ ތުހުމަތުކުރެއްވިއެވެ.

ޔަމަނަށް ސައުދީން އިސްވެ ދޭ ހަމަލާތައް އިތުރުވެފައިމިވަނީ ހޫޘީން ޔުނައިޓެޑް އަރަބް އެމިރޭޓްސް (ޔޫއޭއީ)ށް އަމާޒުކޮށް މިދިޔަ ހަފްތާގައި ދިން ހަމަލާތަކާއި ގުޅިގެންނެވެ.