ހަމައެކަނި ހުޅުމާލެ އާއި އެއާޕޯޓަށް ދަތުރުކުރާ ޓެކްސީތައް ރިޕޯޓުކޮށްދިނުމަށް އެދިއްޖެ

މާލޭގެ އެތެރޭގެ ދަތުރުތައް ނަގަން އިންކާރުކޮށް، ހަމައެކަނި ހުޅުމާލެ އާއި އެއާޕޯޓަށް ދަތުރުކުރާ ޓެކްސީތައް ރިޕޯޓުކޮށްދިނުމަށް ޓްރާންސްޕޯޓް މިނިސްޓްރީން އެދިއްޖެއެވެ.

މާލޭގެ އެތެރޭގެ ދަތުރުތައް ނަގަން އިންކާރުކޮށް، ހަމައެކަނި ހުޅުމާލެ އާއި އެއާޕޯޓަށް ޓެކްސީތައް ދަތުރުކުރާ މައްސަލައިގައި ޓްރާންސްޕޯޓު މިނިސްޓްރީން ބުރާސްފަތި ދުވަހު ނެރުނު އިއުލާނެއްގައި ބުނެފައިވަނީ، ޓެކްސީ ހޯދުމަށް ސެންޓަރުތަކުގައި އެދުމުން ހިދުމަތް ނުލިބޭ ކަމަށާއި އަދި މާލެ ތެރޭގައި ދަތުރުތައް ނުނަގާ ހުޅުލެ އާއި ހުޅުމާލޭގެ ދަތުރުތައް ނަގަމުންދާކަމުގެ ޝަކުވާ އާންމު ރައްޔިތުންގެ ފަރާތުން އެ މިނިސްޓްރީއަށްވެސް ލިބެމުން އަންނަ ކަމަށެވެ. އެހެންކަމުން އާންމުން ޓެކްސީގެ ހިދުމަތަށް އެދުމުން ބޭނުންވާ ހިދުމަތް ފޯރުކޮށް ނުދޭ ފަރާތްތަކުގެ މައުލޫމާތު މިނިސްޓްރީގެ ފޯނު ނަންބަރު 7943434 މެދުވެރިކޮށް ވައިބާ މެސެޖްއިން ހިއްސާކުރުމަށް ވަނީ އެދިފައެވެ.

އާންމުންނަށް ހިދުމަތް ދިނުމުގައި ޓެކްސީ ސެންޓަރުތަކުގެ މައްޗަށް ގާނޫނާއި ގަވާއިދުތަކުން ލާޒިމުކުރާ ކަންކަން ފުރިހަމަ ނުކުރާ ފަރާތްތަކާ މެދު ކުރިއަށް އޮތްތަނުގައި ފިޔަވަޅު އަޅާނެކަމަށް މިނިސްޓްރީން ބުންޏެވެ.

މި ފަހަކަށް އައިސް މާލޭގެ އެތެރޭގެ ދަތުރުތަށް ނެގުމަށް ޓެކްސީ ޑްރައިވަރުން އިންކާރުކުރާ މައްސަލަ ވަނީ ފެންމަތިވެފައެވެ. އޭގެ ބަދަލުގައި މާލެ އިން ހުޅުމާލެއަށް ނުވަތަ އެއާޕޯޓަށް ކުރާ ދަތުރުތައް އެފަރާތްތަކުން އަންނަނީ ނަގަމުންނެވެ. ގިނަ ބަޔަކު ގަބޫލުކުރާ ގޮތުގައި ޓެކްސީ ޑްރައިވަރުން މިގޮތަށް ކަންތައް ކުރަނީ ކުޑަ ވަގުތުކޮޅެއްގެ ތެރޭގައި ގިނަ ފައިސާ ހޯދުމަށްޓަކައެވެ.

މާލެ ތެރޭގައި އާންމުކޮށް ޓެކްސީ ދަތުރުތަށް ކޮށްދެނީ 25 ރުފިޔާއަށެވެ. ނަމަވެސް މާލެއާ ހުޅުމާލޭގެ އެއްވަނަ ފިޔަވައްސާ ދެމެދުގެ ދަތުރުތައް ކުރަނީ 75 ރުފިޔާއަށެވެ. ދަންވަރު 12ގެ ފަހުން މި ދަތުރުތައް ކުރަނީ އިތުރަށް ފަސް ރުފިޔާ ޗާޖުކޮށްފައެވެ.

މާލެއާ ހުޅުމާލޭގެ ދެވަނަ ފިޔަވައްސާ ދެމެދު ކުރާ ދަތުރުތަކަށް އާންމުކޮށް ނަގަނީ 90 ރުފިޔާއެވެ. އަދި މާލެއާ އެއާޕޯޓާ ދެމެދު ދަތުރުކޮށްދޭ އާންމު އަގަކީ 65 ރުފިޔާއެވެ. ދަންވަރު 12ގެ ފަހުން މި ދަތުރުތައް ކުރާނަމަ އިތުރަށް 10 ރުފިޔާ ޗާޖުކުރެއެވެ.