އެއްފަހަރާ ގިނަ ބަޔަކު ޕޮޒިޓިވްވާނަމަ ފަރުވާ ބޭނުންވާ މީހުންނަށް ފަރުވާ ނުދެވޭ ހާލަތަށް ހިނގައިދާނެ: ޑރ. އަފްޒަލް
ބަލި ފެތުރުން ކުޑަކުރެވިއްޖެނަމަ އެޑްމިޓުކޮށްގެން ފަރުވާ ދޭންޖެހޭ މީހުން މަދުވާނެ
އެޗްއީއޯސީން ބޭއްވި ނޫސްވެރިންގެ ބައްދަލުވުމުގެ ތެރެއިން
އެއްފަހަރާ މާ ގިނަ ކޭސްތައް ރިޕޯޓްކުރަމުންދާނަމަ އެންމެ ބޮޑަށް ފަރުވާ ބޭނުންވާ މީހުންނަށް ފަރުވާ ނުދެވޭ ހާލަތަށް ހިނގައިދާނެ ކަމަށް ޑރ. އިބްރާހިމް އަފްޒަލް ވިދާޅުވެއްޖެއެވެ.
ރާއްޖޭގެ ކޮވިޑް-19ގެ ހާލަތާ ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑިއަމޮލަޖިސްޓް ޑރ. އިބްރާހިމް އަފްޒަލް ވިދާޅުވީ މިވަގުތު މަސައްކަތްކުރަމުންދަނީ ބަލި ފެތުރޭ މިންވަރު ކުޑަކުރުމަށް ކަމަށެވެ.
ޑރ. އަފްޒަލް ވިދާޅުވީ ބަލި ފެތުރުން އެއްކޮށް ހުއްޓުވުމަށް މިވަގުތު ކުރެވޭނެ ކަމެއް ނެތް ކަމަށެވެ. އެހެންނަމަވެސް ބަލި ފެތުރޭ މިންވަރު ކުޑަކުރެވޭނެ ކަމަށް ވިދާޅުވިއެވެ. ޑރ. އަފްޒަލް ވިދާޅުވީ ބަލި ފެތުރޭ މިންވަރު ކުޑަކުރެއްވިއްޖެނަމަ އެޑްމިޓުކޮށްގެން ފަރުވާދޭންޖެހޭ މީހުން މަދުވެގެންދާނެ ކަމަށެވެ. އެހެންނަމަވެސް ކޭސްތައް އިތުރުވަމުންދާނަަ މިހާރު ހުރި ކެޕޭސިޓީއަށްވުރެ ގިނަ މީހުންނަށް ފަރުވާދޭންޖެހި، އެންމެ ބޮޑަށް ފަރުވާ ބޭނުންވާ މީހުންނަށް ފަރުވާ ނުދވޭތަން އައުން އެކަށީގެންވާކަމަށް ޑރ. އަފްޒަލް ވިދާޅުވިއެވެ.
ޑރ. އަފްޒަލް ވިދާޅުވީ ބަލި ފެތުރޭ މިންވަރު ދަށްކޮށްގެން އިތުރު ކެޕޭސިޓީ ބިލްޑްކޮށް ފެސިލިޓީތައް ގާއިމްކުރުމުގެ ފުރުސަތު ލިބިގެންދާނެ ކަމަށެވެ.
ޑރ. އަފްޒަލް ވަނީ މިވަގުތު ރާއްޖޭގައި ވަރަށް ބާރު ސްޕީޑެއްގައި ކޮވިޑް ފެތުރެމުންދާކަން ފާހަގަކުރައްވާފައެވެ. މިގޮތުން ކޮންމެ ތިން ދުވަހަކުން ކޭސްތައް ދެގުނަ ވަމުންދާކަމަށް ޑރ. އަފްޒަލް ވިދާޅުވިއެވެ. މިގޮތުން އެންމެ ޕީކަށް ދާއިރު، ދުވާލަކު 9،000 އާ ގާތްކުރާ އަދަދަކަށް ކޭސްތައް މައްޗަށް އަރައިގެން ދިއުން އެކަށީގެންވާކަމަށް ޑރ. އަފްޒަލް ވިދާޅުވިއެވެ. އެހާހިސާބުން ދެން ޖެހޭނީ ލޮކްޑައުންކުރުން ފަދަ ހަރުކަށި ފިޔަވަޅެއް އަަޅަން ކަމަށް ވިދާޅުވިއެވެ.
