ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އިން ވިއްކާ ތެލުގެ އަގު ބޮޑުކޮށްފިއެވެ.
އެސްޓީއޯއިން ބުނީ މިވަގުތު ދުނިޔޭގެ ބާޒާރުގައި ތެލުގެ އަގު ހުރީ ފާއިތުވި 7 އަހަރު ތެލުގެ އަގު ބޮޑުނުވާ މިންވަރަށް ބޮޑުވެފައި ކަމަށެވެ. އެއާއެކު އެކުންފުންޏަށް ތެޔޮ ގަންނަން ލިބޭ އަގުވެސް ބޮޑުވެފައިވާކަމަށް އެސްޓީއޯއިން ބުނެފައިވެއެވެ.
އެކުންފުންނަށް ތެޔޮ ގަންނަން ލިބޭ އަގު ބޮޑުވުމާއެކު ހުކުރު ދުވަހުން ފެށިގެން ފިއުލް ސަޕްލައި މޯލްޑިވްސްގެ ސްޓޭޝަންތަކުން ތެޔޮ ގަންނަން ލިބޭ އަގުތަކަށް ބަދަލު ގެނެސްފައިވާކަމަށް އެސްޓީއޯއިން ބުނެފައިވެއެވެ.
ތެލުގެ އަގަށް ގެނެސްފައިވާ ބަދަލުތައް:
- ޕެޓްރޯލް ލީޓަރެއް 12.06 (ބާރަ ރުފިޔާ ހަ ލާރި)
- ޑީސަލް ލީޓަރެއް 12.44 (ބާރަ ރުފިޔާ ސާޅީސް ހަތަރު ލާރި)
މީގެ ކުރިން ޕެޓްރޯލް ލީޓަރެއް ވިއްކާފައިވަނީ 11.16ރ. އަށެވެ. އަދި ޑީސަލް ލީޓަރެއް ވިއްކާފައިވަނީ 11.84ރ. އަށެވެ.
މިވަގުތު ދުނިޔޭގެ ބާޒާރުގައި ތެލުގެ އަގު ހުރީ ތެޔޮ ފީފާއެއް 86.91 ޑޮލަރަށެވެ.
