ސްކޫލްތަކުގައި މޫނު ބުރުގާ އެޅުމާއި ދެކޮޅަށް ވާކަހަދައްކާ މީހުންގެ ލޭ ހުއްދަ ކަމަށް ބުނާތީ ކަންބޮޑުވޭ - އެމްޑީޕީ
20 ޖެނުއަރީ 2022 | ބުރާސްފަތި 08:36މޫނު ނުފޮރުވައި ނުވަތަ އެއީ ކާކުކަން ދަރިވަރުންނަށް ރަނގަޅަށް ސާފުވާގޮތަށް ތިބެން ޖެހޭ
ގަވާއިދު އޮތް ނަމަވެސް ފަހުން އައިސް ޓީޗަރުން ކިޔަވައި ދެނީ މޫނު ބުރުގާ އަޅައިގެން
ސްކޫލްތަކުގައި މޫނު ބުރުގާ އެޅުމާ ދެކޮޅަށް ވާކަހަ ދައްކާ މީހުންގެ ލޭ ހުއްދަ ކަމަށް ސިފަކުރާކުރުމާ މެދު އެމްޑީޕީން ކަންބޮޑުވުން ފާޅުކޮށްފިއެވެ.
އެޕާޓީން ބުނީ، މީގެކުރިން ވެސް އެފަދައިން ސިފަކޮށް މީހުންގެ ހަށިފުރާނަ ނައްތާލައި ގެއްލުންދީފައިވާތީ އެކަމާ އިންތިހާއަށް ކަންބޮޑުވާކަމަށެވެ. އެހެންކަމުން، އެފަދަ ކުށްތަކުގެ މައްސަލަތައް ބެއްލެވުމުގައި އިތުރަށް ސަމާލުވުމަށް ދައުލަތުގެ ކަމާބެހޭ ފަރާތްތަކަށް ގޮވާލާ ކަމަށް އެޕާޓީން ބުނެއެވެ.
އެމްޑީޕީން ބުނީ، ދިވެހި މުޖުތަމައުގައި މައިންބަފައިންނާއި ބެލެނިވެރިންނާއި އަދި ދަރިވަރުންގެ ގިނަ ބަޔަކީ، އެ ދަރިވަރުންނަށް ސްކޫލު މަދަރުސާތަކުގައި އުނގަންނައިދެއްވާ މުދައްރިސުންނާއި ކުރިމަތިލާ ބައެއް ކަމަށާއި، އެ މުދައްރިސުން މޫނު ބުރުގާއިން މޫނު ނުފޮރުއްވައި ނުވަތަ އެއީ ކޮންބޭފުޅެއްކަން ދަރިވަރުންނަށް ރަނގަޅަށް ސާފުވާގޮތަށް ތިއްބެން ޖެހޭ ކަމަށެެވެ.
އެއީ ޒަމާނުއްސުރެ ދިވެހީންގެ ތެރޭގައި އެއާދަ އޮތް ގޮތް ކަމަށާއި މުދައްރިސުންނާއި ސްކޫލު މަދަރުސާތަކުން މި މިންގަނޑު ވަރަށް ރަނގަޅަށް ނަގަހައްޓަވަމުން ގެންގޮސްފައިވާ ކަމަށެވެ. ސްކޫލު މަދަރުސާތަކަކީ ދަރިވަރުންގެ މަސްލަހަތު ނަގަހައްޓަންޖެހޭ އަދި ދަރިވަރުންނަށް ރައްކާތެރިކަން ވެސް އޮންނަންޖެހޭ ވަކި ޚާއްސަ ތަންތަންކަމަށް ވާއިރު، ކިޔަވާދެއްވުމަށް ދަރިވަރުންނާ ބައްދަލުކުރައްވާއިރު މުދައްރިސުންގެ އައިޑެންޓިޓީ ޔަގީންވާންޖެހޭ ކަމަށް އެ ޕާޓީން ގަބޫލް ކުރާ ކަމަށް އެމްޑީޕީއިން ވަނީ ބުނެފައެވެ.
މޫނު ބުރުގާ އަޅާ ޓީޗަރުން މޫނު ފެންނަ ގޮތަށް ދަރިވަރުންނަށް ކިޔަވައި ދިނުމަށް އަންގާފައިވާތީ، ޓީޗަރުން އަންނަނީ އެ ޝަކުވާ ކުރަމުންނެވެ. ކިޔަވައިދޭ އިރު، ދަރިވަރުންނަށް ޓީޗަރުގެ މޫނު ފެންނަ ގޮތަށް ހުރުމަކީ ކުރިއްސުރެ އެކަމުގައި އޮންނަ ގަވާއިދެކެވެ. އެ ގަވާއިދުގައިވާ ގޮތުން މޫނު ބުރުގާ އެޅި ޓީޗަރުން ކިޔަވައިދޭއިރު ތިބެން ޖެހޭނީ، މޫނު ފޮތިކޮޅު ނަގައިގެން، ދަރިވަރުންނަށް ޓީޗަރުގެ މޫނު ފެންނަ ގޮތަށެވެ.
އަދި ސިވިލް ސާވިސްގެ ގަވައިދަށް 2017 ވަނަ އަހަރު ގެނައި ބަދަލަކާ ގުޅިގެން، މޫނު އަޅައިގެން ކާކުކަން ނޭގޭ ގޮތަށް ހެދުން އަޅައިގެން ތިބޭ މީހުންނަށް ސިވިލް ސާވިސްގެ ވަޒީފާ އަދާކުރުމުގެ ފުރުސަތު އޭރު ގެއްލުނެވެ. އަދި މޫނު ބުރުގާ އަޅައިގެން ތިބޭތީ އޭރު ބައެއް ޓީޗަރުން ވަޒީފާއިންވެސް ވަކިކުރިއެވެ.
އެހެންނަމަވެސް މި ސަރުކާރުން ވެރިކަމާ ހަވާލުވުމަށް ފަހު، އެ ގަވައިދު ބަދަލު ކުރާނެ ކަމަށް ވަނީ ބުނެފައެވެ. ފަހުން އެޑިއުކޭޝަން މިނިސްޓްރީން ވެސް ވަނީ، މޫނު ބުރުގާ އެޅި މީހުންނަށް ވަޒީފާ އަދާ ކުރެވޭނެ ކަމަށް އަންގާފައެވެ. އޭރުވެސް އެޑިއުކޭޝަނުން އެދިފައި ވަނީ، ދަރިވަރުންނަށް މޫނު ފެންނަ ގޮތަށް ތިބެގެން ކިޔަވައި ދިނުމަށެވެ. މިގޮތަށް އަންގާފައި އޮތް ނަމަވެސް، ފަހުން އައިސް ޓީޗަރުން ކިޔަވައި ދެނީ މޫނު ބުރުގާ އަޅައިގެން ތިބެއެވެ. އެހެންކަމުން ދެވަނަ ޓާމްގެ ކިޔެވުން ފެށުމާއެކު، ގަވައިދުގައި އޮންނަ ގޮތް އެޑިއުކޭޝަނުންވަނީ ޓީޗަރުންނަށް ހަނދާންކޮށްދިނުމަށް ސްކޫލުތަކުގައި އެދިފައެވެ.
