ޑިސެމްބަރު މަހު އިމްޕޯޓް އެކްސްޕޯޓުން ލިބުނު އާމްދަނީ އިތުރުވެއްޖެ

މިދިޔަ ޑިސެމްބަރުމަހު އިމްޕޯޓް އަދި އެކްސްޕޯޓުން ދައުލަތަށް ލިބުނު އާމްދަނީ 23 އިންސައްތަ އިތުރުވެއްޖެއެވެ.

ކަސްޓަމްސްއިން އާއްމުކޮށްފައިވާ ތަފާސްހިސާބުތައް ދައްކާގޮތުން މިދިޔަ ޑިސެމްބަރުމަހު ދައުލަތަށް އިމްޕޯޓު އަދި އެކްސްޕޯޓުކުރި މުދަވަނީ އިތުރުވެފައެވެ. އެގޮތުން އިމްޕޯޓް އަދި އެކްސްޕޯޓުން ލިބިފައިވަނީ 364 މިލިއަން ރުފިޔާއެވެ. 2020 ވަނަ އަަހަރުގެ ޑިސެމްބަރު މަހު އިމްޕޯޓް އަދި އެކްސްޕޯޓުން ލިބުނީ 296 މިލިއަން ރުފިޔާގެ އާމްދަނީއެކެވެ.

ތަފާސް ހިސާބުތައް ދައްކާގޮތުން 2020 ވަނަ އަހަރުގެ ޑިސެމްބަރުމަހު ރާއްޖެއަށް 2.5 ބިލިއަން ރުފިޔާގެ މުދާ އިމްޕޯޓް ކޮށްފައިވާއިރު، މިދިޔަ ޑިސެމްބަރުމަހު 4.5 ބިލިއަން ރުފިޔާގެ މުދާ ވަނީ އެތެރެކޮށްފައެވެ. މިދިޔަމަހު ރާއްޖެއަށް އެންމެ ގިނައިން މުދާ އެތެރެކޮށްފައިވަނީ ޔޫ.އޭ.އީ، ޗައިނާ، އިންޑިއާ އަދި އޮމާނުންނެވެ. ޔޫ.އޭ.އީ އިން 713 މިލިއަން ރުފިޔާގެ މުދާ އެތެރެކޮށްފައިވާއިރު، ޗައިނާ އިން 575 މިލިއަން ރުފިޔާގެ މުދާ ވަނީ އެތެރެކޮށްފައެވެ. އަދި އިންޑިއާއިން 504 މިލިއަން ރުފިޔާގެ މުދާ އަދި އޮމާން އިން 487 މިލިއަން ރުފިޔާގެ މުދާ ޑިސެމްބަރު މަހު ވަނީ އެތެރެކޮށްފައެވެ.

ރާއްޖެއަށް އެންމެ ގިނަ އަދަދަކަށް އިމްޕޯޓުކޮށްފައިވަނީ މެޝިނަރީއާއި އިލެކްޓްރިކް ސާމާނާއި، ކާބޯތަކެތީގެ ބާވަތްތަކާއި، ތެލުގެ ބާވަތްތަކެވެ.

މިދިޔަ ޑިސެމްބަރުމަހު އެކްސްޕޯޓްކޮށްފައިވަނީ 327 މިލިއަން ރުފިޔާގެ މުދަލެވެ. އަދި 2020ވަނަ އަހަރުގެ ޑިސެމްބަރުމަހު ރާއްޖެއިން 457 މިލއަން ރުފިޔާގެ މުދާ އެކްސްޕޯޓްކޮށްފައިވެއެވެ. މިދިޔަ މަހު ރާއްޖެއަށް އެންމެ ގިނައިން މުދާ އެކްސްޕޯޓުކޮށްފައިވަނީ ތައިލޭންޑަށާއި، ޖަރުމަންވިލާތަށާއި، މޮރިޝަސްއަށާއި، އިނގިރޭސިވިލާތުގެ އިތުރުން ޖަޕާނަށެވެ.

މި ގައުމުތަކަށް ރާއްޖެއިން އެކްސްޕޯޓުކޮށްފައިވަނީ މަހުގެ ބާވަތްތަކެއްވެ.

ތަފާސްހިސާބުތަަކަށް ބަލާއިރު، 2020 ވަނަ އަހަރުގެ ޑިސެމްބަރުމަހު މުދާ ހިފައިގެން ރާއްޖެއަށް 138 އުޅަނދެއް އެތެރެވެފައިވާއިރު މިދިޔަ ޑިސެމްބަރުމަހު އެތެރެވެފައިވަނީ 117 އުޅަނދެވެ.