ރައީސް ސޯލިޙު ދަންޖައްސަން ޕީޕީއެމްގެ ކައުންސިލް މެމްބަރެއްކަމަށްވާ ޒާހިދު ރަމީޒު ގޮވާލައިފިއެވެ.
ޒާހިދު ކޮށްފައިވާ ޓުވީޓެއްގައި ބުނެފައިވަނީ ޤައުމަށް ގައްދާރުވުމުން ދުނިޔޭގެ ބޮޑެތި ޤައުމުތަކުގައި ދީ އުޅޭ ޙުކުމަކީ މަރުގެ ޙުކުމްކަމަށާއި، އޭނާ ދެކެން ބޭނުންވަނީ ދެން އަންނަ ވެރިކަމެއްގައި ރައީސް ސޯލިޙު ދަންޖައްސާ މަންޒަރުކަމަށެވެ.
ޒާހިދު މީގެ ކުރިންވެސް ވަނީ އެފަދަ ޕޯސްޓުތައް ކޮށްފައެވެ. އެގޮތުން ރައީސް ސޯލިޙު ނަރަކައަށް ދާނެ ކަމުގެ ގެރެންޓީ އޮތްކަމަށް ބުނެ ކޮށްފައިވާ ޕޯސްޓަކާއި ގުޅިގެން އޭނާއަށް ގިނަ ބައެއްގެ ފާޑުކިއުންތައްވެސް އަމާޒުވެގެން ދިޔައެވެ. ރައީސް ސޯލިހަށް އިންޒާރު ދިނުމުގެ އިތުރުންވެސް އޭނާގެ އެފަދަ މައްސަލަތަކެއް ފެންމަތިވެފައިވެއެވެ.
ބްލޮގަރ ޔާމީން ރަޝީދަށް މަރުގެ އިންޒާރު ދީފައިވާކަމަށް ބަޔާންކޮށް ދިފާޢީ ހެކިވެރިއެއްގެ ގޮތުންވެސް އޭރު ޒާހިދުގެ ނަން ދިފާއުން ހުށައެޅިއެވެ. އެގޮތުން އޭނާ ހިމެނޭހެން ޔާމީން ރަޝީދަށް އިންޒާރު ދިން 4 މީހަކު ހައްޔަރު ކުރުމަށް ފުލުހުންގެ އެހީތެރިކަން ހޯދައިދިނުމަށް ދިފާއީ ވަކީލު އެދިފައިވެއެވެ. އަދި އެ ފަރާތްތައް ރުހުމުގައި ކޯޓަށް ހާޒިރުނުވާނެކަން ދިފާއީ ވަކީލު އޭރު ފާހަގަކުރެއްވިއެވެ. އެހެންނަމަވެސް، ޒާހިދު ރަމީޒު ހާޒިރު ނުކުރެވުނީ އޭނާއަށް ގުޅޭނެ ގޮތެއް ނުވުމުން ކަމަށް ޝަރީއަތުން ވަނީ ފާހަގަކޮށްފައެވެ.
ޒާހިދު ވަނީ އޭނާގެ ނަން ހުށައެޅުއްވުމާއި ގުޅިގެން ވަކީލުގެ ސުލޫކީ މައްސަލަތަކެއް ބެލުމަށް ވަގުތުން ދިވެހި ރާއްޖޭގެ ބާރ ކައުންސިލަށް ހުށައަޅާފައެވެ. އަދި ފުލުހުންނާއި ޕީޖީންވެސް މިމައްސަލައާ ބެހޭގޮތުން އޭނާއާއި ސުވާލުކޮށްފައިނުވާ ކަމަށް ޒާހިދު ބުންޏެވެ. ޒާހިދު އެހެން ބުނެފައިވާއިރު، ދިފާޢީ ހެއްކެއްގެ ގޮތުގައި ހުށައަޅާ ފަރާތަކީ ފުލުހުން ނުވަތަ ޕްރޮސެކިއުޓަރ ޖެނެރަލް އިން ސުވާލުކޮށްފައިވާ ފަރާތަކަށްވުން ޖިނާއީ އިޖުރާޢަތުގެ ޤާނޫނު ލާޒިމެއް ނުކުރެއެވެ.
ޔާމީން ރަޝީދަށް މަރުގެ އިންޒާރު ދިން ކަމަށް ބުނާ ޒާހިދު ހާޒިރު ކުރުމަށް ކޯޓު އަމުރު ނެރުމަށް ޝަރީޢަތުން އޭރު ނިންމާފައިވާއިރު، މަރު ކޮމިޝަނުންވެސް ވަނީ ޔާމީން ރަޝީދުގެ މަރާއި ގުޅިގެން ޒާހިދު ހާޒިރުކޮށް ސުވާލުކޮށްފައެވެ. އެގޮތުން އޭރު ކޮމިޝަނުން ޒާހިދުއާއި ސުވާލުކޮށްފައިވަނީ އޭނާ ކޮށްފައިވާ ޓްވީޓުތަކަކާއި ގުޅިގެންނެވެ.
ބްރިޖް ވިއު ޕްލެޓްފޯރމް ސަރަހައްދުގައި ސްޓްރާޑާ ކުންފުނިން ހުޅުވާފައިވާ ނިއުޕޯރޓް ވިއު ސަރުކާރާ ހަވާލުކޮށް 1.1 މިލިއަން ރުފިޔާ ދެއްކުމަށް ކޯޓުން ކުރި ޙުކުމާއެކު ޒާހިދު ރަމީޒު ގެންދަނީ އެކި ގޮތްގޮތުން މި ސަރުކާރަށް ފާޑުކިޔައި، ތަފާތު އެކި އިންޒާރުތައް ދެމުންނެވެ. އެގޮތުން ނިއުޕޯރޓް ރެސްޓޯރަންޓްސްގެ މެނޭޖިންގ ޑިރެކްޓަރަކީ ޒާހިދު ރަމީޒުގެ އަނބިކަނބަލުންނެވެ. އެ އެއްބަސްވުން ބާތިލުކުރީވެސް އެއްބަސްވުމާއި ޚިލާފަށް ކަންކަން ދިއުމުގެ ސަބަބުންނެވެ. އެގޮތުން ނޮވެންބަރު 2017 އިން ފެށިގެން 2018 ވަނަ އަހަރުގެ ޖުލައިމަހުގެ ނިޔަލަށް ދައުލަތަށް ކުލީގެ ގޮތުގައި ދައްކަންޖެހޭ ޖުމްލަ 1,976,548.00 ރުފިޔާ ދައްކާފައި ނުވާކަންވެސް ފާހަގަކޮށްލެވެއެވެ.
