ޔޫވީ އަތުން ސަސްއަށް މޮޅެއް

ޕްރެޒިޑެންޓްސް ކަޕުގައި ޔުނައިޓެޑް ވިކްޓަރީ (ޔޫވީ) އަތުން ސުޕަ ޔުނައިޓެޑް ސްޕޯޓްސް (ސަސް) މޮޅުވެ، ލީގު ބުރުގެ ހަތަރުވަނައަށް ޖެހިލައިފިއެވެ.

ގައުމީ ފުޓުބޯޅަ ދަނޑުގައި ކުޅުނު މި މެޗު ސަސްއިން ކާމިޔާބުކުރީ 2-0 ގެ ނަތީޖާއަކުންނެވެ.

މެޗު ފަށައިގެން ސަސްއިން ޔޫވީގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލިއިރު، މެޗުގެ ފަސްވަނަ މިނެޓުގައި ސަސްގެ އަޙްމަދު ނަޝާހު (ނައްޓު) ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ.

ސަސްއިން ލީޑު ނެގީ ފުރަތަމަ ހާފުގެ ފަހު ފަސް މިނެޓުގެ ތެރޭގައެވެ. މި ލަނޑު އެޓީމަށް ކާމިޔާބު ކޮށްދިނީ މުޙައްމަދު ސަހާއުއެވެ.

ދެވަނަ ހާފު ފަށައިގެންވެސް ސަސްއިން ޔޫވީގެ ގޯލާ އަމާޒުކޮށް ގިނަ ހަމަލާތަކެއް ފޮނުވާލިއެވެ. މެޗުގެ 49 ވަނަ މިނެޓުގައި ސަސްގެ އިބްރާހީމް އަތީގް ހަސަން (އިއްބެ) ލަނޑު ޖެހި ނަމަވެސް ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. މެޗުގެ 53 ވަނަ މިނެޓުގައި ޔޫވީގެ އަލީ ހަމްދާން (އައްޔަ) ނުރައްކާތެރި ހަމަލާއެއް ސަސްގެ ގޯލަށް ފޮނުވާލި ނަމަވެސް ކީޕަރު މުޙައްމަދު ޝަފީއު (ޗެކް) ވަނީ ހުށިޔާރު ކަމާއެކު އެ ހަމަލާ ދިފާއުކޮށްފައެވެ.

ސަސްއިން ލީޑު ފުޅާކުރީ މެޗުގެ 57 ވަނަ މިނެޓުގައެވެ. މިއީ ލިބުނު ހިލޭ ޖެހުމަކުން ސަސްގެ ކެޕްޓަން އަބްދުﷲ ހަނީފް (ބެންޖޯ) ކާމިޔާބުކުރި ލަނޑެކެވެ.

ޕްރެޒިޑެންޓްސް ކަޕްގެ ލީގު ބުރުގައި ކޮންމެ ޓީމަކަށް ވެސް ބާކީ ދެން އޮތީ އެންމެ މެޗެކެވެ. އެއް ވަނައިގައި 16 ޕޮއިންޓާ އެކު ވެެލެންސިއާ އޮތްއިރު، ދެ ވަނައިގައި އޮތް ކްލަބް ގްރީން ސްޓްރީޓްސް އާއި ތިން ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އަށް ވަނީ 15 ޕޮއިންޓް ލިބިފަ އެވެ. ގްރީން ސްޓްރީޓްސް އަށް ކުރި ލިބެނީ ލަނޑުގެ ތަފާތުންނެވެ. އަދި ހަތަރުވަނައިގައި ސަސް އޮތީ ލިބުނު ނުވަ ޕޮއިންޓާއެކުގައެވެ.