ވިލިމާލެ ދާއިރާގެ ކުރީގެ މެމްބަރު އަދި ޕީޕީއެމްގެ ކުރީގެ ޕީޖީ ލީޑަރު އަޙުމަދު ނިހާން ޙުސައިން މަނިކުގެ މައްޗަށް އުފުލާފައިވާ ކޮރަޕްޝަންގެ ދައުވާތަކާއި ގުޅޭ ގޮތުން ބުރާސްފަތި ދުވަހަށް ތާވަލްކުރި އަޑުއެހުން ކެންސަލް ވެއްޖެއެވެ.

ބުރާސްފަތި ދުވަހުގެ ހެނދުނު 9:00ށް ތާވަލްކުރި އަޑުއެހުން ކެންސަލްވި ސަބަބެއް ކްރިމިނަލް ކޯޓުން ހާމައެއް ނުކުރެއެވެ. ނިހާންގެ މައްޗަށް 6 ދައުވާއެއް އުފުލާފައިވެއެވެ. އެއީ ރިޝްވަތަށް އެދުމުގެ ދެ ދައުވާއަކާއި، ރިޝްވަތު ހިފުމުގެ ތިން ދައުވާއެއްގެ އިތުރުން މަނީ ލޯންޑާ ކުރި ކަމުގެ ދައުވާއެވެ. މި ދައުވާތައް ސާބިތުވެއްޖެ ނަމަ 36 އަހަރަށް ވުރެ ދިގު ޖަލު ހުކުމެއް ނިހާންގެ މައްޗަށް އަންނާނެއެވެ.

އެންމެ ފަހުން މި މައްސަލައިގެ އަޑުއެހުމެއް ބާއްވާފައިވަނީ މިދިޔަ އަހަރުގެ ނޮވެމްބަރު މަހުއެވެ. އެ އަޑުއެހުމުގައި އޮތީ ދެފަރާތުން ހެކި ހުށަހެޅުމެވެ. ނަމަވެސް ނިހާނުގެ ވަކީލު ވަނީ ހެކި ހާމަކޮށްދިނުމަށް އެދި ފޯމެއް ހުށައަޅާފައި ވާނެކަމަށާއި، ދިފާއު ބިނާ ކުރުމަށްޓަކައި ހެއްކާ ގުޅޭ މައުލޫމާތުތައް އެނގެން ޖެހޭނެކަމަށް ވިދާޅުވެފައެވެ. އަދި މައްސަލައިގެ ހެކިންގެ ގޮތުގައި ހުށައަޅާފައިވާ ސައިމަން ނަމަކަށް ކިޔާ މީހެއްގެ އެއްވެސް މައުލޫމާތެއް ފެންނަން ނެތްކަން ފާހަގަ ކުރައްވައި ވަކީލު ވިދާޅުވެފައިވަނީ، އެއީ ޚިޔާލީ މީހެއްތޯވެސް ސުވާލު އުފެދޭ ކަމަށެވެ. އަދި އެ މައުލޫމާތުތައް ނެތި ދިފާއަށްވެސް ހެކި ހާމަ ކުރުމުގެ މަރުޙަލާ ކުރިއަށް ގެންދިއުމަށް ދަަތިވާނެކަން ވަކީލު ފާހަގަ ކުރެއްވިއެވެ.

ދިފާއީ ވަކީލު ވަނީ ދައުލަތުގެ ވަކީލުން އޮންލައިންކޮށް ޝަރީއަތް ކުރިއަށްދާއިރު، އެހެން ވަކީލުންނާއި މަޝްވަރާކޮށް، އިރުޝާދު ހޯދާކަމަށް ތުހުމަތު ކުރައްވައި ކޯޓަށް ހާޒިރުވެގެން ޝަރީއަތް ކުރިއަށް ގެންދަން ބޭނުން ކަމަށް ވިދާޅުވެފައެވެ. އެހެންކަމުން ޝައްކުތައް އުފެދޭ ކަންކަމުން ދުރުވުން ބުއްދިވެރި ކަމަށް ވިދާޅުވެ ގާޒީ އަލީ އާދަމް ނިންމެވީ ދެފަރާތުން ހެކި ހުށަހެޅުން އޮންނާނީ ޝަރީއަތަށް ހާޒިރުވެގެން ކަމަށެވެ.

އެގޮތުން ޝަރީއަތަށް ހާޒިރުވެ ކުރިއަށް ދިޔަ އަޑުއެހުމުގައި ވަނީ ހެކި ހުށައަޅާފައެވެ. އަދި ދިފާއުން ހެކި ހާމަ ކުރުމަށް އެދިފައިވާތީ އެކަމާ ގުޅޭ ފޯމު ހުށައެޅުމަށް 10 ދުވަހުގެ މުއްދަތެއް ދިނުމަށްފަހު، ދައުލަތުން އެއަށް 10 ދުވަހުގެ ތެރޭގައި ލިއުމުން ޖަވާބު ދިނުމަށްވެސް ވަނީ އަންގާފައެވެ. ދެން މި މައްސަލައިގެ އަޑުއެހުމެއް އޮންނާނީ 28 ދުވަސް ފަހުން ކަމަށް ގާޒީ ވިދާޅުވިއެވެ.

ނިހާނަށް ލިބިފައިވާ މިފަދަ އެއްވެސް ފައިސާއެއް ލިބުނުކަން އޭނާ 2014 އިން ފެށިގެން 2019 އާ ދެމެދު ހުށަހަޅާފައިވާ މާލީ ބަޔާންތަކުގައި ހިމަނާފައި ނުވާކަން ޕީޖީ އޮފީހުން މީގެ ކުރިން ހާމަކޮށްފައިވެއެވެ. ދައުލަތުން ވަނީ ފައިސާގެ އިތުރުން ނިހާނުގެ ރޮލެކްސް ގަޑިވެސް ދައުލަތަށް ނަގައިދިނުމަށް އެދިފައެވެ.