ހުޅުމާލޭ ފޭސް ދޭއްގައި ޕްރީ ސްކޫލެއް އަޅައިދޭނެ ބަޔަކު ހޯދަން އިއުލާނުކޮށްފި
12 ޖެނުއަރީ 2022 | ބުދަ 16:09މި މަސައްކަތަށް ބީލަން ހުށަހެޅުމުގެ ފުރުސަތު ވަނީ މި މަހުގެ 25އާ ހަަމައަށް ހުޅުވާލާފައި
ހުޅުމާލެ
ހުޅުމާލޭ ފޭސް ދޭއްގައި ޕްރީ ސްކޫލެއް އަޅައިދޭނެ ބަޔަކު ހޯދުމަށް ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީން އިއުލާނުކޮށްފިއެވެ.
އެޗްޑީސީން ކުރި އިއުލާނެއްގައި ބުނީ ހުޅުމާލޭގެ ފޭސް ދޭއްގައި ޕްރީ ސްކޫލެއް އަޅަން ކުރިމަތި ލެވޭނީ ހަމައެކަނި ދިވެހި ކުންފުނި ތަކަށް ކަމަށެވެ. މި މަސައްކަތަށް ބީލަން ހުށަހެޅުމުގެ ފުރުސަތު ވަނީ މި މަހުގެ 25 ވަނަ ދުވަހާއި ހަަމައަށް ހުޅުވާލާފައެވެ.
ހުޅުމާލޭގައި މިހާރު ތިން ސްކޫލު ހުރެއެވެ. އެެއީ ޣާޒީ ސްކޫލާއި، ރެހެންދި ސްކޫލް އަދި ހުރަވީ ސްކޫލް އެވެ. ހުޅުމާލޭ ފޭސް 2ގައި އިމާރާތް ކުރާ ފުރަތަމަ ސްކޫލު ކަމަށްވާ ސަލާހުއްދީން ސްކޫލް އިމާރާތް ކުރުމަށް މިދިޔަ އަހަރުގެ ފެބްރުއަރީ 7 ވަނަ ދުވަހު ވަނީ އަމީން ކޮންސްޓްރަކްޝަނާ ހަވާލުކޮށްފައެވެ. ހުޅުމާލޭ ދެވަނަ ފިޔަވަހީގައި 4 ސްކޫލް އެޅުމަށް މިހާތަނަށް ނިންމާފައިވާއިރު، އެޗްޑީސީން ބުނެފައިވަނީ ހުޅުމާޅޭ ދެވަނަ ފިޔަވަހީގައި ބޭރު ފަރާތަކުން ތަރައްގީކުރާ އިންޓަރނޭޝަނަލް ސްކޫލެއްވެސް ހުންނާނެކަމަށެވެ.
