އަނެއްކާވެސް ކޮވިޑް-19ގެ އައު ރާޅެއް

ގިނަ ދުވަސްތަކަކަށްފަހު އަނެއްކާވެސް މުޅި ދުނިޔެއަށް މިވަނީ ނުރައްކާތެރި ސިގުނަލެއް ލިބިފައެވެ. ކޮވިޑް-19ގެ ހާލަތުގެ ތެރެއިން އެތައް ކަމެއް މުޅި ދުނިޔެއިން ވަނީ މިހާތަނަށް ތަހައްމަލްކޮށްފައެވެ. މީގެ ތެރޭގައި ނުރައްކާތެރި އެކި ވޭރިއެންޓްތަކާއި، ކޮވިޑްގެ އެކި ރާޅުތަކާ ކުރިމަތިލާންނުޖެހުނު ގައުމެއް މަދެވެ. އަނެއްކާވެސް މިވަނީ ހަމަ މިފަދަ ވޭރިއެންޓެއްގެ ބިރުވެރިކަމާއި ކޮވިޑްގެ އިތުރު ރާޅަކާ ކުރިމަތިލާންޖެހިފައެވެ.

މިވަގުތު ދުނިޔޭގެ ގިނަ ގައުމުތަކުގައި ފެތުރެމުންދާ އޮމިކްރޯން ވޭރިއެންޓަކީ ވަރަށް ބާރު މިނެއްގައި ފެތުރެމުންދާ ވޭރިއަންޓެކެވެ. މި ވޭރިއެންޓް މިހާރު ވަނީ މި ކުޑަ ކުޑަ ރާއްޖެއިންވެސް ފެނިފައެވެ. އަދި މި ވޭރިއެންޓް ފެނިފައި މާ ގިނަ ދުވަސްތަކެއް ނުވެ ރާއްޖެއިން ފެންނަ ކޮވިޑްގެ ކޭސްތައް މިވަނީ އިންތިހާއަށް މައްޗަށް ދާން ފަށާފައެވެ. މިއޮތީ ކޮވިޑް-19ގެ އިތުރު ރާޅެކެވެ.

ރާއްޖެެއިން ފެންނަ ކޮވިޑްގެ ކޭސްތައް އިތުރުވަމުންދާކަން ފާހަގަކުރެވުނީ މިމަހުގެ 3 ވަނަ ދުވަހުން ފެށިގެންނެވެ. އެ ދުވަހު މުޅި ރާއްޖެއިން 242 ކޭސް ފެނިފައިވެއެވެ. ޖެނުއަރީ 4 ވަނަ ދުވަހު 228 ކޭސް ފެނިފައިވާއިރު، 5 ވަނަ ދުވަހު 224 ކޭސް ފެނިފައިވެއެވެ. 6 ވަނަ ދުވަހު ފެނުނު ކޭސްތަކުގެ އަދަދު 304 އަށް އަރާފައިވާއިރު، މިމަހުގެ 7 ވަނަ ދުވަހު 281 ކޭސް، 8 ވަނަ ދުވަހު 337 ކޭސް، 9 ވަނަ ދުވަހު 384 ކޭސް، 10 ވަނަ ދުވަހު 454 ކޭސް އަދި 11 ވަނަ ދުވަހު 593 ކޭސް ވަނީ ފެނިފައެވެ. މި ހުރިހާ ދުވަހަކުވެސް އެންމެ ގިނަ ކޭސް ރިޕޯޓުކޮށްފައިވަނީ މާލެ ސަރަހައްދުންނެވެ.

ރާއްޖެއިން ފެންނަ ކޮވިޑް ކޭސްތަކުގެ އަދަދު އިތުރުވަމުންދަނީ އޮމިކްރޯން ވޭރިއެންޓާ ހުރެ ކަމެއް ނުވަތަ ކޮވިޑްގެ އިތުރު ރާޅަކާހުރެކަމެއް ބުނަން ސިއްހީ މާހިރުންނަށްވެސް ވަނީ ދަތިވެފައެވެ. އެހެންނަމަވެސް ރާއްޖޭގައި އޮމިކްރޯން ވޭރިއެންޓުގެ ކޮމިއުނިޓި ސްޕްރެޑެއް އެބައޮތްކަން ކަށަވަރު ކުރެވިފައިވާކަމަށް އެޗްޕީއޭގެ މެޑިކަލް އޮފިސަރ ޑރ. ފާތިމަތު ނަޒްލާ ރަފީގު ވަނީ ވިދާޅުވެފައެވެ. އަދި މިހާތަނަށް ރާއްޖެއިން އޮމިކްރޯން ވޭރިއެންޓުގެ 26 ކޭސް ދެނެގަނެވިފައިވާކަމަށް ޑރ. ނަޒްލާ ވިދާޅުވިއެވެ.

މިވަގުތު އޮމިކްރޯން ވޭރިއެންޓް ފެތުރެމުންދާ ގިނަ ގައުމުތަކުގެ ހާލަތަށް ބަލާއިރު، ކޮންމެ ގައުމުން ފެންނަ ކޮވިޑްގެ ކޭސްތައް ދަނީ އިންތިހާއަށް އިތުރުވަމުންނެވެ. އާބާދީ ބޮޑު ގައުމުތަކުގެ ތެރެއިން އިންޑިއާ، ޔޫއެސްއޭ ފަދަ ގައުމުތަކުން ދުވާލަކު އެއް ލައްކައިން މަތިން ކޮވިޑް ކޭސްތައް ދަނީ ރިޕޯޓުކުރަމުންނެވެ. އަދި މިއާއެކު ގައުމުތަކުން ވަނީ ހަރުކަށި ފިޔަވަޅުތައް އަަޅާފައެވެ. ރާއްޖެއިންވެސް މިފަދަ ބައެއް ފިޔަވަޅުތައް ވަނީ އަޅާފައެވެ. މިގޮތުން އަތޮޅުތެރެއަށް ދަތުރުކުރުމުގެ ކުރިން ސާމްޕަލް ނަގައި ކޮވިޑަށް ޓެސްޓުކުރަންޖެހުމާއި، އެއްވުންތައް ބޭއްވުން ހުއްޓާލަން އެންގުމާއި، އަދިވެސް މިނޫން ބައެއް ފިޔަވަޅުތައް ހިމެނެއެވެ.

މިހާހިސާބުންވެސް އެނގެނީ ރާއްޖޭގައި ކޮވިޑް ފެތުރިފައި އޮތް މިންވަރެވެ. މިކަމުން ރައްކާތެރިވާން މަސައްކަތްކުރަން ޖެހިފައިވާ މިންވަރެވެ. ރާއްޖޭގައި ދިރިއުޅޭ އެންމެން މިކަމަށް އިތުރަށް ސަމާލުވާން މިވަނީ ޖެހިފައެވެ. ދުނިޔޭގެ އެކި ގައުމުތަކަށް ލިބެމުންދާ ނުރައްކާތެރި ސިގްނަލް ރާއްޖެއަށްވެސް މިވަނީ ލިބިފައެވެ.