ދެން ސައިކަލް ލައިސަންސަށް އެދި ހުށަހެޅޭނީ 40 ގަޑިއިރު ދުއްވުމަށްފަހު
އުޅަނދު ދުއްވަން ދަސްކުރަންވާނީ މީލާދީގޮތުން 16 އަހަރު ފުރިފައިވާ މީހުން
މާލޭގެ މަގުމަތީގައި މީހުން ހަރަކާތްތެރިވަނީ
އެއްގަމު އުޅަނދު ދުއްވަން ދަސްކުރުމަށް، ޑްރައިވިންގ ސްކޫލެއްގައި ވަކި މުއްދަތެއް ވަންދެން އުޅަނދު ދުއްވުމުގެ އަމަލީ ތަމްރީނު ފުރިހަމަކުރުމަށްފަހު ލައިސަންސް ހޯދުމަށް އެދި ހުށަހަޅާގޮތަށް ގަވާއިދު އެކުލަވާލައި ގެޒެޓްކޮށްފިއެވެ.
ޑްރައިވިންގ ސްކޫލް ހިންގުމާއި ޑްރައިވިންގ އިންސްޓްރަކްޓަރުންގެ ގޮތުގައި ހަރަކާތްތެރިވުމުގެ ގަވާއިދުގައި ވަނީ އެކި ގިންތީގެ އުޅަނދުތަކަށް ވަކި މުއްދަތުތަކެއް ކަނޑައަޅާފައެވެ. އެގޮތުން އެންމެ ގިނަ ގަޑިއިރު ކަނޑައަޅާފައިވަނީ ސައިކަލަށެވެ. އެއީ 40 ގަޑިއިރެވެ. ގަވާއިދުގައި ބުނެފައިވަނީ މިމުއްދަތަށް ދުއްވަން ދަސްކުރާ ފަރާތުން އުޅަނދު ދުއްވިކަމުގެ ރިކޯޑާއި ޓްރެއިނިންގ ލޮގު ޑްރައިވިންގ ސްކޫލުން ނުވަތަ ޑްރައިވިންގ އިންސްޓްރަކްޓަރ ބަލަހައްޓަންވާނެކަމަށެވެ.
އަދި ރިކޯޑާއި ޓްރެއިނިންގ ލޮގުގައި، ޑްރައިވިންގ ސްކޫލުން ނުވަތަ ޑްރައިވިންގ އިންސްޓްރަކްޓަރ ސޮއިކޮށްފައި، އެއްގަމު އުޅަނދު ދުއްވުމުގެ ލައިސަންސަށް އެދި ހުށަހަޅާއިރު، އެ ލޮގު ހުށަހަޅަންވާނެކަމަށްވެސް ގަވާއިދުގައި ބުނެފައިވެއެވެ. މީގެއިތުރުން ގަވާއިދުގައި ބުނެފައިވަނީ ދިވެހިރާއްޖޭގައި އެއްގަމު އުޅަނދެއް ދުއްވަން ދަސްކުރަންވާނީ، މި ގަވާއިދުގެ ދަށުން ޑްރައިވިންގ ސްކޫލް ހިންގުމުގެ ލައިސަންސް ލިބިފައިވާ ޑްރައިވިންގ ސްކޫލަކުން ނުވަތަ މި ގަވާއިދުގެ ދަށުން ލައިސަންސް ލިބިފައިވާ ޑްރައިވިންގ އިންސްޓްރަކްޓަރެއްގެ ބެލުމުގެ ދަށުން ކަމަށެވެ.
އެއްގަމު އުޅަނދު ދުއްވަން ދަސްކުރަންވާނީ މީލާދީގޮތުން 16 އަހަރު ފުރިފައިވާ މީހުންކަމަށްވެސް ގަވާއިދުގައި ބުނެފައިވެއެވެ. އަދި އެއްގަމު އުޅަނދު ދުއްވަން ދަސްކުރަންވާނީ، އުޅަނދުގެ ކުރިއާއި ފަހަތުގައި “L “ބޯޑު ހަރުކޮށްގެންނެވެ.“L “ބޯޑުޖަހައިގެން ދުއްވަމުންދާ އުޅަނދުތަކަށް، މަގުގައި ދުއްވާ އެހެން އުޅަނދުތަކުން ތަން ދޭންވާނެއެވެ. އަދި އެފަދަ އުޅަނދަކަށް އުނދަގޫވާގޮތަށް ދުއްވުމަކީ މަނާކަމެއްކަމަށްވެސް ގަވާއިދުގައި ބުނެއެވެ.
އެއްގަމު އުޅަނދު ދުއްވަން ދަސްކުރަން މަގުމަތީގައި ދުއްވާ ދުއްވުން ފިޔަވައި، ދަސްކުރުމަށް ޓަކައި އެކަމަށް ޚާއްޞަކޮށްފައިވާ ސަރަޙައްދެއްގައި ޑްރައިވިންގ އިންސްޓްރަކުޓަރުގެ ހާޒިރުގައި “L “ބޯޑު ޖަހައިގެން ފަރިތަކުރުމުގެ ގޮތުން އެކަނި ދުއްވިދާނެއެވެ. އަދި މިގޮތަށް ޚާއްޞަކޮށްފައިވާ ސަރަޙައްދުތަކުގައި ވެސް “L “ބޯޑު ނުޖަހައި ދުއްވުމަކީ މަނާކަމެވެ. މިފަދަ ސަރަޙައްދުތައް ކަނޑައަޅާނީ، ޓްރާންސްޕޯޓް މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުން ކަމަށް ގަވާއިދުގައި ވަނީ ބުނެފައެވެ.
ދުއްވަން ދަސްކޮށްދޭ ވަގުތުގައި ޑްރައިވިންގ އިންސްޓްރަކްޓަރުން ވެސްޓެއް ލާންވާނެއެވެ. އަދި މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުން ދޫކޮށްފައިވާ ހުއްދަ ފެންނަން އޮންނަންވާނެކަމަށް ގަވާއިދު ބުނެއެވެ. އެއްގަމު އުޅަނދު ދުއްވަން ދަސްކޮށްދިނުމަށް ޑްރައިވިންގ ސްކޫލަކުން ނުވަތަ ޑްރައިވިންގ އިންސްޓްރަކްޓަރުންނަށް އެންމެ ގިނަވެގެން ނެގޭނެ ފީވެސް ގަވާއިދުގައި ވަނީ ބަޔާންކޮށްފައެވެ.
މިގަވާއިދުގައި ޑްރައިވިންގ ސްކޫލާއި ޑްރައިވިންގ އިންސްޓްރަކްޓަރުންނާ ގުޅޭގޮތުންވެސް ވަނީ ވަކި ޝަރުތުތަކެއް ކަނޑައަޅާފައެވެ. އެގޮތުން ޑްރައިވިންގ ސްކޫލުގެ ނަމުގައި ރަޖިސްޓަރީކޮށްފައިވާ ނުވަތަ ޑްރައިވިންގ ސްކޫލުން ދިގު މުއްދަތަށް ކުއްޔަށް ހިފައިފައިވާ، އެ ޑްރައިވިންގ ސްކޫލަކުން ދުއްވަން ދަސްކޮށްދޭ ކޮންމެ ބާވަތެއްގެ އެއް އުޅަނދު އޮންނަންޖެހޭނެއެވެ. އަދި ޑްރައިވިންގ ސްކޫލުން ދުއްވަން ދަސްކޮށްދޭ ކޮންމެ ބާވަތެއްގެ އުޅަނދަކަށް މަދުވެގެން އެއް ޑްރައިވިންގ އިންސްޓްރަކްޓަރަކު ހުންނަންޖެހޭނެއެވެ. ޑްރައިވިންގ ސްކޫލް ހިންގުމަށް ލައިސަންސްދޭ މުއްދަތަކީ 5 އަހަރު ދުވަހެވެ.
ޑްރައިވިންގ އިންސްޓްރަކްޝަނުންނަށް ބަލާއިރު ޑްރައިވިންގ އިންސްޓަރަކްޓަރަކަށް ވެވޭނީ އުމުރުން 18 އަހަރާއި 60 އަހަރާ ދެމެދުގެ މީހަކަށެވެ. އަދި ދުއްވަން ދަސްކޮށްދޭ ގިންތީގެ އުޅަނދު ދުއްވުމުގެ ލައިސަންސް ލިބި ދުއްވުމުގައި މަދުވެގެން 3 އަހަރު ދުވަހުގެ ތަޖުރިބާ ލިބިފައިވާންވާނެއެވެ. ޑްރައިވިންގ އިންސްޓަރކްޓަރަކަށް ދޫކުރާ ލައިސަންސްގެ މުއްދަތަކީ 3 އަހަރު ދުވަހެވެ.
މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުން ޑްރައިވިންގ އިންސްޓްރަކްޓަރުންނަށް އަމާޒުކޮށްގެން ހިންގާ ތަމްރީނު ޕްރޮގްރާމެއް ކޮންމެ ޑްރައިވިންގ އިންސްޓްރަކްޓަރަކު ފުރިހަމަކުރަންޖެހޭނެއެވެ. ޑްރައިވިންގ އިންސްޓަރަކްޓަރަކަށް ވުމުގެ ޝަރުތުތަކުގެ ތެރޭގައި، އެއްގަމު ދަތުރުފަތުރުގެ ގާނޫނާއި އެގާނޫނުގެ ދަށުން ހަދާފައިވާ ގަވާއިދަކާ ޚިލާފުވެގެން ފާއިތުވި 5 އަހަރު ދުވަހުގެ ތެރޭގައި ލައިސަންސް ހިފަހައްޓާފައި އޮވެގެންވެސް ނުވާނެއެވެ.
