ދެ ސެންޓަރަކުން ސާމްޕަލް ނެގުން ކުރިއަށް: އަދިވެސް ސާމްޕަލް ނަގަން ދާ މީހުން ގިނަ
މިހާރު ސާމްޕަލް ނަގައިދެނީ ތާޖުއްދީން ސްކޫލުންނާއި އެފްއޭއެމް އިމާރާތުން
ތާޖުއްދީ ސްކޫލް ހޯލްތެރެ ފުރާލާފައި
ކޮވިޑް-19 އާ ގުޅިގެން އެޗްޕީއޭއިން އަޅަމުންދާ ފިޔަވަޅުތައް ވަރުގަދަކުރަމުންދާއިރު، އަންގާރަ ދުވަހުވެސް އަތޮޅުތެރެއަށް ދިއުމަށް ސާމްޕަލް ނެގުމަށް ގިނަ ބަޔަކު ކިއު ހަދައިފިއެވެ.
މީގެ ކުރިން ސާމްޕަލް ނަގައިދެމުންދިޔައީ ހަމައެކަނި ސޯޝަލް ސެންޓަރުންނެވެ. އެހެންނަމަވެސް ހަރުކަށިކުރި ފިޔަވަޅުތަކާއެކު އަތޮޅުތެރެއަށް ދަތުރުކުރުމަށް ސާމްޕަލް ނަގާ މީހުންގެ އަދަދު ވަނީ އިތުރުވެފައެވެ. އަދި ސޯޝަލް ސެންޓަރަށް ބާރުބޮޑުވުމުގެ ސަބަބުން މިހާރު ވަނީ އެ ސެންޓަރުން ކުރިއަށްގެންދިޔަ ސާމްޕަލް ނެގުމުގެ މަސައްކަތް ތާޖުއްދީން ސްކޫލްގެ ހޯލަށް ބަދަލުކޮށްފައެވެ. އަދި އެފްއޭއެމް ކުރިން ހިންގި އިމާރާތުގައި އިތުރު ސާމްޕަލް ސެންޓަރެއް ވަނީ ހުޅުވާފައެވެ.
ދެ ސެންޓަރަކުން ސާމްޕަލް ނެގުމުގެ މަސައްކަތްކުރަމުންދިޔަ ނަމަވެސް ސާމްޕަލް ނެގުމަށް ތާޖުއްދީން ސްކޫލަށް ގޮސްތިބި މީހުންގެ އަދަދު އަދިވެސް ގިނައެވެ. ސޯޝަލް ސެންޓަރުގައި ސާމްޕަލް ނެގުމުގެ މަސައްކަތް ކުރިއަށްގެންދިޔައިރު ހިރިޔާ ސްކޫލާ ހަމައަށް ކިއޫ ދަމާލާފައި އޮވެއެވެ. އެހެންނަމަވެސް ތާޖުއްދީން ސްކޫލަށް ސާމްޕަލް ނެގުން ބަދަލުކުރުމުން އެތަނުގެ އެތެރޭގައި ގިނަ ބަޔަކަށް ތިބެވޭނެ އިންތިޒާމު ހުރީ ހަމަޖައްސާފައެވެ. އަދި މާ ގިނައިރު ބޭރުގައި ކިއޫގައި ތިބޭކަށް ނުޖެހެއެވެ.
ތާޖުއްދީން ސްކޫލްގައި ސާމްޕަލް ނެގުމުގެ މަސައްކަތުގައި ހަރަކާތްތެރިވަމުންދަނީ 6 މީހުންނެވެ. އެހެންނަމަވެސް ސާމްޕަލް ނެގުމަށްގޮސް ތިބެންޖެހޭ ވަގުތަކަށް ބަދަލެއް ނާދެއެވެ. ތާޖުއްދީން ސްކޫލުން ރާއްޖެއެމްވީއާ ވާހަކަ ދެއްކި މީހަކު ބުނީ އޭނާ އެތަނުގައި ސާމްޕަލް ނަގަން ގޮސް އިންނަތާ 3 ގަޑިއިރު ވެފައިވާކަމަށެވެ.
ތާޖުއްދީން ސްކޫލުން ސާމްޕަލް ނަގައިދެމުންދަނީ ހޮނިހިރު ދުވަހުން ބުދަ ދުވަހަށް ކޮންމެ ދުވަހަކު 09:00ން 12:00 އަށެވެ. އަދި މެންދުރުފަހު 15:00ން އިރޮއޮއްސި 18:00 އަށެވެ. ބުރާސްފަތި ދުވަހު ސާމްޕަލް ނަގަނީ 09:00ން 12:00 އަށެވެ. އަދި ހުކުރު ދުވަހު ސާމްޕަލް ނަގަނީ 15:00ން 18:00 އަށެވެ.
ތާޖުއްދީން ސްކޫލްގެ އިތުރުން ދެން މިވަގުތު ސާމްޕަލް ނަގަމުންދަނީ އެފްއޭއެމް ކުރިން ހިންގި އިމާރާތުގައެވެ. މި އިމާރާތުގެ އެންމެ ތިރިން ސާމަޕަލް ނަގައިދެމުންދާއިރު އެ އިމާރާތުގައި ސާމްޕަލް ނެގުމުގެ މަސައްކަތް ކުރަމުންދަނީ ޖާގަ ކުޑަ ތަންކޮޅެއްގައެވެ. އެހެންކަމުން އެތަނުގެ އެތެެރޭގައި ތިބެވެނީ މަދު ބަޔަކަށެވެ. އަދި ގިނަ ބަޔަކު އެ އިމާރާތުގެ ބޭރުގައި ކިއޫ ހަދައިގެން ތިބެން ޖެހެއެވެ. އެހެންނަމަވެސް ތާޖުއްދީން ސްކޫލަށް ސާމްޕަލް ނަގަން ގޮސް ތިބި މީހުންނަށްވުރެ އެފްއޭއެމްއަށް ގޮސް ތިބި މީހުން މަދެވެ. އެތަނުގައި ސާމްޕަލް ނެގުމުގެ މަސައްކަތުގައި ހަރަކާތްތެރިވަނީ 5 މީހުންނެވެ. އެފްއޭއެމް ބިލްޑިންގ އިން ސާމްޕަލް ނަގައިދެނީ ކޮންމެ ދުވަހެއްގެ ހެނދުނު 09:00ން މެންދުރުފަހު 15:00 އަށެވެ.
މާލެ ސަރަހައްދުގައި ކޮވިޑްގެ ހާލަތު ގޯސްވަމުންދާތީ އެޗްޕީއޭއިން އަޅަން ނިންމާފައިވާ ފިޔަވަޅުތަކުގެ ތެރޭގައި ވެކްސިންގެ ޑޯޒްތައް ފުރިހަމަވެ 14 ދުވަސް ހަމަވެފައިވާ ފަރާތެއް ނަމަ އެމީހަކަށް ދަތުރުކުރެވޭނީ 72 ގަޑިއިރު ނުވާ ޕީސީއާރް ނެގެޓިވް ނަތީޖާއާއެކުއެވެ. މީގެ އިތުރުން ވެކްސިންގެ ޑޯޒްތައް ފުރިހަމަނުވާ ފަރާތެއްނަމަ، 14 ދުވަހުގެ ފުރަބަންދު ކަރަންޓީނު ފުރިހަމަކުރަން ޖެހެއެވެ. އަދި ކަރަންޓީނުން ދޫކުރެވޭނީ 14 ދުވަހުގެ ކަރަންޓީނު ފުރިހަމަކުރުމަށްފަހު ޕީސީއާރް ޓެސްޓް ހަދައި ނަތީޖާ ނެގެޓިވް ވުމުން ކަމަށް އެޗްޕީއޭއިން ބުނެއެވެ. މީގެތެރޭގައި މިފަދަ މީހުންނާއެކުގައި ދަތުރުކުރަންޖެހޭ، ވެކްސިން ނުޖެހޭ އުމުރުގެ ކުޑަކުދިން ނުހިމެނޭނެއެވެ.
އެޗްޕީއޭއިން ބުނީ މާލެ ސަރަހައްދުން ރާއްޖޭގެ އެހެން ރަށްރަށަށް ދަތުރުކުރާ ފަރާތްތަކުން ކޮވިޑްސޭފް ޕޯޓަލްއިން ނެގެޓިވް ނަތީޖާ ދައްކަން ޖެހޭ ކަމަށެވެ. އަދި ކަރަންޓީނުވުމަށް ދަތުރުކުރާ މީހުން ހާލުބެލުން ޕޯޓަލްއިން ހުއްދަ ހޯދަން ޖެހޭ ކަމަށެވެ.
