ބޭނުމަކީ ހަރުކަށި ފިޔަވަޅުތަކެއް އެޅުން ނޫންކަމަށާ ބަލި ކޮންޓްރޯލް ކުރުންކަމަށް ހެލްތު މިނިސްޓްރީން ބުނެފިއެވެ.
ރާއްޖޭގެ ކޮވިޑްގެ ހާލަތާ ގުޅޭގޮތުން ހެލްތު މިނިސްޓްރީގައި އަންގާރާ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ހެލްތު މިނިސްޓްރީގެ ސްޓޭޓް މިނިސްޓަރ ޑރ. ޝާހް އަބްދުﷲ މާހިރު ވިދާޅުވީ ހަރުކަށި ފިޔަވަޅުތަކެއް އަޅާ ރައްޔިތުންގެ ހައްގުތަކެއް ނިގުޅައިގަންނަން ބޭނުން ނުވާކަމަށެވެ. އަދި ފާއިތުވި ދެ އަހަރުގެ ތެރޭގައި ލިބުނު ތަޖުރިބާގެ ބޭނުންކޮށްގެން މި ބަލިން އަރައިގަތުމަށް މަސައްކަތް ކުރަމުން އަންނަކަމަށެވެ.
މި ސަރުކާރުގެ ވިސްނުން ހުރީ އިރުއިރުކޮޅަކާ ފިޔަވަޅުތަކެއް އެޅުމުގެ ބަދަލުގައި ކަންހިނގާގޮތް ބެލުމަށްފަހު ރަނގަޅު ހަރުދަނާ ފިޔަވަޅުތަކެއް އެޅުމަށްކަމަށް ޝާހް ވިދާޅުވިއެވެ. ނަމަވެސް ކޮންމެހެން އަލަން ޖެހިއްޖެ ފިޔަވަޅެއް އެޅުމުގައި ފަސްނުޖެހޭނެކަމަށް ވިދާޅުވިއެވެ.
މި ބައްދަލުވުމުގައި ވާހަކަދައްކަމުން ޑރ. ނަޒްލާ ރަފީގު ވިދާޅުވީ ރާއްޖެއަށް މިހާރު ކުރިމަތިވެފައިވާ ކޮވިޑުގެ ރާޅުގައި އަދަދުތައް އެންމެ މައްޗަށް އަރާނީ މި މަހުގެ ފަހުކޮޅު ނުވަތަ މިއަންނަ މަހުގެ ކުރީކޮޅުގައި ކަމަށެވެ. ނަމަވެސް މި ހާލަތުގައިވެސް މަސައްކަތް ކުރާނީ ރައްޔިތުންނަށް ވީހާވެސް ލުއިފަސޭހަކޮށް އިންތިޒާމުތައް ހަމަޖެއްސުމަށް ކަމަށެވެ. އަދި ސްކޫލުތަކުގެ ކިޔެވުން ބަންދު ނުކޮށް ކުރިއަށް ގެންދެވޭތޯ ބަލާނެ ކަމަށެވެ.
ރާއްޖޭގައި މިހާތަނަށް އޮމިކްރޯން ވޭރިއެންޓް ޖެހިފައިވާ ހަތް ދިވެއްސަކާ 19 ފަތުރުވެރިން ވަނީ ދެނެގަނެވިފައެވެ. ނަމަވެސް މި ފަރާތްތަކުގެ ހާލު ގޯސް ނޫންކަމަށް ނަޒްލާ ވިދާޅުވިއެވެ.
މި މީހުންގެ ތެރޭގައި ބައެއް ހައިރިސްކު މީހުންވެސް ހިމެނޭ، އެކަމަކު މިހާތަނަށް މި މީހުންގެ ހާލަތު ގޯސްވެގެން އަޅުގަނޑުމެންނަކަށް މައުލޫމާތު ލިބިފައެއް ނެތް، ހާލަތު ރަނގަޅުޑރ. ނަޒްލާ ރަފީޤް | ހެލްތު ޕްރޮޓެކްޝަން އެޖެންސީ
މާލޭ ސަރަޙައްދުގައި ކޮވިޑް ފެތުރޭ މިންވަރު އިތުރުވެފައިވާތީ، ރައްކާތެރިކަމުގެ އިތުރު ފިޔަވަޅުތައް މިހާރު ވަނީ ތަންފީޒްކުރަން ފަށާފައެވެ. އެގޮތުން މާލޭ ސަރަޙައްދުގައި އަޅަން ނިންމާފައިވާ ފިޔަވަޅުތަކުގެ ތެރޭގައި 50 މީހުންނަށްވުރެ ގިނަ މީހުން ޖަމާވާގޮތަށް ހަފްލާތަކާއި އިވެންޓުތަކާއި އެއްވުންތައް ބޭއްވުން މަނާކުރުން ހިމެނެއެވެ. އަދި 50 މީހުންނަށްވުރެ މަދު މީހުން ހިމަނައިގެން ބާއްވާ މިފަދަ ހަރަކާތްތައްވެސް އެޗްޕީއޭގެ ގައިޑްލައިނާ މިންގަނޑުތަކާ އެއްގޮތައް ނޫނީ ނުބޭއްވުމަށް ވަނީ އަންގަވާފައެވެ.
މާލެ ސަރަޙައްދުގައި އަޅަން ނިންމާފައިވާ ފިޔަވަޅުތަކުގެ ތެރޭގައި މަގުމަތީ ބާޒާރުފަދަ، އެއްވެގެން ބާއްވާ ވިޔަފާރި ހަރަކާތްތައް ހުއްޓާލުމަށް ވަނީ އަންގާފައެވެ. އަދި ކުޅިވަރު މުބާރާތްތަކާއި ހަރަކާތްތައް، ކުޅިބަލަން މީހުންނަށް ވަދެވޭގޮތަށް ނުބޭއްވުމަށްވެސް ވަނީ އަންގަވާފައެވެ.
އެޗްޕީއޭއިން ވަނީ މިފިޔަވަޅުތައް ފުރިހަމައަށް ތަންފީޒްކުރުމަށް އެންމެހާ އިދާރާތަކާއި ފަރާތްތަކަށް އަންގަވާފައެވެ. މި ނިންމުންތަކާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތަކާ، އަދި އަޅާ ފިޔަވަޅުތަކާއި ދޭ އިރުޝާދުތަކަށް ޢަމަލުކުރުމަށްވެސް ވަނީ އަންގަވާފައެވެ.
މީގެ އިތުރުން ކޮވިޑް ކޮންޓްރޯލްކުރުމަށް އަޅާ ފިޔަވަޅެއްގެ ގޮތުން، ރަށްރަށަށް ދަތުރުކުރާ މީހުން ޕީސީއާރް ޓެސްޓު ހެދުމާއި، ވެކްސިން ނުޖަހާ މީހުން ކަރަންޓީން ވާންޖެހޭ އުސޫލަށްވެސް ވަނީ ޢަމަލުކުރަން ފަށާފައެވެ.
