އޮމިކްރޯން ވޭރިއަންޓުގެ ކޮމިއުނިޓީ ސްޕްރެޑެއްގެ ބިރު މުޅި ރާއްޖެއަށް އެބައޮތް

ރާއްޖޭގައިވެސް އޮމިކްރޯން ވޭރިއަންޓުގެ ކޮމިއުނިޓީ ސްޕްރެޑެއް އުޅޭކަމަށް އެޗްޕީއޭގެ މެޑިކަލް އޮފިސަރ ޑރ ފާތިމަތު ނަޒްލާ ރަފީޤް ވިދާޅުވެއްޖެއެވެ.

އަންގާރަ ދުވަހު ހެލްތް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ޑރ ނަޒްލާ ރަފީޤު ވިދާޅުވީ، ވޭތުވެދިޔަ 3 ހަފްތާގައި ފެންނަމުންދާ ކޭސްތައް އިތުރުވެފައިވާ ކަމަށެވެ. އަދި ކޮމިއުނިޓީ ތެރޭގައިވެސް އޮމިކްރޯން ވޭރިއަންޓު އުޅެމުންދާކަމަށް ކަށަަވަރު ކުރެވިފައިވާކަމަށް ޑރ ނަޒްލާ ވިދާޅުވިއެވެ. އެގޮތުން އެންމެ ފަހުން ލިބުނު ނަތީޖާތަކުގެ ތެރެއިންވެސް އޮމިކްރޯންގެ 7 ކޭސްއެއް ފެނިފައިވާކަމަށް ވިދާޅުވިއެވެ. އެއީ 7 ދިވެހިން ކަމަށާއި، އޭގެ ކުރިންވެސް ދިވެއްސަކު މި ވޭރިއަންްޓަށް ޕޮޒިޓިވްވެފައިވާކަން ޑރ ނަޒްލާ ފާހަގަ ކުރެއްވިއެވެ.

ޑރ ނަޒްލާ ވިދާޅުވީ، އެހެން ޤައުމުތަކުގައިވެސް އޮމިކްރޯން ވޭރިއަންޓު ހަލުވިކޮށް ފެތުރެމުންދާ ކަމަށެވެ. އަދި ކޭސްތައް ދެގުނަވާ ނިސްބަތް އެހެން ވޭރިއަންޓުތަކާއި އަޅާބަލާއިރު މަތިކަމަށް ވިދާޅުވިއެވެ. އެގޮތުން އެއް ދުވަހާއި 3 ދުވަހާއި ދޭތެރޭގައި ކޭސްތައް ދެގުނަވަމުންދާކަމަށް ޑރ ނަޒްލާ ވިދާޅުވިއެވެ.

މިހާރު ޑެލްޓާއާއި އޮމިކްރޯން ވޭރިއަންޓު އުޅުނުކަމުގައިވިޔަސް، ކުރިއަށް އޮތް ތަނުގައި ގިނަވާނީ އޮމިކްރޯން ވޭރިއަންޓުކަމަށްވެސް ނަޒްލާ ލަފާ ކުރައްވައެވެ.

އޭގެ އިތުރުން، ޑެލްޓާ ވޭރިއަންޓު ބޮޑަށް ފެނިގެން ދިޔައީ މާލެއިން ނަމަވެސް، އޮމިކްރޯން ވޭރިއަންޓުގެ ބިރު މުޅި ރާއްޖެއަށްވެސް އެބައޮތްކަމަށް ޑރ ނަޒްލާ ވިދާޅުވިއެވެ. އެކަމާއި ގުޅިގެން ފިޔަވަޅުތައް އަޅާފައިވާއިރު، ކުރިއަށް އޮތް ތަނުގައިވެސް ޙާލަތަށް ބަލައި އިތުރު ފިޔަވަޅުތައް އަޅުއްވާނެކަމަށް ޑރ ނަޒްލާ ވިދާޅުވިއެވެ.

މި ބައްދަލުވުމުގައި މިނިސްޓްރީ އޮފް ހެލްތްގެ ސްޓޭޓް މިނިސްޓަރ ޑރ ޝާހު މާހިރުގެ އިތުރުން، އެޗްޕީއޭގެ އެޕިޑެމޮލޮޖިސްޓް ޑރ އިބްރާހިމް އަފްޒަލްވެސް ބައިވެރިވެވަޑައިގެންނެވިއެވެ.